ខេត្តបាត់ដំបង ៖ អាជ្ញាធរស្រុកមោងប្ញស្សីកំពុងដឹកនាំប្រជាពលរដ្ឋជាង១០០នាក់ ចុះបិទប្រព័ន្ធប្រឡាយធារាសាស្ត្រដែលបានធ្លុះធ្លាយ ដោយសារទឹកហូរច្រោះដាច់ នៅព្រឹកថ្ងៃទី២៧ សីហា នេះ ដើម្បីនាំទឹកទៅផ្គត់ផ្គង់ដំណាំស្រូវនៅប៉ែកខាងក្រោម ដែលកំពុងប្រឈមនឹងគ្រោះរាំងស្ងួត ។ នេះបើតាមមន្ត្រីរដ្ឋបាលស្រុក ដែលបានប្រាប់កោះសន្តិភាពពេលកំពុងមមារញឹកនឹងសកម្មភាពនេះនៅទីតាំងកើហេតុ ។
មន្ត្រីរដ្ឋបាលស្រុកមោងប្ញស្សីបានឲ្យដឹងថា ប្រព័ន្ធធារាសាស្ត្រដែលរងការខូចខាតនោះ គឺនៅលើកំណាត់ខ្សែប្រឡាយទី៧ នៅត្រង់ចំណុចគោកត្រុំ ស្ថិតក្នុងភូមិកោះចារ ឃុំមោង ស្រុកមោងប្ញស្សី ដែលត្រូវទឹកហូរច្រោះដាច់ប្រវែង៣ម៉ែត្រ ។
មន្ត្រីដដែលបានប្រាប់ថា ទឹកដែលហូរច្រោះដាច់នោះ មិនមែនជំនន់ទឹកភ្លៀងទេ គឺទឹកដែលខាងមន្ទីរធនធានទឹក និងឧតុនិយមខេត្តបើកផ្ដល់ឲ្យពីទំនប់«កង្ហត» ដើម្បីបញ្ជូនតាមប្រព័ន្ឌប្រឡាយទី៧នេះ បានទៅស្រោចស្របដំណាំស្រូវ នៅប៉ែកខាងក្រោម នៃស្រុកមោងប្ញស្សី ក្នុងភូមិសាស្ត្រឃុំចំនួន២ គឺឃុំតាលាស់ និងឃុំជ្រៃ ដែលដំណាំស្រូវរាប់ពាន់ហិកតា កំពុងប្រឈមនឹងគ្រោះរាំងស្ងួត។
មន្ត្រីស្រុកដដែលនេះបានបញ្ជាក់ដែរថា អាជ្ញាធរស្រុកបានដឹកនាំកម្លាំងប្រជាពលរដ្ឋជាង១០០នាក់ ដើម្បីចុះជួយបិទប្រព័ន្ធប្រឡាយដែលរងការខូចខាតនេះ ប៉ុន្តែខាងមន្ទីរធនធានទឹក ជាអ្នកឧបត្ថម្ភការ៉ុង ដើម្បីច្រកដីបិទទឹកនេះ ។
បើតាមមន្ត្រីដដែលបានបន្ថែមថា ពេលនេះ ទឹកស្ទឹងសង្កែកំពុងហក់ឡើងជាថ្មី ដោយមានភ្លៀងធ្លាក់នៅប៉ែកខាងលើនៃដងស្ទឹងសង្កែ តែមិនមានជោរជន់ជ្រាបទៅតាមស្រុកស្រែឆ្ងាយៗទេ ។ ដូច្នេះ ដំណាំស្រូវរបស់កសិករស្ទើរទាំងស្រុង នៅក្នុងស្រុកមោងប្ញស្សីកំពុងប្រឈមខ្លាំងបំផុត ការចែកចាយទឹកមិនបានគ្រប់គ្រាន់ ។ (សម្រួលដោយ៖ ស្រីណា)
ចែករំលែកព័តមាននេះ