លោក ស៊ូថេប ធឿកស៊ូបាន់ មេដឹកនាំក្រុមអ្នកតវា៉ប្រឆាំងនាយករដ្ឋមន្ត្រីថៃ បានគំរាមក្រុមអាវក្រហមថា ប្រសិនបើពួកគេនាំគ្នាចូលក្រុងបាងកកនោះ ពួកយើងនឹងបង្ក្រាបពួកគេក្នុងនាមជាពួកអ្នកក្បត់ជាតិ ។ ការគំរាមខាងលើកើតឡើងបន្ទាប់ពីក្រុមអាវក្រហមប្រកាសថា នឹងកាន់អាវុធប្រមូលកម្លាំងទៅធ្វើសង្គ្រាមនៅកណ្តាលក្រុងបាងកក ជាមួយពួកបាតុកររបស់លោក ស៊ូថេប និងមានគម្រោងបែងចែកប្រទេស ។
កាសែតថៃកាលពីថ្ងៃទី២៨ កុម្ភៈ ផ្សាយដោយយោងតាមសម្តីរបស់លោក ស៊ូថេប នៅឯវេទិកាពួកបាតុករ «បា៉ធុមវា៉ន់» ថា «ប្រសិនបើក្រុមអាវក្រហមនាំកម្លាំងប្រដាប់អាវុធចូលក្រុងបាងកកនោះ ពួកគេនឹងទទួលការបង្ក្រាបជាក់ជាមិនខាន ព្រោះពួកគេប្រកាសថា នឹងពុះចែកប្រទេសដែលចាត់ទុកជាអំពើក្បត់នឹងរដ្ឋធម្មនុញ្ញ ។ ពួកយើងត្រូវរង់ចាំពិនិត្យមើលថា តើពួកគេមានប៉ុន្មាននាក់។
កាសែតខាងលើបន្តទៀតថា កាលពីវេលារំលងអធ្រាត្រ ថ្ងៃទី២៨ កុម្ភៈ មានជនមិនស្គាល់មុខបានគប់គ្រាប់បែកចូលផ្ទះរបស់លោក ណាត់ថាពុល ធីបសុវណ្ណ ប៉ុន្តែសំណាងល្អដែលគ្រាប់មិនផ្ទុះ និងគ្មាននរណាម្នាក់រងរបួស ។ លោក ណាត់ថាពុល ធីបសុវណ្ណ ជាអតីតតំណាងរាស្ត្រក្នុងគណបក្សប្រជាធិបតេយ្យ និងជាមេដឹកនាំក្រុមអ្នកតវា៉ម្នាក់ រួចហេតុការណ៍នេះកំពុងស្ថិតក្រោមការសើុបអង្កេតរបស់ប៉ូលិស ។
ការធ្វើបាតុកម្មបណ្តេញលោកស្រី យីងឡាក់ សីុណាវា៉ត្រា នាយករដ្ឋមន្ត្រីចាំផ្ទះ និងជារដ្ឋមន្ត្រីក្រសួងការពារជាតិថៃ ដែលបានអូសបន្លាយពេលដ៏យូររបស់ក្រុមអ្នកតវា៉ដឹកនាំដោយលោក ស៊ូថេប ធឿកស៊ូបាន់ នោះ បានបង្កឱ្យស្ថានការណ៍នយោបាយថៃ មានភាពរង្គោះរង្គើរ និងធ្វើឱ្យសេដ្ឋកិច្ចប្រទេសធ្លាក់ចុះ ។ លើសពីនេះទៀតក៏បង្កអសន្តិសុខនៅក្នុងទីក្រុង និងមានហេតុការណ៍ផ្ទុះញឹកញាប់ ដែលអាចនាំប្រទេសទៅរកភាពកលយុគ រួមទាំងបង្កើតការមិនពេញចិត្តដល់ប្រជាពលរដ្ឋនៅទូទាំងប្រទេសផងដែរ ។
ចំណែកលោក ស៊ុមឆៃ ត្រៃថាវ៉ន មេដឹកនាំក្រុមកសិករក្នុងស្រុកបាងត្រៃ បាននាំក្បួនក្រុមកសិករចំនួន១៦ស្រុក មានប្រហែល៥០០នាក់ ធ្វើដំណើរទៅខាងមុខសាលាខេត្តព្រះនគរស្រីអាយុធ្យា ដើម្បីផ្តល់កម្លាំងចិត្តដល់រដ្ឋាភិបាលលោកស្រី យីងឡាក់ និងបានអំពាវនាវឱ្យក្រុមបាតុករប្រឆាំងនឹងរដ្ឋាភិបាល ត្រូវបញ្ឈប់ការធ្វើសកម្មភាព និងផ្តល់ភាពស្ងប់ស្ងាត់នៅក្នុងប្រទេស ។ លើសពីនេះក្រុមកសិករខាងលើក៏បានយករូបទីងមោងរបស់លោក សូ៊ថេប ទៅដុតនៅមុខសាលាខេត្ត ជានិម្មិតរូបនៃការអំពាវនាវ ធ្វើឱ្យមានភាពស្ងប់ស្ងាត់ក្នុងប្រទេសវិញដែរ ៕
ចែករំលែកព័តមាននេះ