អន្តរជាតិ ៖ តម្លៃប្រេងឆៅអន្តរជាតិបានហក់ឡើងប្រហែល ៣% នៅថ្ងៃទី២០ ខែកក្កដា ឆ្នាំ២០២៦ ដោយប្រេងឆៅ Brent ស្តង់ដាអន្តរជាតិបានទម្លុះតម្លៃ ៩០ ដុល្លារអាមេរិកក្នុង១បារ៉ែលសាជាថ្មី ខណៈដែលជម្លោះកាន់តែតានតឹងរវាងសហរដ្ឋអាមេរិក និងអ៊ីរ៉ង់នៅមជ្ឈិមបូព៌ា បានរឹតបន្តឹងការដឹកជញ្ជូនប្រេងតាមច្រកសមុទ្រហ័រមូស (Hormuz)។ នេះបើតាមប្រភពពី Reuters បានចេញផ្សាយ។
ប្រេងឆៅ Brent បានកើនឡើង ២.៧៧ ដុល្លារ ឬ ៣,១៤% ដល់ ៩០,៨៧ ដុល្លារត្រឹមម៉ោង ១ និង ១៥ នាទីរសៀល (ម៉ោងនៅកម្ពុជា) ដែលជាកម្រិតខ្ពស់បំផុតមិនធ្លាប់មាន គិតចាប់តាំងពីថ្ងៃទី១១ ខែមិថុនា ឆ្នាំ២០២៦ បន្ទាប់ពីបានបន្តកើនឡើង ១៥,៩% កាលពីសប្តាហ៍មុន ដែលជាការកើនឡើងប្រចាំសប្តាហ៍ខ្ពស់បំផុត ចាប់តាំងពីខែមេសា។ រីឯប្រេងឆៅ West Texas Intermediate (WTI) របស់សហរដ្ឋអាមេរិក មានតម្លៃ ៨៤,៨៤ ដុល្លារក្នុង១បារ៉ែល កើនឡើង ២,៣៥ ដុល្លារ ឬ ២,៨ % ដែលជាកម្រិតខ្ពស់បំផុត ចាប់តាំងពីថ្ងៃទី១២ ខែមិថុនា។
កងទ័ពសហរដ្ឋអាមេរិកបានចាប់ផ្តើមការវាយប្រហារថ្ងៃទី៩ជាប់គ្នាទៅលើប្រទេសអ៊ីរ៉ង់ ដែលជាការឆ្លើយតបវិញ អ៊ីរ៉ង់ក៏បានវាយប្រហារលើមូលដ្ឋានទ័ពរបស់អាមេរិកនានានៅទូទាំងតំបន់ផងដែរ។ ជាមួយគ្នានោះដែរ របាយការណ៍បានឱ្យដឹងថាមានតែកប៉ាល់មួយចំនួនតូចប៉ុណ្ណោះបានឆ្លងកាត់ច្រកសមុទ្រហ័រមូស កាលពីថ្ងៃអាទិត្យ ហើយក៏មានសេចក្តីរាយការណ៍អំពីកប៉ាល់ផ្ទុះឆេះផងដែរ។
កងឆ្មាំបដិវត្តន៍អ៊ិស្លាមអ៊ីរ៉ង់ (IRGC) នៅថ្ងៃទី២០ ខែកក្កដា បានថ្លែងថា កប៉ាល់ដឹកប្រេងចំនួន២គ្រឿងបានផ្ទុះមិនអាចដំណើរការបាន បន្ទាប់ពីព្យាយាមឆ្លងកាត់ផ្លូវដែលខ្លួនហៅថា ផ្លូវភាគខាងត្បូងដ៏គ្រោះថ្នាក់ ឆ្លងកាត់ច្រកសមុទ្រហ័រមូស ដោយបានចោទប្រកាន់កប៉ាល់ទាំងនោះថា ត្រូវបានជំរុញដោយយោធាសហរដ្ឋអាមេរិកឱ្យប្រើប្រាស់ផ្លូវឆ្លងកាត់នោះ។
នៅក្នុងរយៈពេលប៉ុន្មានថ្ងៃថ្មីៗនេះ ភាគីទាំងសងខាងបានកំណត់គោលដៅលើចរាចរណ៍កប៉ាល់ដឹកជញ្ជូន ដោយអាមេរិកបានប្រកាសថា កំពុងតែអនុវត្តការបិទផ្លូវទឹកលើកំពង់ផែអ៊ីរ៉ង់ ហើយអ៊ីរ៉ង់ក៏បានប្រកាសដែរថា ខ្លួនកំណត់គោលដៅលើកប៉ាល់ណាដែលបំពានច្បាប់របស់ខ្លួនក្នុងការធ្វើនាវាចរណ៍តាមច្រកសមុទ្រហ័រមូស។
បើតាមទិន្នន័យពីក្រុមហ៊ុនទីផ្សារហិរញ្ញវត្ថុ LSEG បានបង្ហាញថា កប៉ាល់ចំនួន៤គ្រឿងបានឆ្លងកាត់ច្រកសមុទ្រហ័រមូល កាលពីថ្ងៃអាទិត្យ ដែលថយចុះពីចំនួន៨គ្រឿង កាលពីថ្ងៃមុន។ ទិន្នន័យដដែលបានបង្ហាញទៀតថា យ៉ាងហោចណាស់កប៉ាល់ដឹកប្រេងចំនួន៣គ្រឿង និងកប៉ាល់ដឹកប្រេងខ្នាតយក្សចំនួន១គ្រឿង បានចូលទៅក្នុងច្រកសមុទ្រនេះ ចាប់តាំងពីថ្ងៃសុក្រ៕
ចែករំលែកព័តមាននេះ