រាជធានីភ្នំពេញ​៖ សម្តេចអគ្គមហាពញាចក្រី ​ហេង សំរិន ​ប្រធានរដ្ឋសភា​នៃព្រះរាជាណាចក្រកម្ពុជា​ នៅម៉ោង៤រសៀល​ថ្ងៃទី០២​ មីនា​ ២០១៤ ​​នឹងដឹកនំា​គណៈប្រតិភូជាន់ខ្ពស់​រដ្ឋសភា​អញ្ជើញទៅបំពេញ​ទស្សនកិច្ច​​ផ្លូវការ​​ និងជាមិត្តិភាព នៅព្រះរាជាណាចក្រម៉ារ៉ុក ​និង ​សាធារណរដ្ឋកូដឌីវ័រ ។

យោងតាមសេចក្តី​ប្រកាសព័ត៌មាន​របស់អគ្គលេខាធិការដ្ឋាន​រដ្ឋសភាបានឲ្យដឹងថា​ គោលបំណងសំខាន់​នៃដំណើរទស្សនកិច្ច​របស់សម្តេចប្រធានរដ្ឋសភា​ ហេង សំរិន ​ពីថ្ងៃទី០២ដល់ថ្ងៃទី​១០ មីនា​ ២០១៤នេះ គឺដើម្បីពង្រឹង​និងពង្រីកចំណងមិត្តភាព​ និង កិច្ចសហប្រតិបត្តិការ​រវាងរដ្ឋសភា​នៃព្រះរាជាណាចក្រកម្ពុជា​ -ម៉ារ៉ុក និង​ រដ្ឋសភានៃ​ព្រះរាជាណាចក្រកម្ពុជា​-កូដឌីវ័រ ​ឲ្យកាន់តែល្អប្រសើរ​ឡើងថែមទៀត ។

សេចក្តីប្រកាស​ដដែលបានបញ្ជាក់បន្ថែមទៀតថា​ នៅក្នុងអំឡុងពេល​បំពេញទស្សនកិច្ច​ជាផ្លូវការ​និងជាមិត្តភាពនៅក្នុង​ប្រទេសម៉ារ៉ុក ​និង កូដឌីវ័រ​ គណៈប្រតិភូជាន់ខ្ពស់​រដ្ឋសភាកម្ពុជា​នឹងជួបសវនាការ ​និង​ពិភាក្សា​ការងារ​ជាមួយថ្នាក់ដឹកនំា​ជាន់ខ្ពស់នៃប្រទេស​ទំាងពីរ ​ជាអាទិ៍៖ ប្រធានាធិបតី​ ប្រធានរដ្ឋសភា ​នាយករដ្ឋមន្រ្តី ​និង រដ្ឋមន្រ្តីសំខាន់ៗ​មួយចំនួនទៀត ៕