តើអ្នកមានដែលរអ៊ូរទាំប្រាប់មិត្តភក្តិថា អស់លុយចាយវាយទេ ? យុវវ័យដែលអានអត្ថបទនេះប្រហែលជាឆ្លើយថា ធ្លាប់ ហើយញឹកញាប់ថែមទៀត ។ ប្រាកដណាស់ ខណៈដែលប្រទេសកម្ពុជាកាន់តែអភិវឌ្ឍន៍ទៅមុខប្រជាជនកាន់តែច្រើន ចាប់ផ្តើមបង្កើនប្រាក់ចំណូល និងការចាយវាយរបស់ខ្លួន ដើម្បីបង្កើនគុណភាពរបស់នៅ ។ ប៉ុន្តែយុវវ័យជំនាន់ថ្មីភាគច្រើនមានទម្លាប់ខ្ជះខ្ជាយយ៉ាងខ្លាំងលើសម្ភារៈ និងកត្តាផ្សេងៗដែលពួកគេមិនត្រូវការ ។ លោក Kevin O’Leary ដែលជាមហាសេដ្ឋីមួយរូប និងជាតារាក្នុងកម្មវិធី Shark Tank នៅសហរដ្ឋអាមេរិកបានចែករំលែកពីគំនិតរបស់លោកលើអ្វីដែលយុវវ័យសម័យថ្មីមិនគួរខ្ជះខ្ជាយថវិកាលើដែលមានដូចខាងក្រោមនេះ ៖
១. កាហ្វេ ៖ លោក O’Leary បាននិយាយមកថា កាហ្វេមួយកែវដែលមានតម្លៃជិតដល់៤ដុល្លារ គឺពិតជាមិនសមហេតុសមផលទេ ។ អ្នកប្រហែលជាគិតថា កាហ្វេ គឺជាធាតុសំខាន់មួយដែលជួយដល់ប្រសិទ្ធិភាពការងាររបស់អ្នក ជាពិសេសរាល់ពេលព្រឹកព្រលឹម ប៉ុន្តែអ្នកគួរសាកល្បងគណនាមើល ។ ប្រសិនបើអ្នកចំណាយប្រមាណ៣ដុល្លារក្នុងមួយថ្ងៃ លើកាហ្វេមួយកែវនោះមួយខែអ្នកប្រហែលជាចំណាយអស់៩០ដុល្លារទៅហើយ និងដល់ទៅ ១,០៨០ ដុល្លារក្នុងមួយឆ្នាំ ។ អ្នកអាចសន្សំបាន ១ពាន់ដុល្លារក្នុងមួយឆ្នាំ ឬអាចយកថវិកាទាំងនោះទៅវិនិយោគលើអ្វីផ្សេងវិញ ។
២. ស្បែកជើង ៖ អ្នកប្រហែលជាមិនជឿលើចំណុចនេះ ប៉ុន្តែមនុស្សជាច្រើនចំណាយថវិការាប់រយដុល្លារ លើស្បែកជើងរបស់ពួកគេ ។ លោក O’Leary បាននិយាយថា អ្នកមិនត្រូវការស្បែកជើងច្រើនជាង៤គូទេ ។ អ្នកប្រហែលជាត្រូវការស្បែកជើងផ្ទាត់មួយគូ ស្បែក ជើងសម្រាប់ធ្វើលំហាត់ប្រាណមួយគូ និងស្បែកជើងសម្រាប់ធ្វើការពីរគូតែប៉ុណ្ណោះ ។
៣. សម្លៀកបំពាក់ ៖ លោក O’Leary គិតថា មនុស្សម្នាក់ៗមិនត្រូវការខោខូវប៊យច្រើនជាង ៣ សម្រាប់ទេ ។ ប្រាកដណាស់ ខោខូវប៊យជាប្រភេទសម្លៀកបំពាក់ដែលមានតម្លៃថ្លៃជាពិសេស ប្រសិនបើអ្នកទិញពីយីហោថ្លៃៗដែលអាចមានតម្លៃពី៦០ទៅ៨០ដុល្លារឯណោះក្នុងមួយសម្រាប់ ។
ប្រសិនបើអ្នកចង់កាត់បន្ថយការចាយវាយ អ្នកអាចដាក់កម្រិតលើចំនួនខោខូវប៊យដែលអ្នកមាន ឬចាប់ផ្តើមទិញទំនិញជជុះដែលមានគុណភាពខ្ពស់ជាដើម ៕ កែសម្រួលដោយ ៖សុឃាក់
ចែករំលែកព័តមាននេះ