ប្រទេសរុស្ស៊ីកាលពីថ្ងៃទី៣ មីនា បានបង្កើនថែមទៀតការរួមរិតរបស់ខ្លួនលើតំបន់គ្រីមេជាតំបន់ស្វយ័តរបស់អ៊ុយក្រែន ដែលកងកម្លាំងរុស្ស៊ីត្រួតត្រាចាប់ពីចុងសប្តាហ៍កន្លងមកនេះ ខណៈរដ្ឋាភិបាលថ្មីស្និទ្ធលោកខាងលិចនៅទីក្រុងគៀវ សន្យាដាច់ខាតមិនបោះបង់ចោលតំបន់នោះ ។ សភាពការណ៍កាន់តែតានតឹងខ្លាំងថែមទៀតនៅអ៊ុយក្រែន ដោយកាលពីយប់ថ្ងៃទី៣ មីនា ក្រុមប្រឹក្សាសន្តិសុខ អ.ស.ប បានរួមប្រជុំជាលើកទី៣ ស្តីពីអ៊ុយក្រែនរយៈពេលតែប៉ុន្មានថ្ងៃ។
កិច្ចប្រជុំបន្ទាន់មួយត្រូវបានសម្រេចធ្វើនៅនាទីចុងក្រោយ ខណៈដែលក្រុងគៀវចោទប្រកាន់រុស្ស៊ីថា ដាក់ឱសានវាទមួយចំពោះខ្លួននៅគ្រីមេ ត្រួតត្រាដោយកងកុំម៉ង់ដូប្រដាប់អាវុធ ។ យោងតាមអ្នកទទួលខុសត្រូវម្នាក់របស់ក្រសួងការពារប្រទេសអ៊ុយក្រែនថា ច្បាស់បំផុតកងនាវាចរណ៍សមុទ្រខាងជើងរបស់រុស្ស៊ីបានតម្រូវឱ្យកងទ័ពអ៊ុយក្រែនមានវត្តមាននៅគ្រីមេដាក់អាវុធចុះមុនម៉ោង៥ព្រឹកថ្ងៃទី៤ មីនា ។
អ្នកទទួលខុសត្រូវរូបនេះលោកវ៉្លាឌីស្លាវសឺឡេសណេវ និយាយថា ឱសានវាទនោះគឺឱ្យទទួលស្គាល់អាជ្ញាថ្មីស្និទ្ធរុស្ស៊ីនៅគ្រីមេ ដាក់អាវុធចុះ ហើយចាកចេញ ឬមួយត្រៀមរង់ចាំការវាយលុកមួយ ។ ក្រសួងការពារប្រទេសរុស្ស៊ីពុំបានអះអាងពីព័ត៌មាននេះរាយការណ៍ដោយ INTERFAX ឡើយ ។ ទោះបីមានព័ត៌មានច្របូកច្របល់នៅគ្រីមេក៏ដោយ ក៏វាពិតដោយតាមតំណាងរបស់អ៊ុយក្រែនប្រចាំអ.ស.ប លោកអុីអ៊ូរីស័រហ្គេយអុីយេវ ថា ចាប់តាំងពីថ្ងៃទី២៤ កុម្ភៈមក ទាហានរុស្ស៊ីប្រមាណជា១៦.០០០នាក់ត្រូវបានដាក់ពង្រាយនៅគ្រីមេ តាមរយៈបណ្តានាវាចម្បាំង និងឧទ្ធម្ភាគចក្រដឹកជញ្ជូនមកពីដែនដីរុស្ស៊ី ។
កងទ័ពរុស្ស៊ីមានមូលដ្ឋាននៅទីក្រុងសេបាស្តូប៉ូល ទ្រទ្រង់ដោយបណ្តាកងឯកភាពមកពីរុស្ស៊ីកាលពីចុងសប្តាហ៍កន្លងមកនេះបានត្រួតត្រាចំណុចយុទ្ធសាស្ត្រទាំងឡាយរបស់គ្រីមេជាសាធារណរដ្ឋស្វយ័តអ៊ុយក្រែនមួយ ។ប្រធានាធិបតីស្តីទីអ៊ុយក្រែន លោកអូឡេកសាន់ឌ័រតួកឈីណូវ អះអាងថា វត្តមានយោធារុស្ស៊ីបន្តបង្កើនក្នុងតំបន់គ្រីមេ ហើយបានស្នើដល់ក្រុងមូស្គូឱ្យបញ្ចប់ការឈ្លានពានរបស់ខ្លួន ។កងនាវាចរណ៍សមុទ្រខាងជើងរុស្ស៊ីបានបដិសេធថា ពុំបានដាក់ឱសានវាទមួយដល់កងទ័ពអ៊ុយក្រែននៅគ្រីមេ ដូចការអះអាងនាពេលមុន ដោយប្រភពជិតដិតនឹងក្រសួងការពារប្រទេសអ៊ុយក្រែនឡើយ ។ អ៊ុយក្រែនក៏រាយការណ៍ដែរពីចលនារបស់កងនាវាចម្បាំងរុស្ស៊ីនៅជុំវិញកំពង់ផែសេបាស្តូប៉ូល ។ នៅ PEREVALNE ចន្លោះក្រុងស៊ីមហ្វេរ៉ូប៉ូល រដ្ឋធានីគ្រីមេ និងសមុទ្រខ្មៅ កងទាហានរុស្ស៊ីបានឡោមព័ទ្ធមូលដ្ឋានយោធាពីររបស់កងទ័ពអ៊ុយក្រែន ។
នៅភាគខាងកើតអ៊ុយក្រែន ជាតំបន់និយាយភាសារុស្ស៊ីមួយទៀត ពួកអ្នកគាំទ្រវិមានក្រឹមឡាំងបានលើកទង់ជាតិរុស្ស៊ី ហើយលុកចូលត្រួតត្រាវិមានរដ្ឋាភិបាលតំបន់នៅ DONETSK ដោយនាំគ្នាស្រែកពាក្យថា «ពូទីន មកហើយ! ពូទីន មកហើយ!» ។ ទន្ទឹមនឹងនេះដែរ ប្រធានាធិបតីរុស្ស៊ីលោកពូទីន បានមកពិនិត្យសមយុទ្ធយោធាដែលរៀបចំធ្វើនៅភាគពាយ័ព្យរុស្ស៊ី ។ ប្រមុខវិមានក្រឹមឡាំងបានចេញបញ្ជាឱ្យធ្វើសមយុទ្ធនេះដើម្បីត្រួតពិនិត្យសមត្ថភាព ប្រតិបត្តិការរបសកងទ័ពរុស្ស៊ីនៅភាគកណ្តាល និងភាគខាងលិចប្រទេស ៕
ចែករំលែកព័តមាននេះ