ទេសចរណ៍អះអាងថា ពិព័រណ៌ផ្លែឈើ១០ថ្ងៃ ស្វាគមន៍ភ្ញៀវជាង៣០ម៉ឺននាក់ ខណៈខាងកសិកម្មថា លក់ផ្លែឈើចម្រុះអស់ជាង៧,៦តោន
- បាត់ដំបង
ខេត្តបាត់ដំបង ៖ យោងតាមរបាយការណ៍បានឱ្យដឹងថា ក្នុងរយៈពេល១០ថ្ងៃនៃ «ពិព័រណ៌ផ្លែឈើបាត់ដំបង» រៀបចំដោយរដ្ឋបាលខេត្តបាត់ដំបង ដែលទើបនឹងបញ្ចប់ទៅកាលពីថ្ងៃទី១៩ កក្កដា កន្លងទៅនេះ មានភ្ញៀវក្នុងស្រុក និងក្រៅស្រុកចូលរួមសរុបជាង៣០ម៉ឺននាក់ ហើយប្រជាកសិករបានលក់ផ្លែឈើចម្រុះអស់ប្រមាណ៧,៦តោន ។ នេះបើតាមការអះអាងរបស់មន្ទីរទេសចរណ៍ និងមន្ទីរកសិកម្ម រុក្ខាប្រមាញ់ និងនេសាទ ។
នៅក្នុងរបាយការណ៍បូកសរុចរបស់មន្ទីរទេសចរណ៍ស្ដីពី «ស្ថានភាព និងស្ថិតិភ្ញៀវទេសចរណ៍ក្នុងព្រឹត្តិការណ៍ផ្លែឈើបាត់ដំំបងឆ្នាំ២០២៦» គិតចាប់ពីថ្ងៃទី១០ ដល់១៩ កក្កដា ដែលជាព្រឹត្តិការណ៍លើកទី២ នៃពិព័រណ៌ផ្លែឈើដ៏ធំសម្រាប់ខេត្តបាត់ដំបង បានទទួលស្វាគមន៍ភ្ញៀវចូលរួមទស្សនាកម្សាន្តទិញផលិតផល ឬទិញផ្លែឈើនានាសរុបជាង៣០នាក់ ។
ដោយឡែក ខាងមន្ទីរកសិកម្មវិញបានអះអាងថា ផ្លែឈើចម្រុះប្រមាណជាង៧,៦តោន ត្រូវបានលក់អស់នៅក្នុងព្រឹត្តិការណ៍ពិព័រណ៌ផ្លែឈើរយៈពេល១០ថ្ងៃនេះ ។
មន្ទីរកសិកម្ម រុក្ខប្រមាញ់ និងនេសាទ បានភ្ជាប់របាយការណ៍របស់ខ្លួនដោយសង្ខេបជាមួយនឹងមន្ទីរទេសចរណ៍ ដោយបាននិយាយពីបញ្ជីឈ្មោះផ្លែឈើ ដែលប្រជាកសិករនាំយកមកចូលរួមក្នុងព្រឹត្តិការណ៍ «ពិព័រណ៌ផ្លែឈើ» រួមមាន៖ ផ្លែទុរេន ដូង សាវម៉ាវ ល្មើ ប័រ ម្នាស់ មង្ឃុត និងផ្លែឈើផ្សេងៗមួយចំនួនទៀត ។
ក្រៅពីការរៀបចំ «ពិព័រណ៌ផ្លែឈើ» ក្នុងព្រឹត្តការណ៍នេះ ក៏មានរៀបចំតូបលក់ទំនិញគ្រប់ប្រភេទ ម្ហូបអាហារ និងផលិតផលក្នុងស្រុកផ្សេងរាប់រយតូបទៀត រួមជាមួយនឹងការសម្ដែងសិល្បៈ របាំប្រពៃណី និងការប្រគំតន្ត្រីសម័យផងដែរ ។
បើតាមមន្ទីរទេសចរណ៍បានអះអាងថា ពីព័រណ៌ផ្លែឈើបាត់ដំបងលើកទី២ សម្រាប់ឆ្នាំ២០២៦ នេះ ភ្ញៀវចូលរួមមានការកើនឡើងជាងឆ្នាំ២០២៥កន្លងទៅ ព្រោះពិព័រណ៌ផ្លែឈើឆ្នាំនេះ ប្រព្រឹត្តិទៅច្រើនថ្ងៃជាងឆ្នាំមុន ៕
ចែករំលែកព័តមាននេះ