ខេត្តបន្ទាយមានជ័យ ៖ ភ្ញៀវទេសចរចម្រុះជាតិសាសន៍បានធ្លាក់ចុះចំនួន១៦,៥៩% នៅច្រកទ្វារអន្តរជាតិប៉ោយប៉ែត សម្រាប់ខែកុម្ភៈ បើប្រៀបធៀបនឹងខែមករា ឆ្នាំ២០១៤ ដូចគ្នា ។ បញ្ហាដែលឈានដល់ការធ្លាក់ចុះនេះបណ្តាលមកពីប្រទេសថៃជួបនូវវិបត្តិនយោបាយដ៏ធ្ងន់ធ្ងរ ធ្វើឱ្យស្ថានទូតចំនួន១២ប្រទេសប្រកាសឱ្យប្រជាពលរដ្ឋរបស់គេមានការប្រយ័ត្នប្រយែងក្នុងពេលឆ្លងកាត់ ឬចូលមកប្រទេសមួយនេះ ។
នេះបើតាមការឱ្យដឹងពីមន្ត្រីកម្ពុជានៅច្រកទ្វារអន្តរជាតិប៉ោយប៉ែត ។ លោកជង់ ឡឹម ប្រធានមន្ទីរទេសចរណ៍ខេត្ត និងជាអនុប្រធានក្រុមការងារច្រកទ្វារបានប្រាប់កោះសន្តិភាពតាមទូរស័ព្ទថា ភ្ញៀវទេសចរបរទេសចម្រុះជាតិសាសន៍ដែលចូលមកកម្ពុជាតាមច្រកទ្វារអន្តរជាតិប៉ោយប៉ែត មានការធ្លាក់ចុះ១៦,៥៩% សម្រាប់ខែកុម្ភៈ ប្រៀបធៀបភ្ញៀវសរុបក្នុងខែមករា ។ លោកប្រធានមន្ទីរបានបន្តថា ភ្ញៀវទេសចរសរុបក្នុងខែកុម្ភៈ ឆ្នាំ២០១៤ មានតែ៤៨.៨៩១នាក់ សម្រាប់ភ្ញៀវសរុបខែមករាវិញមានរហូតដល់ទៅ៥៨.៦១៨នាក់ ក្នុងនោះភ្ញៀវឈរលំដាប់លេខ១ គឺភ្ញៀវរុស្ស៊ីក្នុងខែកុម្ភៈមានចំនួន១២.៤៣០នាក់ ឯក្នុងខែមករា មានចំនួន១៥.៣០២នាក់ ។ ភ្ញៀវឈរលំដាប់លេខ២ គឺភ្ញៀវថៃក្នុងខែកុម្ភៈមានចំនួន៦.៧០៣នាក់ កើនឡើង០,២៥% ដោយក្នុងខែមករា មានចំនួនតែ៦.៦៨៦នាក់ ។ ភ្ញៀវកូរ៉េលេខ៣ ក្នុងខែកុម្ភៈមានចំនួន២.៣១៤នាក់ ធ្លាក់ចុះ៣០,៣៤% ដោយក្នុងខែមករាមានរហូតដល់ទៅ៣.៣២២នាក់, ភ្ញៀវអង់គ្លេសលេខ៤, ភ្ញៀវអាល្លឺម៉ង់លេខ៥ និងភ្ញៀវបារាំងលេខ៦ ។
លោកជង់ ឡឹម បន្តថា តាមតួេលខជាក់ស្តែង ខណៈប្រទេសថៃជួបវិបត្តិនយោបាយ និងក្រោយពីស្ថានទូតប្រទេសចំនួន១២ បានប្រកាសដល់ប្រជាពលរដ្ឋរបស់គេឱ្យមានការប្រយ័ត្នប្រយែង ក្នុងពេលប្រទេសថៃជួបនឹងវិបត្តិនយោបាយនោះឃើញថា ភ្ញៀវចម្រុះជាតិសាសន៍ដែលចូលពីប្រទេសថៃមានការធ្លាក់ចុះ ។ ភ្ញៀវទេសចរចម្រុះជាតិសាសន៍ដែលចូលមកកម្ពុជាតាមច្រកទ្វារអន្តរជាតិប៉ោយប៉ែត សម្រាប់ដើមឆ្នាំ២០១៤ បើប្រៀបធៀបទៅនឹងដើមឆ្នាំ២០១៣ ថ្វីដ្បិតតែមានការធ្លាក់ចុះ បុ៉ន្តែសម្រាប់ខែមករា និងខែកុម្ភៈ ឆ្នាំ២០១៤ ដូចគ្នា ហាក់មិនមានការធ្លាក់ចុះបុ៉ន្មាននោះទេ ដោយលោកលើកឡើងថា ការថយចុះចំនួនភ្ញៀវទេសចរតិចតួចក្នុងខែកុម្ភៈ ដោយសារថា ខែកុម្ភៈមានតែ២៨ថ្ងៃ ឯខែមករាមានចំនួនរហូតដល់៣១ថ្ងៃ លើសគ្នា៣ថ្ងៃឯណោះ ៕
ចែករំលែកព័តមាននេះ