រយៈ​២​ថ្ងៃ រក​ឃើញ​ទីតាំង​បញ្ចូល​ហ្គា​ស​ក្នុង​​ក្រុង​សៀមរាបអត់ច្បាប់​៥​កន្លែង


ខេត្តសៀមរាប ៖ បន្ទាប់​ពី​មាន​ឧបទ្ទវហេតុដ៏​រន្ធត់​ផ្ទុះ​ហ្គា​ស ​ក្នុង​ស្ថានីយ​នៅ​កណ្តាល​ក្រុង​សៀមរាបបណ្តាល​ឱ្យ​មាន​អ្នក​ស្លាប់​និង​របួសធ្ងន់​ស្រាលចំនួន​១៤​នាក់​រួច​មក លោក សុខ ថុ​ល នាយករដ្ឋបាល​សាលាខេត្តបាន​​​ដឹកនាំ​កម្លាំង​ចម្រុះ​រួម​មាន មន្ត្រី​រដ្ឋបាល​សាលាខេត្ត ប្រធាន​មន្ទីរ​រ៉ែ និង​ថាមពល នគរបាល​ការិ​យា​ល័យ​​បង្ការ​ពន្លត់អគ្គិភ័យ​និង​សង្គ្រោះ នគរបាល​ការិយាល័យ​ប្រឆាំង​បទល្មើស​សេដ្ឋកិច្ច និង​អាជ្ញាធរ​មូលដ្ឋាន
ចុះ​ធ្វើ​កិច្ចសន្យា ​និង​ណែនាំ​ម្ចាស់​ទីតាំង​បញ្ចូល​និង​លក់​កំប៉ុង​ហ្គា​ស​គ្មាន​ច្បាប់់​ជា​ច្រើន​ឆ្នាំ​មក​ហើយ ចំនួន​៥​ទីតាំង​ក្នុង​ក្រុង​សៀមរាបក្នុង​រយៈពេល​២​ថ្ងៃ គឺ​ថ្ងៃ​ទី​២០​និង​ថ្ងៃ​ទី​២១ ខែសីហា ដើម្បី​ឱ្យ​ពួក​គាត់​ទៅ​សុំ​ច្បាប់​អនុញ្ញាត​ឱ្យ​បាន​ត្រឹមត្រូវ​នៅ​ច្រក​ចេញចូល​តែ​មួយ​របស់​រដ្ឋបាល​សាលាខេត្ត​ជា​មុន​សិន ទើប​ឱ្យ​រក​ទីតាំង​ថ្មី​នៅ​ក្រៅ​ក្រុង ដើម្បី​បន្ត​អាជីវកម្ម កុំឱ្យ​មាន​ករណី​ដូច​ការ​ផ្ទុះ​ហ្គា​ស​កាលពី​ប៉ុន្មាន​ថ្ងៃមុន​ទៀត ។

លោក​​ឧត្តមសេនីយ៍ត្រី ភឹង សម្បត្តិ ស្នងការ​រង​នគរបាល​ខេត្ត ទទួល​ការិយាល័យ​បង្ការ​ពន្លត់អគ្គិភ័យ​និង​សង្គ្រោះ ថ្លែង​ថា ទីតាំង​បញ្ចូល​ហ្គា​ស ទាំង​៥​ដែល​បាន​ចុះ​ត្រួតពិនិត្យ​នេះ​មាន ៖១-​ទីតាំង​យីហោ ផៅ​វើ​រ​ហ្គា​ស ម្ចាស់​ឈ្មោះហុង ប៊ុ​ន​លី ភេទ​ប្រុស នៅ​ភូមិ​ចុង​កៅស៊ូ សង្កាត់​ស្ល​ក្រាម ២-​ទីតាំង​យីហោ​ទាន់សម័យ ម្ចាស់​ឈ្មោះ សរ ប៊ុ​ន​ឆាយ ភេទ​ប្រុស នៅ​ភូមិ​បន្ទាយ​ចាស់ សង្កាត់​ស្ល​ក្រាម ៣-​ទីតាំង​យីហោ​អង្គរ​ហ្គា​ស ម្ចាស់​ឈ្មោះ ពៅ សាយ ភេទ​ប្រុស អាយុ​៤៥​ឆ្នាំ នៅ​ភូមិ​មណ្ឌល​១ សង្កាត់​ស្វាយ​ដង្គំ ៤-​ទីតាំង​គ្មាន​ស្លាក​យីហោ ម្ចាស់​ឈ្មោះ លី សុខ​ហេង ភេទ​ប្រុស អាយុ​៤៧​ឆ្នាំ ំ​នៅ​ភូមិ​ស្ទឹង​ថ្មី សង្កាត់​ស្វាយ​ដង្គំ និង៥-​ទីតាំង​គ្មាន​ស្លាក​យីហោ ម្ចាស់​ឈ្មោះ នូ សំណា​ង ភេទ​ប្រុស អាយុ​៤៥​ឆ្នាំ នៅ​ភូមិ​សាលា​កន្សែង សង្កាត់​ស្វាយ​ដង្គំ ។

