ខេត្តព្រះសីហនុ ៖ កូនគ្រែងឈាម(ងាវ) ប្រមាណជាង៥០០គីឡូក្រាម ត្រូវបានកម្លាំងប៉ុស្តិ៍នគរបាលព្រំដែនទឹកកោះថ្មី និងកម្លាំងប៉ុស្តិ៍អំពូខ្មៅ សហការគ្នាចុះបង្ក្រាបបាននៅវេលាយប់រំលងអធ្រាត្រឈានចូលថ្ងៃទី២៨ តុលា ២០២៦ នៅចំណុចកោះខ្យង ឃុំអូរជ្រៅ ក្រុងព្រះសីហនុ ខេត្តព្រះសីហនុ ។
លោក ឯម ភា នាយខណ្ឌរដ្ឋបាលជលផលកំពង់សោមបានឲ្យដឹងថា បន្ទាប់ពីទទួលបានព័ត៌មានពីប្រជានេសាទភូមិកោះខ្យង ឃុំអូរជ្រៅ ក្រុងកំពង់សោម និងទទួលបានការណែរនាំពីលោក នួន ប៊ុនថុល អភិបាលក្រុងកំពង់សោមថា បទល្មើសអូសកូនគ្រែងឈាម ដាច់ខាត្រូវតែធ្វើការបង្ក្រាបឲ្យបានទាន់ពេលវេលា ។ លោកនាយខណ្ឌរដ្ឋបាលជលផល បានចាត់ឲ្យកម្លាំងជំនាញ នៃខណ្ឌរដ្ឋបាលជលផលកំពង់សោម ធ្វើការចុះបង្ក្រាបជាក់ស្តែង និងរឹបអូសបានកូនគ្រែងឈាមប្រមាណ៥០០ ទៅ៦០០គីឡូក្រាម មានទំហំតូចៗ ដែលបង្កប់លើកូនទូកបំណងដឹកចេញពីតំបន់កោះខ្យង នៃទឹកដីខេត្តព្រះសីហនុ យកទៅលក់ឲ្យប្រទេសជិតខាង(វៀតណាម) ខណៈជនសង្ស័យបានរត់គេចខ្លូនបាត់ ។
បន្ទាប់ពីដកហូតកូនគ្រែងឈាមបានភ្លាម លោកអភិបាលក្រុងកំពង់សោម និងកម្លាំងចម្រុះ បាននាំយកទៅចាក់លែងក្នុងដែនសមុទ្រ នៅព្រឹកថ្ងៃទី២៨ ខែតុលា ឆ្នាំ២០២៦នេះ។ កូនគ្រែងដែលបង្ក្រាបបានខាងលើនេះ គឺជាប្រភេទកូនគ្រែងឈាម ដែលច្បាប់ជលផលហាមឃាត់នេសាទជាដាច់ខាត! ព្រោះវាមានលក្ខណៈតូចពេក គឺចាប់ពីប៉ុនជើងធូប រហូតដល់ប៉ុនចុងចង្កឹះ ៕
ចែករំលែកព័តមាននេះ