បានកាន់ជញ្ជីងថ្លឹងឡាន ដូចបានម៉ាស៊ីនបោះពុម្ពលុយ លើសក៏អស់លុយ មិនលើសក៏អស់លុយថ្លៃបាយទឹក
- ព្រៃវែង
ខេត្តព្រៃវែង ៖ ស្ថានីយជញ្ជីងថ្លឹងរថយន្តជាច្រើនកន្លែងនៅតាមបណ្តោយផ្លូវជាតិលេខ ១ និងលេខ ៨ នៃទឹកដីខេត្តព្រៃវែង-ខេត្តកណ្តាល បានរងនូវការរិះគន់ថា ជាស្ថានីយជញ្ជីងថ្លឹងយកលុយចែកគ្នាប្រយោជន៍បុគ្គល ។
ប្រភពព៌តមានពីក្រុម អាជីវកររកស៊ីដឹកទំនិញតាមរថយន្តធុនធំឆ្លងកាត់ផ្លូវជាតិលេខ ១ និងផ្លូវជាតិលេខ ៨ ថ្ងូរដូចព្រាបថា សព្វថ្ងៃឡានរបស់ពួកគាត់ជួបការលំបាករឿងសេដ្ឋកិច្ចលក់ដូរមិនសូវដាច់ទេ ហើយត្រូវបង់លុយថ្លៃបាយទឹកអោយមន្ត្រីជញ្ជីងចល័តឡាន ១គ្រឿងក្នុងមួយជើងគេសុំថ្លៃបាយទឹកចាប់ពី ៧ម៉ឺនរៀល ទៅ ១០ម៉ឺនរៀលជាកំហិត ដោយមិនមានចេញវិក្កយបត្រអោយនោះទេ ហើយបើឡានពួកគាត់ផ្ទុកលើសទម្ងន់វិញ គេតម្រូវអោយបង់លុយពិន័យក្នុង ១តោន ១២ម៉ឺនរៀល បើមិនបង់លុយតាមមន្ត្រីជញ្ជីងចល័តនោះទេ ពួកគេនឹងចាប់ឃាត់រថយន្តទុក ។
ក្រៅពីនោះត្រូវបង់លុយអោយមន្ត្រីជញ្ជីងដែលឈរជើងតាមស្ថានីយ៍ជញ្ជីងផ្លូវជាតិលេខ ១ចាប់ពីខេត្តព្រៃវែងដល់រាជធានីភ្នំពេញមាន ៣កន្លែង ដោយ ១ស្ថានីយគេតម្រូវអោយបង់លុយថ្លៃបាយទឹកឡាន ១គ្រឿងចាប់ពី ៧ម៉ឺនរៀល ទៅ ១០ម៉ឺនរៀល សម្រាប់ ១ជើង ហើយបើលើសទម្ងន់វិញគេតម្រូវអោយបង់លុយផាកពិន័យដូចគ្នាជញ្ជីងចល័តដែរ ។ ផ្លូវជាតិលេខ ៨ មានស្ថានីយជញ្ជីងថ្លឹងរថយន្ត ១កន្លែង ក៏សុំលុយថ្លៃបាយទឹក និងបង់ផាកពិន័យដូចស្ថានីយជញ្ជីងផ្លូវជាតិលេខ១ ដែរ ៕
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព
ចែករំលែកព័តមាននេះ