ខេត្តស្ទឹងត្រែង ៖ ស្ពានមេគង្គខេត្តស្ទឹងត្រែងដែលជាសមិទ្ធផលទី២ បន្ទាប់ពីស្ពានសេកុងនៅក្នុងទឹកដីខេត្តស្ទឹងត្រែងភូមិភាគឦសាន និងកំពុងស្ថិតក្រោមការសាងសង់របស់ក្រុមហ៊ុនចិនស៊ាងហៃរហូតមកដល់ពេលនេះបានសម្រេចជាង៨០%ហើយ ហើយគ្រោងនឹងបើកឱ្យប្រជាពលរដ្ឋក៏ដូចជាភ្ញៀវទេសចរឆ្លងកាត់នៅពេលបុណ្យចូលឆ្នាំប្រពៃណីខ្មែរខាងមុខនេះរហូតដល់ចប់ពិធីបុណ្យ។
លោកដា វីន មន្ត្រីសហការត្រួតពិនិត្យបច្ចេកទេសបានឱ្យដឹងថា ស្ពានមេគង្គនេះបានចាប់ផ្តើមស្ថាបនាចាប់ពីខែឧសភា ២០១១ នឹងត្រូវបញ្ចប់នៅពាក់កណ្តាលឆ្នាំ២០១៥ តែការសាងសង់នេះក្រុមហ៊ុនចិនស៊ាងហៃបានរួមសហការជាមួយកម្លាំងជំនាញ និងបច្ចេកទេសផ្សេងៗទៀត ដោយខំប្រឹងប្រែងទាំងយប់ ទាំងថ្ងៃដើម្បីឱ្យបានរួចរាល់មុនផែនការនៅខែសីហា ២០១៤ ខាងមុខនេះ។
លោកដា វីន បន្តថា ស្ពានមេគង្គថ្មីនេះមានប្រវែង១.៧៣១ម៉ែត្រ ទទឹង១៣.៥០ម៉ែត្រ សសរស្ពានមានចំនួន៣៣ដើម។ ស្ពានមួយនេះបានតភ្ជាប់ទៅក្នុងបណ្តាញផ្លូវគមនាគមន៍ថ្មីដែលរដ្ឋាភិបាលបានដាក់បញ្ចូលឱ្យក្លាយជាផ្លូវជាតិលេខ៩ គឺឆ្លងកាត់ពីខេត្តស្ទឹងត្រែងចេញទៅខេត្តព្រះវិហារ កំពង់ធំ សៀមរាបជាដើម។
អ្នកជំនាញការក្នុងការសាងសង់បានបង្ហើបប្រាប់ថា នៅរដូវបុណ្យចូលឆ្នាំប្រពៃណីខ្មែរខាងមុខនេះ រថយន្តខ្នាតតូច ម៉ូតូរបស់អ្នកទេសចរនឹងបានឆ្លងកាត់ទៅរមណីយដ្ឋានទឹកធ្លាក់ព្រះនិមិត្ត។ សូមបញ្ជាក់ថា ការបើកឱ្យឆ្លងកាត់នេះអនុញ្ញាតត្រឹមតែរយៈពេលប៉ុន្មានថ្ងៃនៃពិធីបុណ្យប៉ុណ្ណោះ ៕
ចែករំលែកព័តមាននេះ