ប៉ូលិសអូស្ត្រាលីបានចាប់ខ្លួនអាចារ្យអ៊ិស្លាមម្នាក់ ពីបទរៀបចំពិធីរៀបការខុសច្បាប់រវាងយុវជនអាយុ២៦ឆ្នាំ ជនជាតិលីបង់ ជាមួយក្មេងស្រីអាយុ១២ឆ្នាំ។ សារព័ត៌មានបរទេសបានចុះផ្សាយដោយយោងតាមការគូសបញ្ជាក់របស់ប៉ូលិសថា អាចារ្យជនជាតិប៉ាគីស្ថានម្នាក់នោះ ត្រូវប៉ូលិសចាប់ខ្លួននៅក្រុងស៊ីដនីនាពេលថ្មីៗកន្លងមក ។ ទោះជាយ៉ាងណាក្តី អាចារ្យរូបនោះ បានទទួលការធានាឱ្យនៅក្រៅឃុំ ដោយស្ថិតក្នុងលក្ខខណ្ឌត្រូវឡើងតុលាការនៅថ្ងៃទី២ មេសា។
ប៉ូលិសបង្ហើបឱ្យដឹងថា ចំពោះយុវជនដែលរៀបការជាមួយក្មេងស្រីអាយុ១២ឆ្នាំនោះ ជាជនជាតិលីបង់កាន់ទិដ្ឋាការជានិស្សិតនៅអូស្ត្រាលី ។ គេបានជួបក្មេងស្រីជាគូស្នេហ៍នៅខណ្ឌហាន់ទ័រ ភាគខាងជើងក្រុងសីុដនី កាលពីឆ្នាំ២០១៣ និងមានសម្ព័ន្ធភាពផ្លូវភេទជាមួយនាង ។ លើសពីនេះ ពួកគេបានរៀបការតាមសាសនាអ៊ិស្លាម កាលពីថ្ងៃទី១២ មករា ២០១៤ ។ ទោះបីជាការរៀបការជាមួយកុមារជាទំនៀមទំលាប់ដែលបានប្រតិបត្តិនៅតំបន់ភូមិភាគមួយចំនួននៅលើពិភពលោកក៏ដោយ ប៉ុន្តែនៅអូស្ត្រាលី អ្នករៀបការត្រូវមានអាយុលើសពី១៨ឆ្នាំ ។
យុវជនលីបង់រូបនោះ រងការចោទប្រកាន់ថា មានសម្ព័ន្ធផ្លូវភេទជាមួយក្មេងស្រីអាយុពី១០ទៅ១៤ឆ្នាំ ចំនួន២៥នាក់ និងត្រូវប៉ូលិសឃុំខ្លួន ។ ប៉ូលិសនៅមិនទាន់ចោទប្រកាន់អាណាព្យាបាលរបស់ក្មេងស្រីដែលរៀបការនោះនៅឡើយ និងកំពុងស្ថិតក្រោមការស៊ើបអង្កេត ។
ដោយឡែកតាមប្រព័ន្ធវេបសាយដេលីតេឡេក្រាហ្វ បានផ្សាយថា ឪពុករបស់ក្មេងស្រីដែលប្តូរទៅកាន់សាសនាអ៊ិស្លាមនិយាយថា ខ្លួនមិនពេញចិត្តឱ្យកូនស្រីរៀបការទេ ប៉ុន្តែត្រូវបង្ខំចិត្តអនុញ្ញាតឱ្យអាចារ្យរៀបចំពិធីនោះនៅឯផ្ទះរបស់ខ្លួនក្នុងខណ្ឌហាន់ទ័រ កាលពីខែមករា ព្រោះបារម្ភខ្លាចកូនពិបាកចិត្ត បើមិនបានរស់នៅជាមួយគូស្នេហ៍ ៕
ចែករំលែកព័តមាននេះ