បារម្ភខ្លាំងណាស់…អគារកំពុងភ្លើងឆេះប្រេះស្រាំហើយ

ថ្ងៃទី ២៣ ខែ សីហា ឆ្នាំ ២០១៩

ម៉ោង ១៦:២១

រាជធានីភ្នំពេញ ៖ សេចក្តីរាយការណ៍បានបន្តទៀតថា ខណៈអគ្គិភ័យកំពុងឆេះកាន់តែខ្លាំងឡើងអស់ជាច្រើនម៉ោងមកហើយ គិតត្រឹមម៉ោង៤និង១២នាទីរសៀលថ្ងៃទី២៣ សីហា នេះ បានឃើញទីតាំងអគារដែលកំពុងភ្លើងឆេះមានសភាពប្រេះស្រាំជាច្រើនកន្លែងដោយសារឥទ្ធិពលភ្លើងក្តៅខ្លាំងក្លា និងកំពុងធ្វើឱ្យមានការបារម្ភខ្លាចអគារទប់ទល់លែងបាន អាចនឹងបាក់ស្រុតផងដែរ ។ ក៏ប៉ុន្តែ អាជ្ញាធរនិងកំពុងដុតដៃដុតជើងស្វះស្វែងខ្លាំងណាស់ ក្នុងការទប់ស្កាត់ ដោយឃើញមានរថយន្តពន្លត់បានចេញអន្តរាគមន៍បន្តបន្ទាប់គ្នាប្រមាណ២០គ្រឿងទៅហើយ ។

សូមបញ្ជាក់ថា ហេតុការណ៍អគ្គិភ័យឆាបឆេះយ៉ាងសន្ធោសន្ធៅ ដោយផ្សែងខ្មៅហុយឡើងខ្មួលខ្មាញ់ ស្ថិតលើផ្លូវលំមួយកន្លែង ក្នុងភូមិចម្រើនផល សង្កាត់បឹងទំពុន ដោយគេមិនទាន់ដឹងពីមូលហេតុទេ ហើយក៏កំពុងមានកអន្តរាគមន៍ពីសមត្ថកិច្ច និងរថយន្តពន្លត់អគ្គិភ័យជាច្រើនគ្រឿងផងដែរ នារសៀលថ្ងៃទី២៣ សីហា នេះ ។ ប្រភពបន្តទៀតថា អគ្គិភ័យឆេះចេញពីក្នុងរោងចក្រផលិតពូកមួយកន្លែង។

គិតមកទល់ម៉ោង១ និង៤៥នាទីរសៀលថ្ងៃដដែល ចរន្តអគ្គិសនីក្នុងតំបន់ពាក់ព័ន្ធខាងលើទាំងអស់ ត្រូវបានផ្តាច់ជាបណ្តោះអាសន្ន ដើម្បីការពារសុវត្ថិភាព ។ (សម្រួលដោយ៖ ស្រីណា)

ព័ត៌មានបន្ថែម កោះសន្តិភាពនឹងមានផ្សាយជូនបន្ត ។