ទីក្រុងកៀវ៖ យោធារុស្ស៊ីវាយប្រហារយ៉ាងខ្លាំងក្លាទៅលើទីក្រុងកៀវ និងទីក្រុងតូចធំដទៃទៀតរបស់អ៊ុយក្រែនដោយប្រើប្រាស់មីស៊ីលផ្លោងផង ដ្រូនផង និងគ្រាប់បែកបំពាក់ប្រព័ន្ធនាំផ្លូវផងកាលពីយប់មិញបណ្ដាលឱ្យស្លាប់មនុស្សយ៉ាងតិច៦នាក់ និងរបួសរាប់សិបនាក់។ នេះបើយោងតាមការបង្ហើបឱ្យដឹងពីអាជ្ញាធរអ៊ុយក្រែន។ បើដូច្នេះមែន វាជាការឆ្លុះបញ្ចាំងឱ្យឃើញថាអ៊ុយក្រែនមានប្រព័ន្ធការពារដែនអាកាសម៉ាកផេទ្រាតដែលជាជំនួយរបស់អាមេរិកកាន់តែតិចទៅៗ ហើយមិនអាចទប់ទល់នឹងការវាយប្រហាររបស់រុស្ស៊ីប្រកបដោយប្រសិទ្ធភាពដូចកាលពីមុនទេ។ ប៉ុន្មានអាទិត្យចុងក្រោយនេះ រុស្ស៊ីសម្រុកវាយប្រហារដោយមីស៊ីលកាន់តែខ្លាំងឡើងៗដើម្បីបង្អន់ល្បឿនមិនឱ្យអ៊ុយក្រែនវាយប្រហារខ្លាំងពេកទៅលើទីតាំងស្តុកទុកប្រេងរបស់ខ្លួនដែលស្ថិតនៅឆ្ងាយៗក្នុងទឹកដីរុស្ស៊ី និងដែលធ្វើឱ្យរុស្ស៊ីផ្គត់ផ្គង់ប្រេងមិនទាន់សភាពការណ៍សម្រាប់យោធា និងស៊ីវិល។
លោកដូណាល់ត្រាំទើបតែប្រកាសនៅក្នុងកិច្ចប្រជុំកំពូលណាតូនៅតួកគីថាអាមេរិកនឹងផ្ដល់សិទ្ធិឱ្យអ៊ុយក្រែនផលិតមីស៊ីលម៉ាកផេទ្រាតនៅលើទឹកដីអ៊ុយក្រែនផ្ទាល់តែម្ដង។ ដូច្នេះ វិស័យការពារដែនអាកាសរបស់អ៊ុយក្រែនអាចនឹងបានប្រសើរជាងនេះ។ ប៉ុន្តែសេចក្ដីលម្អិត និងពេលវេលានៃការប្រគល់សិទ្ធិនេះនៅតែមិនទាន់ច្បាស់នៅឡើយទេ។ ទម្រាំអ៊ុយក្រែនអាចផលិតមីស៊ីលនេះនៅក្នុងទ្រង់ទ្រាយធំបានប្រហែលជាត្រូវការពេលវេលាជាច្រើនឆ្នាំទៅមុខទៀត។ ការវាយប្រហាររបស់រុស្ស៊ីថ្មីបំផុតទៅលើទីក្រុងកៀវចាប់ផ្ដើមនៅវេលាម៉ោង១:៣០រំលងអធ្រាត្រ និងអូសបន្លាយពេលរហូតដល់៧ម៉ោងទម្រាំបញ្ចប់ទៅវិញ។ នៅអំឡុងពេលនោះ គេស្ដាប់ឮសំឡេងផ្ទុះគ្រាប់កាំភ្លើងពាសពេញរដ្ឋធានីកៀវ។
រុស្ស៊ីបញ្ជូនមីស៊ីល៤១គ្រាប់ និងដ្រូន១២៥គ្រឿងទៅវាយប្រហារអ៊ុយក្រែន។ នេះបើយោងតាមកងទ័ពអាកាសអ៊ុយក្រែន។ លោកហ្សេឡិនស្គីបញ្ជាក់បន្ថែមថាមីស៊ីលភាគច្រើនបាញ់សំដៅទៅរដ្ឋធានីកៀវ។ ក្រោយមក រុស្ស៊ីវាយប្រហារទីតាំងប្រៃសណីយ៍ក្បែរទីក្រុងខាគីវ បណ្ដាលឱ្យស្លាប់មនុស្ស៣នាក់ និងរបួសយ៉ាងតិច២០នាក់។ គ្រាប់បែករបស់រុស្ស៊ីវាយប្រហារទីក្រុងខឺសុន និងស៊ូមី។ ទីតាំងនីមួយៗស្លាប់មនុស្សយ៉ាងហោចណាស់ម្នាក់។ ការវាយប្រហារទីក្រុងកៀវបង្កជាអគ្គិភ័យឆេះសង្កាត់ចំនួន៥ ខូចខាតអគារស្នាក់នៅរបស់ប្រជាជន ខូចខាតកន្លែងធ្វើការ ទីតាំងឧស្សាហកម្ម កន្លែងស្នាក់នៅរបស់និស្សិត និងរថយន្តជាច្រើនគ្រឿង។ នេះបើយោងតាមទីភ្នាក់ងារសង្គ្រោះបន្ទាន់របស់អ៊ុយក្រែន។
មិនមែនតែអ៊ុយក្រែនទេដែលរងការវាយប្រហារ។ អ៊ុយក្រែនក៏វាយប្រហាររុស្ស៊ីផងដែរ។ អ៊ុយក្រែនវាយប្រហារនាវាដឹកប្រេង២គ្រឿងរបស់រុស្ស៊ីនៅសមុទ្រខ្មៅ និងធ្វើឱ្យរអាក់រអួលការផ្ទេរប្រេង។ ការវាយប្រហារនាវា ASIA និង NISSOS នៅកំពង់ផែណូវ៉ូរ៉ូសស៊ី (Novorossiysk) បង្កជាអគ្គិភ័យនៅលើកប៉ាល់ ASIA។ ក្រុមហ៊ុនដែលជាម្ចាស់នាវានេះមិនបានប្រកាសថានេះជាស្នាដៃរបស់អ្នកណាទេ។ ប៉ុន្តែសំណាងល្អ ការវាយប្រហារនោះមិនបានបណ្ដាលឱ្យរបួស ឬស្លាប់នរណាម្នាក់ឡើយ ហើយក៏មិនបានធ្វើ្ឱ្យហៀរប្រេងស្រក់រឡិករឡាក់នោះដែរ។ កប៉ាល់ដឹកប្រេងដែលដោតទង់ជាតិប្រទេសលីបេរីយ៉ា និងកោះម៉ាសលនោះនៅតែអាចបើកបរបាននៅលើផ្ទៃសមុទ្រជាធម្មតា៕ ប្រភព៖ AP
ចែករំលែកព័តមាននេះ