រាជធានីភ្នំពេញ ៖ សកម្មជនបឹងកក់ សកម្មជនសិទ្ធិមនុស្ស និងសហជីពកម្មករប្រមាណ៦០នាក់ដោយនៅដៃម្នាក់ៗមានកាន់ផ្កាឈូក ស្លាកពាក្យបដា និងស្លៀកពាក់សចងក្បិន បាននាំគ្នាដង្ហែក្បួនទៅតុលាការកំពូល កាលពីវេលាម៉ោង៨ព្រឹកថ្ងៃទី៣ មីនា ២០១៤ នេះ ដើម្បីរៀបចំពិធីជូនពរដល់មន្ត្រីស្មោះត្រង់ ហើយបានសម្តែងជាតួលោកតាដំបងដែក ដើម្បីដាក់ទណ្ឌកម្មដល់មន្ត្រីដែលចិត្តអាក្រក់ផងដែរ ។
ប្រភពបានឱ្យដឹងថា ទោះបីជាបែបណា ការដង្ហែនេះត្រូវបានសមត្ថកិច្ចចម្រុះរារាំងនៅចំណុចផ្លូវលេខ១៧៨កែងស៊ីសុវត្ថិ ក្នុងសង្កាត់ជ័យជំនះ ខណ្ឌដូនពេញ ដើម្បីកុំឱ្យមានបាតុភាពកើតឡើង តែក្នុងហេតុការណ៍នោះ ត្រូវបានប្រទាញប្រទង់គ្នា ដោយក្រុមសមត្ថកិច្ចខណ្ឌដូនពេញចង់ដកហូតក្បាលមីក្រូពីក្រុមទាំងនោះ ។
ប្រភពបានបន្តថា ការដែលក្រុមសកម្មជនធ្វើបែបនេះ គឺដោយសារគាត់ចង់ឱ្យមានការដោះលែងមនុស្សចំនួន២១នាក់ដែលកំពុងជាប់ឃុំនៅពន្ធនាគារត្រពាំងថ្លុង ខេត្តកំពង់ចាម ។ ហើយនៅរសៀលថ្ងៃដដែលនេះផងដែរ គេឃើញខាងតំណាងសហគមន៍បានចូលទៅសាលាខណ្ឌដូនពេញ ដើម្បីដោះស្រាយយកក្បាលមីក្រូត្រឡប់មកវិញ ។
ចែករំលែកព័តមាននេះ