ប្រទេសម៉ាលីនិងនីហ្សេ ៖ ក្បួនរថយន្តយោធាមួយដែលដឹកកងទាហានម៉ាលី កងទាហានស៊ីឈ្នួលរុស្ស៊ី និងពួកជីវពលស្និទ្ធរដ្ឋាភិបាល វិលត្រឡប់ពីមូលដ្ឋានអានេហ្វីសសំដៅមកកាន់ទីក្រុងហ្គាវជាទីក្រុងសំខាន់មួយនាភាគខាងជើងប្រទេស រងការពួនស្ទាក់វាយប្រហាររបស់ពួកឧទ្ទាម និងពួកជីហាដ បណ្ដាលឲ្យទាហានស្លាប់យ៉ាងតិច៥០នាក់ កាលពីថ្ងៃទី១៨ កក្កដា។
ពួកជីហាដនៃសាខាអាល់កៃដា និងពួកឧទ្ទាមឯករាជ្យនិយមនៃកងកម្លាំងរំដោះអាហ្សាវ៉ាត បានពួនស្ទាក់វាយប្រហារក្បួនរថយន្តនោះ។ យន្តហោះមួយគ្រឿងរបស់កងទ័ពរដ្ឋាភិបាលបានហោះមកដល់ និងទម្លាក់គ្រាប់បែកលើទីតាំងតែដោយសារធាតុអាកាសអាក្រក់ការវាយប្រហារនោះមិនចំគោលដៅ ។
តាមប្រភពព័ត៌មានជាច្រើនថា ក្នុងជួរកងទ័ពរដ្ឋាភិបាលមានអ្នករងគ្រោះជាច្រើន បណ្ដារថយន្តត្រូវភ្លើងឆេះហើយសម្ភារយោធារងការបំផ្លាញ ឬរឹបអូសយកដោយពួកឧទ្ទាម និងពួកជីហាដ។ ក្នុងសេចក្ដីប្រកាសមួយកងទ័ពបានទទួលស្គាល់ពីការពួនស្ទាក់វាយប្រហារនោះនិងថា ការប្រយុទ្ធគ្នាកំពុងបន្ត។ ប្រភពមួយក្នុងផ្ទៃកងទ័ពម៉ាលីនិយាយថា តុល្យការពិតជាធ្ងន់ធ្ងរ មនុស្សយើងមួយចំនួនត្រូវសម្លាប់យ៉ាងសាហាវ ។ ការស៊ើបអង្កេតមួយកំពុងធ្វើ ដើម្បីឲ្យបានដឹង ពីការខុសតាក់ទិកដែលនាំទៅដល់ការបាត់បង់ធ្ងន់ធ្ងរបែបនេះ។
នៅប្រទេសនីហ្សេជាប់ជិតខាងម៉ាលី ទាហាន១៦នាក់បានត្រូវស្លាប់ និង២៣នាក់រងរបួស កាលពីថ្ងៃទី១៧កក្កដា ក្នុងការវាយប្រហារភេរវកម្មមួយ នៅភាគខាងលិចប្រទេស។ នេះជាសេចក្ដីរាយបការណ៍កាលពីថ្ងៃទី១៩កក្កដារបស់ទីភ្នាក់ងារព័ត៌មាននីហ្សេANP ។
នីហ្សេជាប្រទេសធំមួយនៅតំបន់សាហែលអាហ្វ្រិក ចាប់តាំងពី១ទសវត្សមកហើយ ប្រឈមមុខនឹងការវាយ ប្រហារបង្ហូរឈាមរបស់បណ្ដាក្រុមជីហាដជាសាខាអាល់កៃដានិងក្រុមរដ្ឋអ៊ិស្លាម។ ម៉ាលី នីហ្សេនិងបួគីណាហ្វាសូបានរួមគ្នាបង្កើតសម្ព័ន្ធភាពមួយនៅតំបន់សាហែលអាហ្វ្រិក ៕
ចែករំលែកព័តមាននេះ