ប្រទេសឥណ្ឌូណេស៊ី ៖ ការបះបោរបានផ្ទុះកាលពីថ្ងៃទី១៩សីហា ក្នុងខេត្តប៉ាពូអាស៊ី របស់ឥណ្ឌូណេស៊ី ហើយសភាតំបន់ត្រូវគេដុតបំផ្លាញ ខណៈបាតុករច្រើនពាន់នាក់បានតវ៉ាប្រឆាំងការចាប់ខ្លួនបណ្ដានិស្សិតស្និទ្ធឯករាជ្យភាព។
ពួកបាតុករបានលើកគ្នាអុកឡុកនៅតាមដងវិថីនានានៃទីក្រុងMANOKWARI ទីប្រជុំជនតំបន់ខាងលិចនៃប៉ាពូអាស៊ី ដែលមានប្រជាជនប្រមាណជា១៣០.០០០នាក់ ហើយសភាតំបន់ត្រូវដុតបំផ្លាញ។ ពួកអ្នកបះបោរក៏បានដើរដុតហាងទំនិញនានាព្រមទាំងបណ្ដារថយន្ត បំផ្លាញភ្លើងស្តុបនិងគប់ដុំថ្មលើអគារផ្លូវការទាំងឡាយ។ ពួកបាតុករមានសរុបច្រើនពាន់នាក់។
រដ្ឋមន្ត្រីទទួលបន្ទុកសន្តិសុខឥណ្ឌូណេសីុ លោកWIRANTO បានអំពាវនាវឲ្យមានភាពស្ងប់ស្ងាត់និងប្រកាសពីការស៊ើបអង្កេតមួយ លើបណ្ដាព្រឹត្តិការណ៍ ជាប្រភពនៃការបះបោរនោះនៅទីក្រុងMANOKWARI ដែលក៏បង្កឲ្យមានចលាចលក្នុងទីក្រុងជាច្រើនទៀតនៃខេត្តបា៉ពូអាស៊ីនាថ្ងៃទី១៩សីហានោះដែរ។ លោកគូសបញ្ជាក់ថាបែបនេះពិតជានាំឲ្យមានការប៉ះពាល់ដល់ឯកភាពជាតិ។
ការបះបោរនោះជាសញ្ញាចុងក្រោយនៃអំពើហិង្សា ក្នុងតំបន់មួយរបស់ឥណ្ឌូណេស៊ី ដែលមានឧទ្ទាមកម្ម ទាមទារឯករាជ្យប្រឆាំងរដ្ឋាភិបាលឥណ្ឌូណេស៊ី។ ក្នុងពេលបះបោរប៉ូលិស៣នាក់រងរបួសនៅក្រុងMANOKWARI ដោយសារការគប់ដុំថ្ម។ ពុំមានព័ត៌មានច្បាស់ពីចំនួនពួកបាតុករដែលរងរបួសឡើយ។
ការបះបោរផ្ទុះឡើងដោយសារព័ត៌មាននានា ពីការចាប់ខ្លួននិស្សិតប៉ាពូអាស៊ី៤៣នាក់កាលពីថ្ងៃទី១៧សីហា ក្រោយការបាញ់ឧស្ម័នបង្ហូរទឹកភ្នែកនៅក្រុងស៊ូរ៉ាបាយ៉ាជាទីក្រុងធំទី២របស់ប្រទេស ក្នុងឱកាសនៃបាតុកម្មមួយធ្វើឡើងជួនពេលគ្នាជាមួយបុណ្យឯករាជ្យរបស់ប្រទេស។
យោងតាមពួកសកម្មជនប៉ាពូអាស៊ី និងបណ្ដាសារព័ត៌មានក្នុងស្រុកថា ប៉ូលិសបានលុកចូលឆែកឆេរកន្លែងស្នាក់របស់ពួកនិស្សិតដើម្បីចាប់ពួកនិស្សិតដែលរងការចោទប្រកាន់ថា បំផ្លាញទង់ជាតិឥណ្ឌូណេស៊ី។ ប៉ូលិសអះអាងថាបានចាប់ខ្លួនពួកនិស្សិតក្នុងរយៈពេលខ្លីមួយសួរចម្លើយពួកគេ បន្ទាប់មកក៏ដោះលែងវិញ។ បន្ទាប់ពីនេះមានផ្ទុះបាតុកម្មនានា ប្រឆាំងពួកនិស្សិតទាំងនេះ ជាមួយការស្រែកពាក្យប្រមាថនានា បែបប្រកាន់ពូជសាសន៍ប្រឆាំងពួកប៉ាពូ។
ជាខេត្តក្រីក្រមួយក្នុងចំណោមខេត្តក្រីក្រទាំងឡាយរបស់ឥណ្ឌូណេស៊ី ប៉ាពូអាស៊ីជាទីលាននៃព្រឹត្តិការណ៍ហិង្សាជាច្រើនចាប់តាំងពីឆ្នាំមុនមក។ កាលពីខែធ្នូកម្មករឥណ្ឌូណេស៊ីយ៉ាងតិច១៦នាក់ ដែលធ្វើការឲ្យក្រុមហ៊ុនរដ្ឋមួយបានត្រូវពួកឧទ្ទាមបំបែកខ្លួននិយមសម្លាប់៕ (កែសម្រួលដោយ ៖ បុប្ផា)
ចែករំលែកព័តមាននេះ