រាជធានីភ្នំពេញ ៖ យោងតាម​សេចក្តីប្រកាសព័ត៌​មាន​របស់គណៈកម្មាធិការ​ជាតិរៀបចំការ​បោះ​ឆ្នោត(គ.ជបន)ដែលបាន​ចេញ​ផ្សាយ​កាល​ពីថ្ងៃ​ទី១ មីនា ២០១៤ បានឱ្យ​ដឹង​ថា គណ​បក្សប្រជា​ជន​កម្ពុជា (CPP) ដាក់​បេក្ខភាពឈរ​បោះឆ្នោត​ជ្រើសរើស​ក្រុម​ប្រឹក្សា រាជ​ធានី-ខេត្ត-ក្រុង-ស្រុក-ខណ្ឌ អាណត្តិទី២ ច្រើនជាង​គេ ក្នុងរយៈពីរថ្ងៃដំបូង​ដែលគណៈ​កម្មាធិការ​ជាតិរៀបចំ​ការបោះឆ្នោត​ចាប់ផ្តើម​ទទួល​ពាក្យ ។

នៅ​ថ្ងៃទី២៧ និង​២៨ កុម្ភៈ គណ​បក្ស៣ ដែលចុះឈ្មោះប្រកួត​ប្រជែងការបោះឆ្នោត​ជ្រើសរើសក្រុមប្រឹក្សា​រាជធានីខេត្ត-ក្រុង-ស្រុក ខណ្ឌ គឺគណ​បក្សប្រជាជនកម្ពុជាដា​ក់បេក្ខភាពរបស់ខ្លួន​បានច្រើនជាង​គេ ។ គណបក្សប្រជាជនកម្ពុជាដាក់បេក្ខភាព​របស់ខ្លួនបាន​ចំនួន​២៣​មណ្ឌលរាជធានី​-ខេត្ត និង​១៨៨ មណ្ឌល-ក្រុង-ស្រុក-ខណ្ឌ គណ​បក្សសង្គ្រោះ​ជាតិ​ដាក់បាន៨មណ្ឌល រាជធានី-ខេត្ត និង ៦២​មណ្ឌល​ក្រុង-ស្រុក-ខណ្ឌ ចំណែកគណបក្សហ្វុ៊នស៊ិនប៉ិច ដាក់បាន​១មណ្ឌលក្រុង-ស្រុក-ខណ្ឌ។

គណៈកម្មាធិការជាតិរៀបចំការ​បោះឆ្នោត​ចាប់ផ្តើមចុះ​ឈ្មោះគណបក្ស​នយោបាយ និង​បេក្ខជនឈរឈ្មោះ​ពីថ្ងៃទី២៧ ​កុម្ភៈ ដល់ថ្ងៃ​ទី​៣ ​មីនា ២០១៤។
គួររំលឹកថាគណៈកម្មាធិការជាតិរៀបចំការបោះឆ្នោតកាលពីថ្ងៃទី១៧ មករា ឆ្នាំ២០១៤ បានចេញផ្សាយនូវចំនួនសមាជិកក្រុមប្រឹក្សារាជធានី ខេត្ត និងចំនួនសមាជិកក្រុង ស្រុក ខណ្ឌ សម្រាប់អាណត្តិទី២ ដែលនឹងត្រូវរៀបការបោះឆ្នោតនៅថ្ងៃទី១៨ ឧសភា ឆ្នាំ២០១៤ខាងមុខ។គជបបានបញ្ជាក់ថា យោងតាមអនុក្រិតស្តីពីការកំណត់ចំនួនសមាជិកក្រុមប្រឹក្សារាជធានី ខេត្ត និងចំនួនសមាជិកក្រុង ស្រុក ខណ្ឌ សម្រាប់អាណត្តិទី២លេខ២២អនក្រ.បកចុះថ្ងៃទី១៥ មករា ឆ្នាំ២០១៤សមាជិកក្រុមប្រឹក្សាសរុបមានចំនួន៣.៣២៤នាក់។
    គ.ជ.បបានបន្តថា ក្នុងចំណោមចំនួនសមាជិកក្រុមប្រឹក្សាទាំងអស់ខាងលើនេះចំនួនក្រុមប្រឹក្សារាជធានីភ្នំពេញ ក្រុមប្រឹក្សាខេត្តសរុបចំនួន៣៩៣នាក់ និងចំនួនសមាជិកក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ សរុបមានចំនួន២.៩២១នាក់។រាជធានី ខេត្ត ដែលមានចំនួនសមាជិកក្រុមប្រឹក្សាចំនួន២១រូប គឺរាជធានីភ្នំពេញ ខេត្តកណ្តាល និងខេត្តកំពង់ចាម។ខេត្តមានចំនួនសមាជិកក្រុមប្រឹក្សាចំនួន១៩រូបគឺខេត្តបាត់ដំបង ខេត្តព្រៃវែង ខេត្តសៀមរាម ខេត្តតាកែវនិងខេត្តត្បូងឃ្មុំ។