រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា បុរសចំណាស់ម្នាក់បានស្លាប់ ក្រោយពេលក្រុមគ្រួសារបញ្ជូនទៅសង្គ្រោះបន្ទាន់ដល់មន្ទីរពេទ្យបង្អែកពោធិ៍ចិនតុង ដោយសារតែគាត់បោកគក់សម្លៀកបំពាក់ ហើយឌុយម៉ាស៊ីនបោកគក់អត់ដិត គាត់បានទៅកាន់ព្រីភ្លើងគោះមើលទាំងខ្លួនប្រាណ និងដៃជើងសើម ដោយមិនបានបិទបារ៉ែតជាមុនសិន ទើបបណ្ដាលឲ្យឆ្លងចរន្តឆក់ដួលដេករបួសធ្ងន់ធ្ងររហូតដល់ស្លាប់បែបនេះតែម្ដង ។
ហេតុការណ៍នោះបានកើតឡើងកាលពីវេលាម៉ោង១រសៀល ថ្ងៃទី២៥ ខែសីហានេះនៅចំណុចផ្ទះគ្មានលេខមួយកន្លែងដែលមានទីតាំងស្ថិតនៅតាមបណ្ដោយផ្លូវលេខ៣០២ ក្រុមទី៥ ភូមិព្រៃសាលា សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ ។ បុរសរងគ្រោះឈ្មោះ ញ៉ាញ់ ឌី អាយុ៥៣ឆ្នាំ មុខរបរជាងជួសជុលប្រចាំនៅក្នុងអាកាសយានដ្ឋានអន្តរជាតិភ្នំពេញ មានទីលំនៅក្នុងផ្ទះកើតហេតុខាងលើ ។
ដោយស្ត្រីឈ្មោះ ញ៉ាញ់ ស្រីមុំ អាយុ៦០ឆ្នាំ ត្រូវជាបងស្រីបង្កើរបស់បុរសរងគ្រោះបាននិយាយថា នៅមុនពេលកើតហេតុបន្ទាប់ពីត្រឡប់មកពីធ្វើការវិញ និងហូបបាយរួចប្អូនប្រុសគាត់ម្នាក់នេះបានងូតទឹក និងប្រមូលសម្លៀកបំពាក់បោកគក់ដោយម៉ាស៊ីន ។ ខណៈនោះឌុយខ្សែម៉ាស៊ីនបោកគក់អត់ដិតធ្វើឲ្យម៉ាស៊ីនមិនដំណើរការសោះទើបប្អូនប្រុសគាត់ទៅកាន់ព្រីភ្លើងមើល និងគោះទាំងខ្លួនសើមជោគ ព្រមទាំងអត់បានបិទបារ៉ែតភ្លើងសិនទេ ។
ប្រភពដដែលបានបន្តថា លុះបន្តិចក្រោយមកស្រាប់តែឆ្លងចរន្ត បណ្ដាលឲ្យឆក់ដួលដេកនៅលើសាប សន្លប់ស្ដូកស្ដឹងតែម្ដង ហើយភ្លាមៗនោះគាត់រួមជាមួយប្អូនស្រីទី២ម្នាក់ទៀត ឈ្មោះ ញ៉ាញ់ ឌីធីដា បានតក់ស្លុតយ៉ាងខ្លាំង និងបានស្រែកហៅឲ្យអ្នកជិតខាងជួយបង្កឲ្យមានការភ្ញាក់ផ្អើលយ៉ាងខ្លាំង ។ បន្ទាប់មកក៏បានបញ្ជូនទៅកាន់មន្ទីរពេទ្យបង្អែកពោធិ៍ចិនតុង ដើម្បីសង្គ្រោះបន្ទាន់ភ្លាមៗដែរ ប៉ុន្តពេលទៅដល់បានមួយសន្ទុះគ្រូពេទ្យបានប្រាប់ថា ប្អូនប្រុសគាត់រូបនេះស្លាប់បាត់ទៅហើយ ។ ទើបដឹកសពត្រឡប់ទៅផ្ទះវិញ ហើយរហូតដល់វេលាល្ងាចថ្ងៃដដែលក៏បានរាយការណ៍ជូនដល់នគរបាល និងអាជ្ញាធរមូលដ្ឋានបានដឹង និងពិនិត្យមើលជាក់ស្ដែងអំពីការស្លាប់ដ៏គួរឲ្យសោកស្ដាយនៃប្អូនប្រុសគាត់ម្នាក់នេះ ។
ក្រោយពីទទួលបានដំណឹងនោះភ្លាម នគរបាលប៉ុស្តិ៍កាកាប២ បានរាយការណ៍បន្តទៅកាន់នគរបាលផ្នែកព្រហ្មទណ្ឌខណ្ឌពោធិ៍សែនជ័យ និងនគរបាលការិយាល័យបច្ចេកទេសនៃស្នងការដ្ឋានរាជធានីភ្នំពេញដើម្បីពិនិត្យកោសល្យវិច្ច័យ ហើយជាលទ្ធផលឃើញថា ជនរងគ្រោះពិតជាស្លាប់ដោយសារចរន្តអគ្គិសនីឆក់មែន ៕ កែសម្រួលដោយ ៖ សុឃាក់
ចែករំលែកព័តមាននេះ