លោកស្នងការ​រង ភឹង សម្បត្តិ ថ្លែង​ទៀតថា ក្រោយ​ពី​បាន​ពិនិត្យ​មើល​ទីតាំង​ទាំង​៥​នោះរួច​មក ក្រុមការងារ​បាន​ធ្វើការ​ណែនាំ​ម្ចាស់​ទីតាំង ត្រូវ​មាន​ទីធ្លា​អាជីវកម្ម​ឱ្យ​មាន​សណ្តាប់ធ្នាប់ និង​សុវត្ថិភាព ត្រូវ​យក​ឧបករណ៍​បញ្ចូល​ហ្គា​ស​ចេញពី​កន្លែង​លក់​ហ្គា​ស មិន​ត្រូវ​យក​សម្បក​កំប៉ុង​ដែលចាស់​មក​បញ្ចូល មិន​ត្រូវ​បញ្ចូល​ហ្គា​ស​ឱ្យ​លើសចំណុះ​របស់​កំប៉ុង ។

មិន​ត្រូវ​ផ្ទេរ​ឬ​បញ្ចូល​ហ្គា​ស​នៅ​តាម​អគារ​ឬ​ផ្ទះល្វែង ទីតាំង​អាជីវកម្ម​ដែល​មិន​មាន​លិខិតអនុញ្ញាត ។ គោរព​តាម​សេចក្តី ណែនាំ ស្តី​ពី​ការ​ប្រកប​អាជីវកម្ម​លក់ បញ្ចូល ដឹក​ជញ្ជូនចែកចាយ និង​ស្តុក​ទុក​ឧស្ម័ន​ឥន្ធនៈ របស់​​រដ្ឋបាល​ខេត្តសៀមរាប ។ ត្រូវ​សុំ​លិខិតអនុញ្ញាត​ពី​មន្ទីរ​រ៉ែ​និង​ថាមពល​ខេត្ត ត្រូវ​ផ្អាក​ជា​បណ្តោះអាសន្ន​នូវ​សកម្មភាព​នានា រហូត​ទទួល​បាន​លិខិតអនុញ្ញាត​ពី​មន្ទីរ​រ៉ែ និង​ថាមពល​ខេត្ត ឱ្យ​បាន​រួចរាល់​ជា​មុន​សិន ។

សូម​រំឭក​ថា កាលពី​ថ្ងៃ​ទី​១៤ ខែសីហា ឆ្នាំ២០១៩​កន្លង​ទៅ​ថ្មី​ៗ​នេះ នៅ​កណ្តាល​ក្រុង​សៀមរាប មាន​ករណី​ផ្ទុះ​នៅ​ស្ថានីយ​បញ្ចូល​ហ្គា​សរ​ថយន្ត​២៤​ម៉ោង​គ្មាន​ច្បាប់​១​កន្លែង បណ្តាល​ឱ្យ​ឆាបឆេះ​គ្មាន​សល់ រហូត​ខូចខាត​ដល់​ផ្ទះ​អ្នក​ជិត ខាង ព្រមទាំង​មាន​អ្នក​ស្លាប់​និង​របួសធ្ងន់​ស្រាលចំនួន​១៤​នាក់ ក្នុង​នោះ​មាន​ស្ត្រី​បរទេស​២​នាក់ ជា​គ្រូបង្រៀន​ផង​ដែរ ស្ថិត​នៅ​តាម​ផ្លូវ​លោកតា​ណឺ​យ ក្នុងភូមិ​បន្ទាយ​ចាស់ សង្កាត់​ស្ល​ក្រាម ក្រុង​សៀមរាប ។

ម្ចាស់​ទីតាំង​ស្ថានីយ​បញ្ចូល​ហ្គា​ស​រថយន្ត​២៤​ម៉ោង​នោះ​ឈ្មោះ ឈុ​ក ឈុ​ន​លី ភេទ ប្រុស​អាយុ​៤៨​ឆ្នាំ មាន​ទីលំនៅ​ក្នុងភូមិ​គោក​ស្រុក ឃុំ​ពួក ស្រុក​ពួក ។ ក្រោយ​ពី​មាន​ហេតុការណ៍​ដ៏​រន្ធត់​នេះ​កើតឡើង ក្រសួង​រ៉ែ​និង​ថាមពល បាន​ចេញ​សេចក្តី​ប្រកាស​ថា ទីតាំង​ដែល​រង​ការ​ផ្ទុះ​ឆេះ​នោះ​ពុំ​មានច្បាប់​អនុញ្ញាត​ទេ ប៉ុន្តែ​បាន​ដំណើរការ​អស់​រយៈពេល​ជា​ច្រើន​ឆ្នាំ​មក​ហើយ ៕​ (សម្រួលដោយ៖ ស្រីណា)

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

ការស្ទង់មតិគេហទំព័រថ្មី




សូម​អរគុណ