ទីក្រុងតេអេរ៉ង់៖ យោធាអាមេរិកប្រកាសថាទាហានរបស់ខ្លួនម្នាក់ទៀតបានពលីជីវិតនៅក្នុងសង្គ្រាមទល់នឹងប្រទេសអ៊ីរ៉ង់។ ការបាត់បង់ជីវិតនេះកើតមានឡើងចំពេលដែលអាមេរិកបង្កើនការវាយប្រហារកាន់តែខ្លាំងឡើងៗដើម្បីឆ្លើយតបទៅអ៊ីរ៉ង់ដែលបានសម្លាប់ទាហានរបស់ខ្លួន។ អ៊ីរ៉ង់ក៏មិននៅស្ងៀមដែរ អ៊ីរ៉ង់បាញ់មីស៊ីលជាច្រើនគ្រាប់ដាក់មូលដ្ឋានយោធាអាមេរិកនៅប្រទេសហ្សកដង់ ហើយអាចនឹងធ្វើឱ្យសង្គ្រាមរាលដាលទៅដល់ប្រទេសអ៊ីស្រាអែលដែលនៅជិតខាងនោះ។ បន្តិចម្ដងៗ សង្គ្រាមវិវត្តទៅជាទ្រង់ទ្រាយធំដោយសារកិច្ចព្រមព្រៀងនៃបទឈប់បាញ់ត្រូវរលាយសូន្យបង់ ហើយច្រកសមុទ្រហ័រម៉ូសបិទដំណើរការស្ទើរតែទាំងស្រុង។ ភាគីទាំង២បន្តវាយប្រហារហេដ្ឋារចនាសម្ព័ន្ធស៊ីវិលដែលប្រើប្រាស់ដោយមនុស្សរាប់លាននាក់។
អាមេរិកទទួលស្គាល់ថាយោធារបស់ខ្លួនចុងក្រោយបំផុតស្លាប់នៅប្រទេសអ៊ីរ៉ាក់កាលពីថ្ងៃសៅរ៍នៅពេលដ្រូនមួយគ្រឿងត្រូវបានបាញ់ទម្លាក់ ហើយក៏ផ្ទុះតែម្ដង។ កាលពីមុននោះ អាមេរិកថាខ្លួនវាយប្រហារឆ្មាំបដិវត្តឥស្លាមដើម្បីសងសឹកករណីដែលអ៊ីរ៉ង់បាញ់សម្លាប់ទាហានរបស់ខ្លួន (អាមេរិក) នៅប្រទេសហ្សកដង់កាលពីថ្ងៃសុក្រ។ ទាហានអាមេរិកម្នាក់បន្តបាត់ខ្លួនរហូតដល់សព្វថ្ងៃក្រោយការវាយប្រហារនោះ។ យោធាអាមេរិកចេញសេចក្ដីថ្លែងការណ៍ថាខ្លួនរកឃើញសាកសពមនុស្សដែលគេមិនទាន់ស្គាល់អត្តសញ្ញាណកាលពីថ្ងៃអាទិត្យ និងកំពុងពិនិត្យផ្ទៀងផ្ទាត់។ ចាប់តាំងពីសង្គ្រាមអ៊ីរ៉ង់-អាមេរិកផ្ទុះឡើងជាលើកដំបូងរហូតមកដល់ពេលនេះ ទាហានអាមេរិក១៧នាក់បានពលីជីវិត។
នៅក្នុងការវាយប្រហារគ្នាទៅវិញទៅមកដែលឈានចូលដល់សប្ដាហ៍ទី២ គេឃើញថាអាមេរិកវាយប្រហារស្ពានជាច្រើនកន្លែង, វាយប្រហាររោងចក្រចម្រាញ់ទឹកសមុទ្រទៅជាទឹកសាប និងវាយប្រហាររោងចក្រអគ្គិសនីរបស់អ៊ីរ៉ង់។ ចំណែកអ៊ីរ៉ង់វាយប្រហារក្រុមប្រទេសសម្ព័ន្ធមិត្តរបស់អាមេរិកនៅទូទាំងតំបន់មជ្ឈិមបូព៌ា។ គូវែត ហ្សកដង់ និងបារ៉េនចាប់ផ្ដើមដាក់ឱ្យដំណើរការប្រព័ន្ធការពារដែនអាកាសយ៉ាងសកម្មដើម្បីតាមប្រមាញ់ដ្រូន និងមីស៊ីលដែលបាញ់ចេញពីប្រទេសអ៊ីរ៉ង់។ អ៊ីស្រាអែលប្រហែលជាចង់ប្រឡូកនៅក្នុងសង្គ្រាមនេះដែរ។ អ៊ីស្រាអែលថាគ្រាប់មីស៊ីលដែលបាញ់សំដៅទៅប្រទេសហ្សកដង់អាចនឹងរាលដាលទៅដល់ប្រទេសរបស់ខ្លួនព្រោះហ្សកដង់ និងអ៊ីស្រាអែលមានព្រំប្រទល់ជាប់គ្នា។
