តូចៗប៉ុនជើងធូបសោះក៏មិនលើកលែង! ករណីលួចដឹកកូនគ្រែងឈា.មជាង៥០០គីឡូក្រាម បំណងយកទៅលក់នៅវៀតណាម
- ព្រះសីហនុ
ខេត្តព្រះសីហនុ ៖ ឃាត់ខ្លួនមិនទាន់ តែរឹបអូសបានកូនគ្រែងឈាមជាង ៥០០គីឡូក្រាម បំណងលួចដឹកយកទៅលក់នៅវៀតណាម ត្រូវបានសមត្ថកិច្ចនាំយកទៅប្រលែងចូលសមុទ្រវិញ ។
រដ្ឋបាលក្រុងកំពង់សោម បានប្រកាសនាព្រឹកថ្ងៃទី២៨ ខែតុលានេះថា ៖ កូនក្រែងឈាម(ងាវ) ប្រមាណជាង៥០០គីឡូក្រាម ត្រូវបានកម្លាំងប៉ុស្តិ៍នគរបាលព្រំដែនទឹកកោះថ្មី និងកម្លាំងប៉ុស្តិ៍អំពូខ្មៅ សហការជាមួយកម្លាំងជំនាញ នៃខណ្ឌរដ្ឋបាលជលផលកំពង់សោម ចុះបង្ក្រាបបាន នៅវេលាយប់រំលងអធ្រាត្រ ឈានចូលថ្ងៃទី២៨ តុលា ២០២៦ នៅចំណុចកោះខ្យង ឃុំអូរជ្រៅ ក្រុងព្រះសីហនុ ខេត្តព្រះសីហនុ ។
រដ្ឋបាលក្រុងកំពង់សោម បានបន្តថា ក្រោយពីលោក នួន ប៊ុនថុល អភិបាលក្រុងកំពង់សោម ទទួលបានសេចក្តីរាយការណ៍ពីប្រជាពលរដ្ឋថា មានបទល្មើសអូសកូនក្រែងឈាម លោកអភិបាលក្រុង បានចាត់ឲ្យកម្លាំងជំនាញ នៃខណ្ឌរដ្ឋបាលជលផលកំពង់សោម ធ្វើការចុះបង្ក្រាបជាក់ស្តែង និងរឹបអូស បានកូនក្រែងឈាម ប្រមាណ៥០០ ទៅ៦០០គីឡូក្រាមមានទំហំតូចៗ ដែលបង្កប់លើកូនទូក បំណងដឹកចេញពីតំបន់កោះខ្យង នៃទឹកដីខេត្តព្រះសីហនុ យកទៅលក់ឲ្យប្រទេសជិតខាង(វៀតណាម) ខណៈជនសង្ស័យបានរត់គេចខ្លួនបាត់ ។
បន្ទាប់ពីដកហូតកូនក្រែងឈាមបានភ្លាម លោកអភិបាលក្រុងកំពង់សោម និងកម្លាំងចម្រុះ បាននាំយកទៅប្រលែងនៅក្នុងដែនសមុទ្រវិញ នៅព្រឹកថ្ងៃទី២៨ ខែតុលា ឆ្នាំ២០២៦នេះ។ កូនក្រែងដែលបង្ក្រាបបានខាងលើនេះ គឺជាប្រភេទកូនក្រែងឈាម ដែលច្បាប់ជលផលហាមឃាត់នេសាទជាដាច់ខាត ព្រោះវាមានលក្ខណៈតូចពេក គឺចាប់ពីប៉ុនជើងធូប រហូតដល់ប៉ុនចុងចង្កឹះ ៕
ចែករំលែកព័តមាននេះ