កម្ពុជាមានរុក្ខជាតិជាឱសថប្រមាណជា១.០០០ប្រភេទ
- ភ្នំពេញ
អ្នកជំនាញខាងឱសថបុរាណកម្ពុជា បានប្រាប់ពិភពលោកថា កម្ពុជាមានរុក្ខជាតិ ដែលអាចធ្វើជាឱសថប្រមាណជា១.០០០ ប្រភេទ ។
ក្រសួងសុខាភិបាលបានអះអាងថា ស្ថិតិនេះ ត្រូវបានចែករំលែកដោយអ្នកជំនាញខាងឱសថបុរាណកម្ពុជា ដែលបានចូលរួមសន្និសីទពិភពលោក ស្តីពីឱសថបុរាណឆ្នាំ២០២៦ នៅទីក្រុងប៉េកាំង ប្រទេសចិន កាលពីពេលថ្មីៗនេះ។
ជាមួយគ្នានេះ អ្នកជំនាញកម្ពុជា ក៏បានលើកឡើងពីសារៈសំខាន់នៃមជ្ឈមណ្ឌលវេជ្ជសាស្ត្របុរាណចិន-កម្ពុជា ដែលមានទីតាំងនៅមន្ទីរពេទ្យមិត្តភាពកម្ពុជា-ចិន ព្រះកុសុមៈ ដែលជាកិច្ចសហប្រតិបត្តិការក្នុងក្របខ័ណ្ឌគំនិតផ្តួចផ្តើមខ្សែក្រវាត់ និងផ្លូវ (BRI) ក្នុងការជំរុញការផ្លាស់ប្តូរចំណេះដឹង បច្ចេកទេស និងបទពិសោធន៍រវាងប្រទេសទាំងពីរ។
មកដល់ពេលនេះ ស្របតាមទិសដៅយុទ្ធសាស្ត្រនៃផែនការយុទ្ធសាស្ត្រសុខាភិបាល ឆ្នាំ២០២៥-២០៣៤ អ្នកជំនាញកម្ពុជា បានលើកឡើងនូវអនុសាសន៍ជាអាទិភាព ចំនួន៥ ដើម្បីពង្រឹងការអភិវឌ្ឍវិស័យឱសថបុរាណ នៅក្នុងប្រទេស រួមមាន ការបង្កើតមន្ទីរពិសោធន៍ទំនើបសម្រាប់កំណត់អត្តសញ្ញាណរុក្ខជាតិឱសថ តាមរយៈ DNA Barcoding ដើម្បីធានាភាពត្រឹមត្រូវនៃការកំណត់អត្តសញ្ញាណវត្ថុធាតុដើម ។
ក្រៅពីនោះ កម្ពុជាក៏កំពុងតែខិតខំ រៀបចំចងក្រង និងបោះពុម្ពផ្សាយឯកសារស្តង់ដារផ្លូវការស្តីពីឱសថបុរាណ ដើម្បីកំណត់ស្តង់ដារគុណភាព និងជំរុញការប្រើប្រាស់ឱសថបុរាណប្រកបដោយសុវត្ថិភាព និងប្រសិទ្ធភាព ។ ក្រៅពីនោះ គឺការពង្រឹងសមាហរណកម្មឱសថបុរាណ ទៅក្នុងប្រព័ន្ធសុខាភិបាលសាធារណៈ ជាពិសេសសេវាថែទាំសុខភាពបឋម នៅតាមមណ្ឌលសុខភាព ដើម្បីពង្រីកលទ្ធភាពទទួលបានសេវាថែទាំសុខភាពប្រកបដោយសុវត្ថិភាព និងគុណភាព ។
ក្រសួងក៏កំពុងធ្វើការជំរុញភាពជាដៃគូអន្តរជាតិក្នុងការផលិត និងគ្រប់គ្រងគុណភាពឱសថបុរាណ ស្របតាមគោលការណ៍អនុវត្តផលិតកម្មល្អ ព្រមទាំងពង្រឹងប្រព័ន្ធចុះបញ្ជីឱសថ និងការត្រួតពិនិត្យទីផ្សារ ដើម្បីទប់ស្កាត់ការផលិត ការចែកចាយ និងការលក់ឱសថបុរាណដែលគ្មានការអនុញ្ញាត ៕
ចែករំលែកព័តមាននេះ