យុទ្ធនាការចាក់វ៉ាក់សាំងការពារជំងឺគោ-ក្របី ជិត ១ម៉ឺនក្បាល ធ្វើឡើងនៅស្រុកកងមាស និងបន្តទៅស្រុកផ្សេងទៀត
- កំពង់ចាម
ខេត្តកំពង់ចាម ៖ “គិតរហូតមកដល់ពេលនេះសកម្មភាពចាក់វ៉ាក់សាំងការពារជំងឺគោ-ក្របីជូនដល់បងប្អូនប្រជាកសិករបានចំនួន៧០០០ក្បាលហើយដើម្បីការពារជំងឺសារទឹក។’នេះជាប្រសាសន៍លើកឡើងពីសំណាក់ឯកឧត្តមអ៊ុន ចាន់ដា អភិបាលខេត្តក្នុងឱកាសយុទ្ធនាការចាក់វ៉ាក់សាំងការពារជំងឺសត្វទីហនៈជូនប្រជាកសិករនៅក្នុងបរិវេណវត្តស្វាយស្រណោះ ក្នុងឃុំរកាអារ ស្រុកកងមាស ដោយធ្វើឡើងនាព្រឹកថ្ងៃទី២០កក្កដា ឆ្នាំ២០២៦ ជាមួយនោះមានការចូលរួមពីសំណាក់អភិបាលរងខេត្ត ប្រធានមន្ទីរអង្គភាពនានាជុំវិញខេត្ត។
ឯកឧត្តមអ៊ុន ចាន់ដា អភិបាលខេត្តមានប្រសាសន៍លើកឡើងថា: កម្មវិធីនេះត្រូវបានរៀបចំដោយមន្ទីរកសិកម្មរុក្ខាប្រមាញ់និងនេសាទខេត្ត ដើម្បីចាក់វ៉ាក់សាំងការពារជំងឺគោ-ក្របី ជូនដល់បងប្អូនប្រជាពលរដ្ឋ ក្នុងគោលដៅការពារឲ្យមានសុខភាពល្អ ជៀសផុតពីជំងឺឆ្លងផ្សេងៗនៅក្នុងរដូវវស្សា ព្រោះថាសត្វទាំងនេះគឺជាកម្លាំងចលករក្នុងការបង្កបង្កើនផលដំណាំស្រូវរួមទាំងដំណាំរួមផ្សំផ្សេងទៀតសម្រាប់លើកកម្ពស់ជីវភាពគ្រួសារ។
ឯកឧត្តមអភិបាលខេត្តមមានប្រសាសន៍បន្តថា ជាការពិតណាស់ឲ្យតែមកដល់ដើមរដូវវស្សាគឺយុទ្ធនាការចាក់វ៉ាក់សាំងការពារជំងឺសារទឹក ដើម្បីបង្ការកុំឲ្យឆ្លងជំងឺទៅលើសត្វគោ-ក្របីរបស់កសិករ។ហើយជារៀងរាល់ឆ្នាំមន្ទីរកសិកម្មខេត្តបានយកចិត្តទុកដាក់លើកិច្ចការទាំងនេះដើម្បីបម្រើផលប្រយោជន៍ជូនដល់សង្គមជាតិ ដោយពុំមានការគិតកម្រៃនោះទេ។យើងត្រូវតែរូបរួមគ្នាសាមគ្គីជាធ្លុងមួយព្រោះថាប្រជាជនភាគច្រើនតែងតែពឹងផ្អែកលើវិស័យកសិកម្មជាអាទិភាព។ នៅក្នុងផែនការនៃយុទ្ធនាការចាក់វ៉ាក់សាំងគោ-ក្របីត្រូវធ្វើឡើងនៅតាមបណ្ដាស្រុក-ក្រុងទាំង ១០ក្នុងខេត្តកំពង់ចាម ដែលមានចំនួន ១៧០០០ក្បាល គិតរហូតមកដល់ពេលនេះកម្លាំងពេទ្យសត្វទើបតែចាក់បានចំនួន៧០០០ក្បាលប៉ុណ្ណោះដែលទាមទារឲ្យមានការយកចិត្តទុកដាក់បន្ថែមទៀតធ្វើយ៉ាងណាឱ្យទាន់ផែនការដែលបានកំណត់។ បងប្អូនពលរដ្ឋដែលបានយកគោ-ក្របី មកចាក់វ៉ាក់សាំងនាពេលនេះពេលត្រឡប់ទៅវិញសូមជួយផ្សព្វផ្សាយដល់អ្នកផ្សេងទៀតធ្វើយ៉ាងណាយកសត្វពាហនៈមកចាក់វ៉ាក់សាំងឲ្យបានគ្រប់ៗគ្នា។តាមរយៈលោកមេឃុំក៏ដូចជាលោកអភិបាលស្រុកកងមាស ដែលបានស្នើមកដល់ថ្នាក់ដឹកនាំខេត្តដើម្បីអញ្ជើញមកចូលរួមក្នុងយុទ្ធនាការចាក់វ៉ាក់សាំងគោ-ក្របី ធ្វើឡើងនៅវត្តស្វាយស្រណោះដែលជាទីអារាមមួយល្បីមានបារមីសក្តិសិទ្ធ ។
ចំណែកប្រជាពលរដ្ឋឈ្មោះយួន ឌីភេទប្រុសអាយុ៥៣ឆ្នាំ ជាអ្នកភូមិស្វាយស្រណោះទី១ ឃុំរកាអារ ស្រុកកងមាសបានសម្ដែងនៅក្តីសប្បាយរីករាយ ដោយបានយកគោចំនួនពីរក្បាលមកចាក់វ៉ាក់សាំងការពារជំងឺដោយមិនបានចំណាយថវិកា ក្រោមការរៀបចំរបស់អាជ្ញាធរពាក់ព័ន្ធគ្រប់លំដាប់ថ្នាក់នេះបង្ហាញពីការយកចិត្តទុកដាក់ជួយដល់ប្រជាកសិករនៅមូលដ្ឋាន មួយវិញទៀតគោក្របីគឺជាសត្វដែលមានសារៈសំខាន់ក្នុងការប្រើប្រាស់អូសទាញនង្គ័លសម្រាប់ការបង្កបង្កើនផលធ្វើស្រែចម្ការ ៕
ចែករំលែកព័តមាននេះ