ពលរដ្ឋខ្មែរវិលចូលស្រុកតិចជាងធ្វើចំណាកស្រុកខុសច្បាប់ចេញទៅប្រទេសថៃ
- បាត់ដំបង
ខេត្តបាត់ដំបង ៖ បើតាមការកត់សម្គាល់ប៉ុន្មានសប្ដាហ៍ចុងក្រោយនេះ គេសង្កេតឃើញមានពលករខ្មែរចំនួនតិចតួចបានវិលត្រឡប់ពីប្រទេសថៃចូលមកកាន់ស្រុកកំណើតវិញ ដែលតិចជាងពលករខ្មែរដែលកំពុងធ្វើចំណាកស្រុក ឆ្លងដែនដោយខុសច្បាប់ចេញទៅរកការងារធ្វើនៅប្រទេសថៃ ។ នេះបើយោងលើសកម្មភាពពលករខ្មែរលួចឆ្លងដែន ហើយត្រូវក្រុមទាហានថៃចាប់ខ្លួនបានស្ទើររាល់ និងចំនួនពលករខ្មែរដែលបានវិលចូលស្រុកកំណើតវិញ ។
ជាក់ស្ដែង រយៈពេលពីរថ្ងៃ គឺថ្ងៃទី២៦ និង២៧ តុលា មន្ត្រីព្រំដែនបានទទួលពលករខ្មែរប្រុស-ស្រីចំនួន១៣នាក់ ដែលបានវិលត្រឡប់ពីប្រទេសថៃ ចូលស្រុកកំណើតវិ តាមច្រករបៀង ក្នុងទឹកដីស្រុកកំរៀង ។ ចំនួននេះហាក់ខុសគ្នាឆ្ងាយ បើធៀបទៅនឹងចំនួនពលករខ្មែរដែលបានលួចឆ្លងដែនខុសច្បាប់ចេញទៅប្រទេសថៃ ដែលខាងភាគីថៃស្ទាក់ចាប់បានសឹងរាល់ថ្ងៃនៅស្រុកពោងណាំរ៉ន ខេត្តច័ន្ទបុរី ឈមនឹងស្រុកកំរៀង ខេត្តបាត់ដំបង ឬខេត្តស្រះកែវ ឈមនឹងស្រុកម៉ាឡៃ ខេត្តបន្តាយមានជ័យ ។
ប្រព័ន្ធផ្សព្វផ្សាយនៃប្រទេសថៃបានចេញផ្សាយរាល់ថ្ងៃ អំពីសកម្មភាពពលរដ្ឋឆ្លោងដែនខុសច្បាប់ ឬទំនិញផ្សេងៗ ដែលឆ្លងពីប្រទេសកម្ពុជា ហើយត្រូវក្រុមទាហានព្រំដែនថៃបង្ក្រាបបាន ។ ជាពិសេស ពលរដ្ឋខ្មែរ និងទំនិញបារី ។ បើនិយាយពីតាមបណ្ដាស្រុកនានានៅភាគខាងលិច នៃខេត្តបាត់ដំបង គេសង្កេតឃើញប៉ុន្មានសប្ដាហ៍ចុងក្រោយនេះ មានពលករខ្មែរភាគច្រើនដែលត្រូវក្រុមទាហានថៃចាប់ខ្លួននៅក្នុងតំបន់ផ្សារ «ឡែម» ខាងភាគីថៃ ស្ថិតក្នុងទឹកដីស្រុកពោងណាំរ៉ន ខេត្តច័ន្ទបុរី ប្រទេសថៃ ត្រូវគេអះអាងថា ពលរដ្ឋខ្មែរទាំងនោះ លួចឆ្លងអូរព្រំដែនខុសច្បាប់ តាមច្រករបៀងនានា ក្នុងភូមិសាស្ត្រ ស្រុក
កំរៀង ។
កាលពីយប់ថ្ងៃទី២៤ តុលា កន្លងទៅនេះ កម្លាំងកងរាជអាវុធហត្ថស្រុកកំរៀង បានឃាត់ខ្លួនមេខ្យល់ម្នាក់ដែលបម្រុងនាំពលករខ្មែរប្រុស-ស្រីចំនួន១១នាក់ ឆ្លងដែនដោយខុសច្បាប់ចេញទៅប្រទេសថៃ ។ នេះចាត់ទុកជាការទប់ស្កាត់បានទាន់ពេលវេលា មុនពេលមេខ្យល់ទុចុ្ចរិតម្នាក់នោះធ្វើជំនួញពលរដ្ឋខ្មែរចេញក្រៅប្រទេសដោយមិនស្របច្បាប់ ។
យោងតាមរបាយការណ៍ដែលកោះសន្តិភាពទទួលបាន នៅព្រឹថ្ងៃទី២៨ តុលា នេះ ពីមន្ត្រីស្រុកកំរៀងបានឲ្យដឹងថា រយៈពេលពីរថ្ងៃ គឺនៅថ្ងៃទី២៦ និង២៧ តុលា មានពលករខ្មែរប្រុស-ស្រីចំនួន១៣នាក់ បានវិលត្រឡប់ពីប្រទេសថៃ ចូលមកកាន់ស្រុកកំណើតវិញ តាមច្រករបៀងនានានៅក្នុងភូមិសាស្ត្រ ស្រុកកំរៀង ។ ក្នុងចំណោមនោះ មានទាំងកុមារតូចៗផង ។
បើតាមមន្ត្រីដដែលបានបញ្ជាក់ថា ពលករខ្មែរទាំង១៣នាក់នោះ ត្រូវបានមន្ត្រីព្រំដែនបញ្ជូនទៅកាន់ «មណ្ឌលទទួលពលករ» ប្រចាំស្រុកកំរៀង ដើម្បីធ្វើការណែនាំ អប់រំ មុនពេលបញ្ជូនពួកគេទៅកាន់ស្រុកកំណើតរៀងៗខ្លួន ៕
ចែករំលែកព័តមាននេះ