រាជធានីភ្នំពេញ ៖ ក្នុងសន្និសីទអន្តរជាតិលើកទី១ស្តីពី «លើកកម្ពស់គុណតម្លៃប្រពៃណី និងបេតិកភណ្ឌ ដើម្បីការអភិវឌ្ឍន៍ទេសចរណ៍ប្រកបដោយចិរភាព» បានលើកឡើងពីការត្រៀមស្នើទៅរាជរដ្ឋាភិបាលកម្ពុជាពិនិត្យលទ្ធភាពក្នុងការដាក់ម្ហូប និងបង្អែមខ្មែរមួយចំនួនទៅក្នុងបញ្ជីបេតិកភណ្ឌអរូបីរបស់អង្គការយូណេស្កូ ។ លោកថោង…
រាជធានីភ្នំពេញ ៖ ក្នុងសន្និសីទអន្តរជាតិលើកទី១ស្តីពី «លើកកម្ពស់គុណតម្លៃប្រពៃណី និងបេតិកភណ្ឌ ដើម្បីការអភិវឌ្ឍន៍ទេសចរណ៍ប្រកបដោយចិរភាព» បានលើកឡើងពីការត្រៀមស្នើទៅរាជរដ្ឋាភិបាលកម្ពុជាពិនិត្យលទ្ធភាពក្នុងការដាក់ម្ហូប និងបង្អែមខ្មែរមួយចំនួនទៅក្នុងបញ្ជីបេតិកភណ្ឌអរូបីរបស់អង្គការយូណេស្កូ ។
លោកថោង រដ្ឋសក្ដិ អគ្គនាយកអភិវឌ្ឍន៍ទេសចរណ៍បានថ្លែងថា តាមរយៈនៃកិច្ចពិភាក្សា និងស្មារតីសន្និសីទអន្តរជាតិលើកទី១នេះ ក្រសួងទេសចរណ៍ទទួលបានធាតុចូលថ្មីបន្ថែមទៀតក្នុងការដឹកនាំ និងអភិវឌ្ឍន៍វិស័យទេសចរណ៍ប្រកបដោយចីរភាព ពិសេសផ្នែក ទេសចរណ៍ម្ហូបអាហារដើម្បីឲ្យកាន់តែរីកចម្រើនបន្ថែមទៀត ។ អ្វីដែលបានរំលេចនៅក្នុងសន្និសីទអន្តរជាតិនោះផងដែរ គឺអង្គសន្និសីទបានស្នើដល់រាជរដ្ឋាភិបាលកម្ពុជាពិនិត្យលទ្ធភាពក្នុងការដាក់ម្ហូបខ្មែរចំនួន៥រួមមាន ៖ សម្លកកូរ សម្លម្ជូរគ្រឿងខ្មែរ សម្លប្រហើរ ហហ្មុក និងនំបញ្ចុក ព្រមទាំងបង្អែមខ្មែរចំនួន៥មុខ រួមមាន ៖ នំអន្សម នំចក្កច័ន ដំណើបសង់ខ្យា នំផ្លែអាយ និងនំស្លឹកស្រស់ ទៅក្នុងបញ្ជីបេតិកភណ្ឌអរូបីរបស់អង្គការយូណេស្កូ ( UNESCO ) ។
អង្គសន្និសីទក៏បានស្នើឲ្យមានប្រតិការប្រចាំឆ្នាំ «សប្តាហ៍ម្ហូបខ្មែរ» ដែលត្រូវរៀបចំជារៀងរាល់ឆ្នាំ ដើម្បីផ្សព្វផ្សាយម្ហូបអាហារខ្មែរ ហើយគ្រប់ស្ថាប័នតំណាង និងអង្គទូតកម្ពុជា នៅក្រៅប្រទេស គួរប្រារព្ធពិធីនេះ ដោយរៀបចំជាការទទួលភ្ញៀវជាតិ អន្តរជាតិជាមិត្ត ។ ទន្ទឹមនោះក្រសួងទេសចរណ៍គួរបន្តរៀបចំសន្នីសីទអន្តរជាតិនេះជាបន្តបន្ទាប់ ដើម្បីត្រួតពិនិត្យដំណើរការនិវត្តន៍ ចែករំលែកបទពិសោធន៍ ទទួលបានបច្ចុប្បន្នភាពនៃនិន្នាការទេសចរណ៍សាកលលោក និងតំបន់ពាក់ព័ន្ធនឹងទេសចរណ៍ម្ហូបអាហារនេះ ។
លោកថោង ខុន រដ្ឋមន្ត្រីក្រសួងទេសចរណ៍បានស្វាគមន៍ និងគាំទ្រចំពោះការស្នើដាក់បញ្ចូលម្ហូបអាហារខ្មែរ៥មុខ រួមទាំងបង្អែមខ្មែរ៥មុខ ក្នុងបញ្ជីបេតិកភណ្ឌអរូបីរបស់អង្គការយូណេស្កូ ដែលបានស្នើដោយអង្គសន្និសីទអន្តរជាតិ ប៉ុន្តែលោកថា តាមដឹងនៅមានម្ហូបអាហារបង្អែមខ្មែរច្រើនមុខទៀតដែលនឹងត្រូវស្នើទៅយូណេស្កូផងដែរ ។ លោករដ្ឋមន្ត្រីបញ្ជាក់ថា ដូចជាបបរស្ករផ្លែត្នោតខ្ចី ចេកខ្ទឹះ ជាដើមសុទ្ធសឹងជា បង្អែមដែលខ្មែរយើងធ្វើមានរសជាតិឈ្ងុយឆ្ងាញ់ណាស់ហើយពេញនិយមថែមទៀត ។ ដូច្នេះគប្បីក្រសួងទេសចរណ៍បន្តសហការជាមួយ ស្ថាប័នពាក់ព័ន្ធ អាជ្ញាធរមូលដ្ឋានស្រាវជ្រាវរកឲ្យឃើញមុខម្ហូបអាហារ និងបង្អែមខ្មែរច្រើនទៀត ដើម្បីស្នើដាក់បញ្ជូលក្នុងបញ្ជីបេតិកភណ្ឌអរូបីរបស់អង្គការយូណេស្កូបន្ថែមទៀត ។
អង្គសន្និសីទអន្តរជាតិ លើកទី១ នេះ បានដំណើរការពេញ១ថ្ងៃ គឺនៅថ្ងៃទី២១ ខែសីហា ឆ្នាំ២០១៩ ដោយមានការចូលរួមពីតំណាងមន្ត្រីជាន់ខ្ពស់ ពីអង្គការទេសចរណ៍ពិភពលោក (UNWTO) អង្គការ UNESCO ក្រសួង-ស្ថាប័នជាតិ រដ្ឋបាលថ្នាក់ក្រោមជាតិ សមត្ថកិច្ចពាក់ព័ន្ធ វាគ្មិនជាតិ-អន្តរជាតិ អ្នកស្រាវជ្រាវ អង្គការជាតិ-អន្តរជាតិ ដៃគូ អភិវឌ្ឍន៍ សាកលវិទ្យាល័យ និងសាលាបណ្តុះ បណ្តាលវិជ្ជាជីវៈ ផ្នែកឯកជន សិស្ស-និស្សិត ជាង៦០០នាក់ ៕ កែសម្រួលដោយ ៖ សុឃាក់
ចែករំលែកព័តមាននេះ