បញ្ជាការដ្ឋានកណ្ដាលយោធាអាមេរិកថ្លែងថាខ្លួនវាយប្រហារទីតាំងស៊ើបការណ៍ និងខែលការពារដែនអាកាសរបស់អ៊ីរ៉ង់ដែលដាក់ពង្រាយនៅតាមតំបន់មាត់សមុទ្រ ហើយក៏វាយប្រហារទីតាំងស្តុកទុកមីស៊ីល និងដ្រូនផងដែរ។ បញ្ជាការដ្ឋានអះអាងថាខ្លួនវាយប្រហារដូច្នេះដើម្បីកុំឱ្យអ៊ីរ៉ង់មានកម្លាំងខ្លាំងក្លាក្នុងការគ្រប់គ្រងច្រកហ័រម៉ូស និងដើម្បីប្រៀនប្រដៅឆ្មាំបដិវត្តឥស្លាមឱ្យរាងចាលម្ដង។ រូបភាពដែលផ្សព្វផ្សាយដោយយោធាអាមេរិកបង្ហាញការវាយប្រហារពីសំណាក់យន្តហោះចម្បាំង និងមីស៊ីលបណ្ដែតម៉ាកថូម៉ាហក (Tomahawk)។ គោលដៅវាយប្រហារមួយទំនងជាស្ថិតនៅតំបន់ភ្នំជាទីតាំងដែលឆ្មាំបដិវត្តច្រើនលាក់ទុកមីស៊ីល និងអាវុធយុទ្ធភ័ណ្ឌរបស់ខ្លួននៅទីនោះ។ ទីភ្នាក់ងារថាមពលអាតូមិចអ៊ីរ៉ង់ថ្លែងថាអាមេរិកវាយប្រហារទីតាំងកំពុងសាងសង់រោងចក្រនុយក្លេអ៊ែរមួយកន្លែងនៅភាគនិរតី។
យោធាហ្សកដង់ថ្លែងថាខ្លួនបាញ់ទម្លាក់មីស៊ីលជាច្រើនគ្រាប់របស់អ៊ីរ៉ង់។ ប្រទេសហ្សកដង់ក៏ជាកន្លែងតាំងនៅនៃមូលដ្ឋានសឹករបស់អាមេរិកផងដែរ ហើយប្រទេសនេះពឹងផ្អែកខ្លាំងទៅលើប្រព័ន្ធការពារដែនអាកាសរបស់អាមេរិកដើម្បីការពារ។ យោធាហ្សកដង់ថ្លែងបន្ថែមទៀតថាមីស៊ីលទាំងនោះមិនបានបង្កគ្រោះថ្នាក់ដល់អាយុជីវិតរបស់មនុស្ស ឬក៏ខូចខាតទ្រព្យសម្បត្តិនោះទេ។ ក្រោយមក ហ្សកដង់កោះហៅភារៈធារីនៃស្ថានទូតអ៊ីរ៉ង់ទៅជួបដើម្បីបង្ហាញការកើតទុក្ខមិនសុខចិត្តចំពោះរឿងនេះ។ យោធាអ៊ីស្រាអែលថ្លែងថាមីស៊ីលរបស់អ៊ីរ៉ង់បាញ់ចូលទីក្រុងកំពង់ផែអាកាបា (Aqaba) របស់ហ្សកដង់ដែលស្ថិតនៅកៀកនឹងព្រំដែនអ៊ីស្រាអែល ហើយទៅថ្ងៃមុខ មីស៊ីលអ៊ីរ៉ង់អាចនឹងហោះជ្រុលចូលទឹកដីអ៊ីស្រាអែល។
នៅក្នុងការប្រយុទ្ធគ្នាលើកចុងក្រោយនេះ យោធាអ៊ីរ៉ង់ច្រើនផ្ដោតសំខាន់លើការវាយប្រហារក្រុមប្រទេសសម្ព័ន្ធមិត្តរបស់អាមេរិកនៅមជ្ឈិមបូព៌ាជាជាងវាយប្រហារអ៊ីស្រាអែល។ ប៉ុន្តែនាយអគ្គសេនាធិការកងទ័ពអ៊ីស្រាអែលប្រកាសទុកជាមុនថាយោធារបស់ខ្លួនត្រៀមវាយប្រហារអ៊ីរ៉ង់ឡើងវិញ។ គូវែតថ្លែងថារោងចក្រអគ្គិសនី និងរោងចក្រចម្រាញ់ទឹកសមុទ្ររបស់ខ្លួនរងការវាយប្រហារជាលើកទី២នៅក្នុងរយៈពេលត្រឹមតែ២ថ្ងៃប៉ុណ្ណោះ ហើយបង្កជាអគ្គិភ័យ។ គូវែតថារោងចក្រអគ្គិសនីរបស់ខ្លួននៅតែដំណើរការជាធម្មតា។ នៅគូវែត ទឹកស្អាត៩០%ចម្រាញ់ចេញពីទឹកសមុទ្រ។ ក្រុមប្រឹក្សានៃកិច្ចសហប្រតិបត្តិការនៅឈូងសមុទ្រពែក្ស (ដែលមានប្រទេសចំនួន៦ជាសមាជិក) ចោទប្រកាន់ថាអ៊ីរ៉ង់បានប្រព្រឹត្តឧក្រិដ្ឋកម្មសង្គ្រាមដោយវាយប្រហារហេដ្ឋារចនាសម្ព័ន្ធ និងទីតាំងស៊ីវិល៕ ប្រភព៖ AP
ចែករំលែកព័តមាននេះ