រដ្ឋបាលស្រុកព្រៃនប់ បើកយុទ្ធនាការផ្សព្វផ្សាយ និងចុះដាក់ថ្នាំអាប៊ែតតាមខ្នងផ្ទះ ដើម្បីទប់ស្កាត់ជំងឺគ្រុនឈា.ម
- ព្រះសីហនុ
ខេត្តព្រះសីហនុ ៖ «គ្មានដង្កូវទឹក គ្មានមូសខ្លា គ្មានជំងឺគ្រុនឈាម» រដ្ឋបាលស្រុកព្រៃនប់ នៅព្រឹកថ្ងៃទី២០ ខែកក្កដាឆ្នាំ២០២៦ បានរៀបចំយុទ្ធនាការផ្សព្វផ្សាយស្តីពី «ការការពារជំងឺគ្រុនឈាម គ្រុនឈីក និងការដាក់ថ្នាំអាប៊ែត» ក្នុងគោលបំណងលើកកម្ពស់ការយល់ដឹង និងជំរុញការចូលរួមទប់ស្កាត់ការរីករាលដាលនៃជំងឺដែលបង្កឡើងដោយមូសខ្លា ជូនដល់បងប្អូនប្រជាពលរដ្ឋ និងសិស្សានុសិស្សក្នុងមូលដ្ឋាន។
បន្ទាប់ពីកិច្ចប្រជុំផ្សព្វផ្សាយ និងបើកយុទ្ធនាការជាផ្លូវការ ថ្នាក់ដឹកនាំរដ្ឋបាលស្រុក ព្រមទាំងក្រុមការងារ បានចុះផ្ទាល់តាមខ្នងផ្ទះរបស់បងប្អូនប្រជាពលរដ្ឋនៅក្នុងមូលដ្ឋាន ដើម្បីដើរដាក់ថ្នាំអាប៊ែត (Abate) ក្នុងពាងទឹក អាងទឹក និងសម្ភារស្តុកទឹកនានា សំដៅសម្លាប់ និងទប់ស្កាត់ការកកើតដង្កូវទឹកភ្លាមៗ។
ព្រមជាមួយគ្នានោះ ក្រុមការងារក៏បានណែនាំបងប្អូនប្រជាពលរដ្ឋពីរបៀបប្រើប្រាស់ថ្នាំអាប៊ែតឱ្យត្រឹមត្រូវតាមបច្ចេកទេស និងបានជួយពិនិត្យ ណែនាំឱ្យកប់ ឬបំផ្លាញចោលនូវរាល់សម្ភារដក់ទឹកនៅជុំវិញផ្ទះ ដូចជាសំបកកង់ឡាន ជជុះ ដប និងកំប៉ុងចាស់ៗ ដែលជាជម្រកពងកូនរបស់មូសខ្លាផងដែរ។
ក្នុងឱកាសនេះ រដ្ឋបាលស្រុកសូមអំពាវនាវដល់បងប្អូនប្រជាពលរដ្ឋទាំងអស់ មេត្តាបន្តយកចិត្តទុកដាក់ខ្ពស់លើការថែរក្សាអនាម័យបរិស្ថានជុំវិញផ្ទះ និងអនុវត្តវិធានការការពារខ្លួនជាប្រចាំ ៖
១-កម្ចាត់ប្រភពដង្កូវទឹក ដោយការលាងសម្អាត និងផ្លាស់ប្តូរទឹកក្នុងពាង អាងទឹក ឬថូផ្កា ឱ្យបានទៀងទាត់។
២-សហការដាក់ថ្នាំអាប៊ែតក្នុងអាង ឬពាងផ្ទុកទឹកប្រើប្រាស់ឱ្យបានគ្រប់ៗគ្នា។
៣-ជម្រះជម្រកមូសខ្លា ដោយការកប់ ឬបំផ្លាញចោលនូវរាល់សម្ភារដក់ទឹកដែលមិនប្រើប្រាស់។
សូមរួមគ្នាបង្កើតបរិស្ថានរស់នៅស្អាត គ្មានដង្កូវទឹក ដើម្បីសុខភាពគ្រួសារ និងសហគមន៍យើងទាំងមូល! ៕
ចែករំលែកព័តមាននេះ