ខេត្តព្រះសីហនុ ៖ បុរសជនជាតិចិនម្នាក់បានត្រូវខ្មាន់កាំភ្លើងបាញ់សម្លាប់ចំក្បាលនៅក្នុងបន្ទប់ផ្ទះសំណាក់មួយកន្លែងយីហោអក្សរចិន គ្មានអក្សរខ្មែរ១តួ ស្ថិតក្នុងភូមិ៦ សង្កាត់លេខ៤ ក្រុងព្រះសីហនុ កាលពីវេលាម៉ោងប្រមាណ១និង២០នាទីរសៀលថ្ងៃទី២៤ ខែសីហា ។ តាមប្រភពព័ត៌មានថា ខ្មាន់កាំភ្លើងមានគ្នា២
នាក់ ជាជនជាតិចិនដូចគ្នា ជិះម៉ូតូមួយគ្រឿង មកដល់ចំណុចខាងលើក៏បានប្រហារទៅលើជនរងគ្រោះដោយកាំភ្លើងខ្លីតែម្តង ។
ប្រភពព័ត៌មានពីសមត្ថកិច្ចថា ភ្លាមៗជនរងគ្រោះមិនទាន់ត្រូវបានស្គាល់អត្តសញ្ញាណនៅឡើយទេ ។ បន្ទាប់ពីធ្វើសកម្មភាពបាញ់ប្រហារជនរងគ្រោះរួចហើយ ជនសង្ស័យទាំង២នាក់បានជិះម៉ូតូគេចខ្លួនបាត់ស្រមោល ។ បច្ចុប្បន្ន សមត្ថកិច្ចជំនាញកំពុងបន្តស្រាវជ្រាវយ៉ាង យកចិត្តដាក់ក្នុងការស្វែងរកឃាតករ ។ ដោយ
ឡែកជនរងគ្រោះ រង់ចាំសាច់ញាតិមកទទួលយកទៅចាត់ចែងធ្វើបុណ្យទៅតាមប្រពៃណី ។
ទាក់ទងទៅនឹងករណីបាញ់សម្លាប់ជនជាតិចិនដូចបាញ់ចាបនេះ គេមិនទាន់ដឹងថាជាឃាតកម្មឬជាអំពើប្លន់នោះទេ ហើយក៏លំបាកក្នុងការស្វែងរកព័ត៌មានជុំវិញហេតុការណ៍ដែលបានកើតឡើងនេះដែរ ។ នេះជាការបាញ់ប្រហារ១ករណីទៀត គឺរំលងគ្នាតែប៉ុន្មានថ្ងៃសោះ ដែលក្រុមជនជាតិចិនបាញ់ប្រហារមុខកាស៊ីណូរបួសបុរសជនជាតិចិនម្នាក់ ៕ (សម្រួលដោយ៖ ស្រីណា)
ចែករំលែកព័តមាននេះ