ទីក្រុងឡុង៖ លោកអេនឌី បឺនហេម ក្លាយជានាយករដ្ឋមន្ត្រីថ្មីរបស់អង់គ្លេសនៅថ្ងៃនេះ។ លោកសន្យាថានឹងផ្ដោតសំខាន់ទៅលើបញ្ហាដែលប្រជារាស្ត្រអង់គ្លេសកំពុងតែខ្វាយខ្វល់ដូចជាថ្លៃចំណាយលើជីវភាពប្រចាំថ្ងៃ និងសេវាកម្មរបស់រដ្ឋដែលធ្លាក់ចុះ។ សហសេវិកនៅក្នុងគណបក្សពលករជាមួយគ្នា និងជានាយករដ្ឋមន្ត្រីអង់គ្លេស លោកខៀ ស្តាមើ បានថ្លែងសុន្ទរកថាលើកចុងក្រោយរបស់លោកមុនពេលចាកចេញជារៀងរហូតពីវិមានដោននីងស្ទ្រីត។ លោកស្តាមើប្រាប់ក្រុមអ្នកគាំទ្ររបស់លោកថា «កិច្ចការរបស់ខ្ញុំបានធ្វើចប់សព្វគ្រប់អស់ហើយ» និងថាលោកចាកចេញលើកនេះដោយកិត្តិយស និងស្នាមញញឹម។
លោកស្តាមើថ្លែងថាការងាររបស់លោកជានាយករដ្ឋមន្ត្រីជាកិត្តិយសសម្រាប់ជីវិតរបស់លោក និងថាលោកសូមប្រគល់ភារកិច្ច និងតួនាតីជូនទៅលោកបឺនហេម និងជូនពរឱ្យលោកបឺនហេមទទួលជោគជ័យគ្រប់ការងារ។ គាត់ទទួលបានការគាំទ្រយ៉ាងពេញទំហឹងពីខ្ញុំ។ នៅក្នុងរង្វង់មួយម៉ោងក្រោយការថ្លែងរបស់លោកស្តាមើ លោកបឺនហេមក៏ឡើងថ្លែងសុន្ទរកថានៅខាងមុខវិមានដោននីងស្ទ្រីត។ លោកបានដាក់ចេញនូវកម្មវិធីនយោបាយដែលប្រកបដោយស្ថិរភាព និងការទទួលខុសត្រូវខ្ពស់ជាងអ្នកមុន។ នេះបើយោងតាមសេចក្ដីប្រកាសរបស់ខុទ្ទកាល័យរបស់លោក។ លោកបឺនហេមចាត់ទុកការឈ្នះឆ្នោតរបស់លោកក្លាយជាប្រធានបក្សពលកររបស់អង់គ្លេសជាបម្លាស់ប្ដូរដ៏សំខាន់បំផុតនៅក្នុងនយោបាយអង់គ្លេសរយៈពេល៤០ឆ្នាំចុងក្រោយ។
លោកបឺនហេមសន្យាថានឹងផ្លាស់ប្ដូរប្រព័ន្ធនយោបាយដើម្បីលើកកម្ពស់ជីវភាពរស់នៅរបស់ប្រជាជន និងជួយកែប្រែប្រទេសជាតិទៅជាទឹកដីដែលងាយស្រួលរស់នៅសម្រាប់ប្រជាជនគ្រប់គ្នា។ លោកបានពាំនាំពាក្យពេចន៍ទៅជម្រាបជូនក្រុមអ្នកតំណាងរាស្ត្ររបស់គណបក្សពលករដែលចាត់ទុកលោកជាអ្នកនយោបាយតិចតួចប៉ុណ្ណោះអាចស៊ីសងគ្នាបានជាមួយបេក្ខជនរបស់គណបក្សកំណែទម្រង់អង់គ្លេស (Reform UK)។ បើយកលោកស្តាមើទៅប្រៀបធៀបគឺចាញ់ប្រៀបគេតែម្ដង។ អ្វីដែលជាបញ្ហាប្រឈមដំបូងៗសម្រាប់លោកបឺនហេមគឺការតែងតាំងសមាសភាពគណៈរដ្ឋមន្ត្រី។ ជាពិសេស តំណែងរដ្ឋមន្ត្រីហិរញ្ញវត្ថុ។ ការបែកបាក់គ្នានៅក្នុងសម្ព័ន្ធភាពនាំឱ្យចុះខ្សោយដល់ការដឹកនាំរបស់រដ្ឋាភិបាលមុន។
កាលពីថ្ងៃអាទិត្យ ផែនការនានាត្រូវផ្អឹបទុកសិនសម្រាប់និយោជិតទាំងអស់ដើម្បីឱ្យពួកគេគ្រប់គ្នាត្រូវតែមានឯកសារបញ្ជាក់អត្តសញ្ញាណជាឌីជីថល។ នេះជាវិធានការទប់ទល់នឹងការធ្វើចំណាកស្រុកខុសច្បាប់ដែលត្រូវគណៈកម្មការរដ្ឋសភាដែលមកពីគណបក្សនយោបាយចម្រុះចាត់ទុកថាជាបរាជ័យដ៏អាម៉ាស់។ ចំណុចដែលគេយកចិត្តទុកដាក់គឺបញ្ហាពន្ធ ថ្លៃចំណាយប្រចាំថ្ងៃ តម្លៃប្រេងឆៅ តម្លៃហ្គាស និងក្រុមហ៊ុនផ្ដល់សេវាទឹក ភ្លើង សំរាមដែលធ្លាក់ចុះ។ ចំណុចទាំងនេះជាអ្វីដែលលោកបឺនហេមត្រូវពង្រឹងដើម្បីទទួលបានការគាំទ្រពីសាធារណមតិ។ សេមវាត់ថឺ (Thames Water) ដែលជាក្រុមហ៊ុនផ្គត់ផ្គង់ទឹកស្អាតធំជាងគេនៅអង់គ្លេសកំពុងជួបបញ្ហាដោយសារវិបត្តិបំណុល និងការធ្លាយលូទឹកស្អុយ។ អនុប្រធានគណបក្សពលករដែលជាសម្ព័ន្ធមិត្តរបស់លោកបឺនហេមដែរនោះបានស្នើថាក្រុមហ៊ុននេះគួរបើកប្រតិបត្តិការក្រោមការមើលការខុសត្រូវពីរដ្ឋាភិបាល៕ ប្រភព៖ Reuters
ចែករំលែកព័តមាននេះ