រដ្ឋបាលស្រុកឱរ៉ាល់ ស្នើប្រជាពលរដ្ឋ«ឈប់កា.ប់ឈើ»ពេលឡើង-ចុះភ្នំប្រមូលអនុផលព្រៃឈើ
- កំពង់ស្ពឺ
ខេត្តកំពង់ស្ពឺ៖ រដ្ឋបាលស្រុកឱរ៉ាល់ ខេត្តកំពង់ស្ពឺ បានអំពាវនាវឱ្យពលរដ្ឋ «បញ្ឈប់ការកាប់បំផ្លាញព្រៃឈើ» គ្រប់ពេលដែលពលរដ្ឋឡើងចុះតំបន់ភ្នំ ដើម្បីប្រមូលអនុផលព្រៃឈើ។ ការអំពាវនាវយ៉ាងដូច្នេះ ធ្វើឡើងក្រោមហេតុផល «សមត្ថកិច្ចជំនាញមិនមានលទ្ធភាពឈរជើងចាំបង្ក្រាប បទល្មើសបានគ្រប់ចំណុច ដោយសារឧបសគ្គព្រៃជ្រៅ ផ្លូវលំបាក និងចំណោតខ្ពស់ៗ»។
ក្រោយទទួលបានព័ត៌មានពីសកម្មភាពប៉ះពាល់ធនធានព្រៃឈើ ថ្នាក់ដឹកនាំនៃរដ្ឋបាលស្រុកឱរ៉ាល់ បានចាត់តាំងកម្លាំងជំនាញចុះពិនិត្យទីតាំងជាក់ស្តែងភ្លាមៗ។ ជាលទ្ធផល រដ្ឋបាលស្រុក បានគូសបញ្ជាក់ថា តំបន់ភ្នំខាងលើមានស្ថានភាពផ្លូវលំបាកខ្លាំង ឆ្លងកាត់ព្រៃក្រាស់ និងចំណោតខ្ពស់ ដែលត្រូវចំណាយពេល និងប្រឈមឧបសគ្គច្រើនក្នុងការធ្វើដំណើរ។ កត្តានេះ ធ្វើឱ្យកម្លាំងជំនាញ មិនអាចឈរជើងប្រចាំការ ឬចុះល្បាតគ្របដណ្ដប់បានគ្រប់ចំណុច និងគ្រប់បណ្ដាភ្នំ ក្នុងពេលតែមួយឡើយ ទោះជាមានការចុះល្បាតជាប្រចាំក៏ដោយ។
ចំពោះមុខ រដ្ឋបាលស្រុកឱរ៉ាល់ មានតែអំពាវនាវឱ្យពលរដ្ឋបញ្ឈប់ការកាប់បំផ្លាញព្រៃឈើ គ្រប់ពេលឡើងចុះតំបន់ភ្នំ ដើម្បីប្រមូលអនុផលព្រៃឈើ។ ទន្ទឹមនេះ ប្រសិនបើឃើញមានបទល្មើស ឬសកម្មភាពមិនប្រក្រតីណាមួយ អាជ្ញាធរស្រុកនេះ លើកទឹកចិត្តឱ្យចូលរួមរាយការណ៍ និងផ្ដល់ព័ត៌មានជាបន្ទាន់មកអាជ្ញាធរមន្ត្រីជំនាញ តាមរយៈលេខទូរស័ព្ទ៖ ០៦០ ២២៣ ៦៦៦, ០១២ ៥៤៦ ៨០៣, ០៩៦ ៩៩១ ១១៥៥។ នេះបើយោងតាមសេចក្ដីជូនដំណឹងរបស់រដ្ឋបាលស្រុកឱរ៉ាល់ ចេញនៅថ្ងៃទី២៣ ខែតុលា ឆ្នាំ២០២៦កន្លងទៅថ្មីៗនេះ។
សម្រាប់អ្នកគាំទ្រកិច្ចការងារការពារធនធានធម្មជាតិ រដ្ឋបាលស្រុកក៏បន្តជំរុញឱ្យចូលរួមសហការ ផ្ដល់ព័ត៌មានគ្រប់ជ្រុងជ្រោយ និង ធ្វើការងាររួម គ្នាជាមួយអាជ្ញាធរមូលដ្ឋាន មន្ត្រីជំនាញ ដោយស្មារតីទទួលខុសត្រូវខ្ពស់។ រដ្ឋបាលស្រុកឱរ៉ាល់ សង្ឃឹមថា ការចូលរួមពីភាគីពាក់ព័ន្ធទាំងអស់អាចចូលរួមចំណែកការពារ និងអភិរក្សធនធានធម្មជាតិព្រៃឈើ ទទួលបានជោគជ័យ និងមានប្រសិទ្ធភាពខ្ពស់៕
ចែករំលែកព័តមាននេះ