ខេត្តកំពង់ឆ្នាំង ៖ សាច់ជ្រូក និងគ្រឿងក្នុងជ្រូកជាង 1 តោនត្រូវបានសមត្ថកិច្ចចម្រុះរបស់ខេត្តកំពង់ឆ្នាំងធ្វើការដុត និងកប់កម្ទេចចោល នៅវេលាម៉ោង 9 ព្រឹកថ្ងៃទី24 ខែសីហា ឆ្នាំ2019 នៅក្នុងដី នៃការិយាល័យក្សេត្រសាស្ត្រ របស់មន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង ។
តាមការបញ្ជាក់ពីលោក ក្រឹង សំអាត ប្រធានការិយាល័យបសុព្យាបាលខេត្តកំពង់ឆ្នាំងបានអោយដឹងថា សាច់ជ្រូក ពោះវៀនជ្រូក និងឆ្អឹងជ្រូក ដែលបានធ្វើការដុតកម្ទេចនៅពេលនេះមានចំនួន ១៧២០ គីឡូក្រាម ដែលត្រូវបានសមត្ថកិច្ចចាប់រឹបអូស ខណៈដែលឆ្លងកាត់ប៉ុស្តិ៍ត្រួតពិនិត្យនៅភូមិច្រឡំដៃ ឃុំស្វាយ ស្រុកសាមគ្គីមានជ័យកាលពីថ្ងៃទី22 សីហា កន្លងទៅនេះ ។
លោកបានបញ្ជាក់ថា យើងមិនអាចនិយាយថា សាច់នេះដឹកពីខាងណាមកទេ ប៉ុន្តែគ្រាន់តែដឹងថា សាច់ដឹកឆ្លងកាត់ខេត្តកំពង់ឆ្នាំងគ្មានច្បាប់អនុញ្ញាតិត្រឹមត្រូវគ្មានប្រភពច្បាស់លាស់ និងការវេចខ្ចប់ក៏គ្មានលក្ខណៈត្រឹមត្រូវ ដែលឈ្មួញបានលួចដឹកចេញពីប៉ែកខាងលិចនៃប្រទេសកម្ពុជា ដើម្បីយកទៅកាន់ទីផ្សារនានាក្នុងព្រះរាជាណាចក្រកម្ពុជា ។ ការដុតចោលនៅពេលនេះក្នុងគោលបំណង ទប់ស្កាត់ជំងឺដែលកំពុងតែរីករាលដាលនៅក្នុងប្រទេសកម្ពុជា ដូចជាជំងឺប៉េស្តជ្រូកអាហ្វ្រិកជាដើម ។
ជាមួយគ្នានេះលោកក៏សូមសំណូមពរដល់អាជីវករ និងបងប្អូនទាំងអស់សូមមេត្តាកុំនាំសាច់គ្មានប្រភពច្បាស់លាស់ចូលមកក្នុងខេត្តកំពង់ឆ្នាំងដើម្បីធានាបានការរីករាលដាលនៃជំងឺប៉េស្តជ្រូកអាហ្វ្រិក ៕
កែសម្រួលដោយ ៖ សំណាង
ចែករំលែកព័តមាននេះ