ខេត្តកំពង់ឆ្នាំង ៖ ក្នុងឱកាសបើកហឹបវិញ្ញាសារប្រលងសញ្ញាប័ត្រទុតិយភូមិនាព្រឹកថ្ងៃទី19 ខែសីហា ឆ្នាំ2019 លោក ឈួរ ច័ន្ទឌឿន បានមានប្រសាសន៍ផ្ដាំផ្ញើទៅដល់បេក្ខជន-បេក្ខនារីដែលជាសិស្សប្រលងថា សូមក្មួយៗ កុំភ័យត្រូវប្រឹងប្រែងដោយស្មារតីក្លាហានដើម្បីប្រឡងជាប់សញ្ញាបត្រទុតិយភូមិឆ្នាំនេះ ហើយបើក្មួយៗប្រឡងជាប់ទទួលបាននិទ្ទេសA ក្មួយៗនឹងទទួលបានម៉ូតូមួយគ្រឿងដូចបណ្ដាសិស្សឆ្នាំមុនៗដែរ ។ មានប្រសាសន៍បែបនេះនៅក្នុងឱកាសដែលលោកអញ្ជើញជាអធិបតីភាពបើកហឹបវិញ្ញាសារប្រឡងនៅមណ្ឌលវិទ្យាល័យក្រុងកំពង់ឆ្នាំង ស្ថិតក្នុងសង្កាត់ខ្សាម ក្រុងកំពង់ឆ្នាំង ។
លោកបានបន្តថា ជាធម្មតាប្រឡងនរណាក៏ចង់ជាប់ដែរ ប៉ុន្តែបើធ្លាក់សូមឱ្យមានកិត្តិយសមិនត្រូវប្រព្រឹត្តខុសឆ្គងក្នុងច្បាប់ប្រឡងដូចជាមិនគោរពវិន័យ និងពិសេសការលួចមើលវិញ្ញាសារប្រឡងជាដើម តែគណៈមេប្រយោគគេឃើញចាប់បានគេឲ្យយើងធ្លាក់ដោយស្វ័យប្រវត្តិ ។ ជាងនេះទៅទៀតរយៈពេលនៃការប្រឡងមានរយៈពេល២ថ្ងៃ ដោយគិតចាប់ពីម៉ោងនេះតទៅ ក្មួយៗត្រូវប្រឡងថ្ងៃដល់ស្អែក និងរហូតដល់ម៉ោង៥ល្ងាចទៀត ។ ហេតុនេះហើយសូមក្មួយៗ គិតគូរបញ្ហាសុខភាពឲ្យមែនទែន កុំហូបនំចំណីអ្វីផ្តេសផ្តាស់ ដែលនាំឱ្យឈឺពោះ រាគរួស ធ្វើឱ្យយើងខកខាននៃការប្រឡងនោះឡើយ ហើយត្រូវសម្រាកឲ្យបានគ្រប់គ្រាន់ និងមិនត្រូវធ្វើអ្វីដែលនាំឲ្យប៉ះពាល់សុខភាពជាដាច់ខាត ។ ជាចុងក្រោយលោកអភិបាលខេត្តបានបញ្ជាក់ថា ក្រៅពីនិទ្ទេសបានរង្វាន់ម៉ូតូ១គ្រឿង អ្នកប្រឡប់ជាប់និទ្ទេសក្រោមA ក៏នឹងទទួលបានរង្វាន់លើកទឹកចិត្តដូចគ្នាដែរ ។
តាមការបញ្ជាក់ពីលោក សឹម ប្រឹម ប្រធានមន្ទីរអប់រំ យុវជននិងកីឡា ខេត្តកំពង់ឆ្នាំង បានឲ្យដឹងថា ខេត្តកំពង់ឆ្នាំង មានមណ្ឌលប្រឡងចំនួន៨ ចែកចេញជា១៨១បន្ទប់ មានសិស្សប្រឡងជាង៤ពាន់នាក់ ។ មន្ទីរបានធ្វើការបែកចែកជា២ គឺទី១. ផ្នែកថ្នាក់វិទ្យាសាស្ត្រ មានចំនួន២មណ្ឌល ក្នុងនោះមណ្ឌលបឋមសិក្សាគំរូក្រុងខាងត្បូង មាន២៧បន្ទប់ និងមណ្ឌលបឋមសិក្សាគំរូក្រុងខាងជើងមាន២០បន្ទប់ ។
ចំណែកថ្នាក់វិទ្យាសាស្ត្រសង្គមមានចំនួន៦មណ្ឌលស្មើនឹង១៣៤បន្ទប់ ក្នុងនោះមាននៅមណ្ឌលវិទ្យាល័យព្រះបាទសុរាម្រឹតខាងលិចមាន២៥បន្ទប់, មណ្ឌលវិទ្យាល័យព្រះបាទសុរាម្រឹតខាងកើតមាន២១បន្ទប់, មណ្ឌលវិទ្យាល័យក្រុងកំពង់ឆ្នាំងខាងលិចមាន២០បន្ទប់, មណ្ឌលវិទ្យាល័យក្រុងកំពង់ឆ្នាំងខាងកើតមាន២០បន្ទប់, មណ្ឌលវិទ្យាល័យ ប៊ុន រ៉ានី ហ៊ុន សែន រលាប្អៀរមាន២៥បន្ទប់ និងមណ្ឌលវិទ្យាល័យហ៊ុនសែនរលាប្អៀរមាន២៣បន្ទប់ ៕
កែសម្រួលដោយ ៖ សំណាង
ចែករំលែកព័តមាននេះ