ប្រទេសសិង្ហបុរី ៖ សិង្ហបុរី ដែលជាប់ចំណាត់ថ្នាក់ជាប្រទេសមានបំផុតលំដាប់ទី២នៅលើពិភពលោក ដោយផ្អែកលើផលិតផលក្នុងស្រុកសរុប (GDP) សម្រាប់មនុស្សម្នាក់ក្នុងឆ្នាំ២០២៥នោះ បានទទួលស្វាគមន៍ភ្ញៀវទេសចរអន្តរជាតិចំនួន ៨,១៩ លាននាក់ក្នុងរយៈពេល៦ខែដំបូង នៃឆ្នាំ ២០២៦ ពោលធ្លាក់ចុះ ១,៧% ធៀបនឹងរយៈពេលដូចគ្នា កាលពីឆ្នាំមុន ដោយសារដែលការថមថយនៃប្រភពទីផ្សារទេសចរណ៍សំខាន់ៗ ដូចជា ប្រទេសឥណ្ឌូណេស៊ី និងឥណ្ឌា។
យោងតាមទិន្នន័យពីក្រុមប្រឹក្សាភិបាលទេសចរណ៍សិង្ហបុរី (STB) បានឱ្យដឹងថា គិតតែនៅក្នុងខែមិថុនា ប្រទេសផ្ទៃដីតូចជាងគេបំផុតនៅអាស៊ីអាគ្នេយ៍មួយនេះ បានស្វាគមន៍ភ្ញៀវទេសចរអន្តរជាតិចំនួន ១,១៨ លាននាក់ ពោលធ្លាក់ចុះ ៤,៩% ធៀបនឹងរយៈពេលដូចគ្នា កាលពីឆ្នាំមុន ហើយវាជាលឿនលទ្ធផលទេសចរណ៍ប្រចាំខែខ្សោយបំផុត នៅក្នុងឆមាសទី១ នៃឆ្នាំនេះ។
ប្រទេសចិននៅតែជាប្រភពទេសចរណ៍ធំបំផុតរបស់សិង្ហបុរី នៅក្នុងឆមាសទី១ នៃឆ្នាំនេះ ដោយបានរួមចំណែកចំនួន ១,៥៣ លាននាក់ ពោលកើនឡើង ៣,៧% ធៀបនឹងរយៈពេលដូចគ្នា កាលពីឆ្នាំមុន។ ទោះយ៉ាងណាក៏ដោយ ការធ្លាក់ចុះនៃចំនួនភ្ញៀវទេសចរមកពីឥណ្ឌូណេស៊ី និងឥណ្ឌា បានធ្វើឱ្យប៉ះពាល់ដល់កំណើនទេសចរណ៍សរុបរបស់ប្រទេសនេះ ដ្បិតឥណ្ឌូណេស៊ី ដែលជាទីផ្សារធំទី២របស់សិង្ហបុរី បានរួមចំណែកចំនួន ១,១៥ លាននាក់ ពោលធ្លាក់ចុះ ១០,៦% ធៀបនឹងឆ្នាំមុន។ ចំណែកការមកដល់របស់ភ្ញៀរជនជាតិឥណ្ឌាបានធ្លាក់ចុះ ៦,៦% មកនៅត្រឹម ៦០៤ ០០០ នាក់។
បើតាមប្រភពពីសារព័ត៌មានសិង្ហបុរី The Straits Times បានរាយការណ៍ថា រដ្ឋាភិបាលសិង្ហបុរីកំពុងតែបង្កើនការវិនិយោគរបស់រដ្ឋនៅក្នុងវិស័យទេសចរណ៍ ដោយមានផែនការទាក់ទាញភ្ញៀវទេសចរឱ្យបានចន្លោះពី ១៧-១៨ លាននាក់នៅក្នុងឆ្នាំ ២០២៦ ដោយបានប្រកាសដាក់ចេញនូវកញ្ចប់ថវិកាគាំទ្រវិស័យទេសចរណ៍ចំនួន ៥៧៣ លានដុល្លារអាមេរិក ដែលមានទំហំច្រើនជាង២ដងនៃកញ្ចប់ថវិកា ២៣២លានដុល្លារអាមេរិក ដែលធ្លាប់បានបែងចែកក្រោមមូលនិធិអភិវឌ្ឍន៍ទេសចរណ៍ក្នុងឆ្នាំ២០២៤ ដើម្បីពង្រឹងភាពធន់នៃឧស្សាហកម្មនេះក្នុងរយៈពេលវែង និងគាំទ្រដល់គំនិតផ្តួចផ្តើមទេសចរណ៍ឆ្នាំ២០៤០ (Tourism 2040) ដែលជាផែនការមេ ឬចក្ខុវិស័យយុទ្ធសាស្ត្ររយៈពេលវែង ដើម្បីជំរុញកំណើនវិស័យទេសចរណ៍ប្រកបដោយគុណភាព និងនិរន្តរភាពឆ្ពោះទៅកាន់ឆ្នាំ ២០៤០៕ ប្រភព ៖ VnExpress
ចែករំលែកព័តមាននេះ