សហរដ្ឋអាមេរិក ៖ ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) កាលពីថ្ងៃទី២០ ខែកក្កដា ឆ្នាំ២០២៦ (ម៉ោងនៅសហរដ្ឋអាមេរិក) បានសម្រេចដាក់ពន្ធ ៥០% លើទំនិញភាគច្រើនរបស់ប្រទេសកាណាដា ដោយបានប្រកាសថា កាណាដាបានរើសអើងដោយអយុត្តិធម៌លើរថយន្ត គ្រឿងស្រវឹង និងផលិតផលទឹកដោះគោរបស់សហរដ្ឋអាមេរិក។ នេះបើតាមប្រភពពី AP និង Reuters បានចេញផ្សាយនៅថ្ងៃទី២១ ខែកក្កដា ឆ្នាំ២០២៦។
សេតវិមានបានបញ្ជាក់ថា ពន្ធគយទាំងនេះនឹងចាប់ផ្តើមអនុវត្តនៅក្នុងរយៈពេល ៣០ ថ្ងៃទៀត ដែលមានន័យថា នៅមានពេលសម្រាប់កិច្ចចរចា។ ពន្ធថ្មីនេះ នឹងត្រូវអនុវត្តចំពោះផលិតផលទឹកដោះគោ គ្រឿងសង្ហារិម ដងសន្ទូច គ្រាប់ពូជដំណាំ សម្លៀកបំពាក់ និងសក់ពាក់ ព្រមទាំងទំនិញផ្សេងៗទៀតផងដែរ។ ដ្បិតកាណាដា គឺជាប្រទេសមួយក្នុងចំណោមប្រទេសតែពីរគត់ បន្ទាប់ពីប្រទេសចិន ដែលបានចាត់វិធានការសងសឹកប្រឆាំងនឹងការដំឡើងពន្ធរបស់លោក ត្រាំ កាលពីឆ្នាំមុន។
ការដំឡើងពន្ធ ៥០% ថ្មីនេះ នឹងមិនរាប់បញ្ចូលផលិតផលថាមពល រ៉ែប៉ូតាស្យូម ត្រី និងរ៉ែសំខាន់ៗនោះទេ ប៉ុន្តែរាប់បញ្ចូលទាំងទំនិញដែលធ្លាប់ត្រូវបានការពារពីមុនមកពីការជាប់ពន្ធនាំចូល ដោយកិច្ចព្រមព្រៀងសហរដ្ឋអាមេរិក-ម៉ិកស៊ិក-កាណាដា (USMCA) កិច្ចព្រមព្រៀងពាណិជ្ជកម្មឆ្នាំ២០២០នោះ មិនត្រូវបានសហរដ្ឋអាមេរិកបន្តសុពលភាពឡើងវិញទេ ដែលវាបានជំរុញឱ្យមានការចរចាជាថ្មីដែលអាចអូសបន្លាយពេលរហូតដល់ឆ្នាំ ២០៣៦។
តាមរយៈវិធានការនេះ អាចបង្កឱ្យភាពវឹកវរផ្នែកសេដ្ឋកិច្ចសាជាថ្មី ព្រមទាំងហានិភ័យនៃអតិផរណាកាន់តែខ្ពស់ និងការរង្គោះរង្គើបន្ថែមទៀតដល់ទំនាក់ទំនងវាងប្រទេសទាំងពីរ ដែលធ្លាប់តែមានភាពជិតស្និទ្ធនឹងគ្នាយ៉ាងខ្លាំង មុនពេលលោក ត្រាំ ត្រឡប់មកកាន់សេតវិមានវិញ។
នៅក្នុងការសម្រេចចិត្តដាក់ពន្ធនាំចូលលើទំនិញជាច្រើនប្រភេទលើកាណាដា រាប់ចាប់តាំងពីស្រាទំពាំងបាយជូរ រហូតដល់ស៊ីម៉ង់ត៍ និងឧបករណ៍កីឡាហុកគីលើទឹកកកបែបនេះ លោក ត្រាំ បានយកមកអនុវត្តនូវមាត្រា ៣៣៨ នៃច្បាប់ស្តីពីពន្ធគយឆ្នាំ ១៩៣០ ដែលអនុញ្ញាតឱ្យប្រធានាធិបតីអាចកំណត់ពន្ធពិន័យរហូតដល់ ៥០% ប្រឆាំងនឹងដៃគូពាណិជ្ជកម្មទាំងឡាយណា ដែលត្រូវបានចាត់ទុកថាមានការរើសអើងចំពោះទំនិញរបស់សហរដ្ឋអាមេរិក។ ការដំឡើងពន្ធថ្មីៗនេះ បានកត់សម្គាល់នូវការប្រើប្រាស់ច្បាប់នេះជាលើកដំបូងបង្អស់ បន្ទាប់ពីច្បាប់នេះបានបង្កើតឡើងអស់រយៈពេលជិត១សតវត្សមកហើយ៕
ចែករំលែកព័តមាននេះ