រាជធានីភ្នំពេញ ៖ សហព័ន្ធកីឡាទ្រីយ៉ាត្លុងកម្ពុជា (ហែលទឹក+ជិះកង់+រត់ប្រណាំង) បាននិងកំពុងធ្វើការប្រមូលផ្តុំធនធានមនុស្សជាច្រើនដើម្បីធ្វើការហ្វឹកហាត់ និងពង្រឹងសមត្ថភាពឱ្យបានល្អប្រសើរឡើងមួយកម្រិតទៀត បន្ទាប់ពីគណៈកម្មការរៀបចំព្រឹត្តិការណ៍ប្រកួតកីឡា SEA Games លើកទី២៨ នៅប្រទេសសិង្ហបុរីប្រកាសដាក់បញ្ចូលឱ្យមានប្រភេទកីឡាទ្រីយ៉ាត្លុងនៅឆ្នាំ២០១៥ នោះ ។
លោកងិន សុបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា បានថ្លែងឱ្យដឹងថា បច្ចុប្បន្ននេះសហព័ន្ធយើងខ្ញុំកំពុងខិតខំជំរុញយ៉ាងខ្លាំងទៅដល់សមាគម និងក្លិបកីឡាទ្រីយ៉ាត្លុងក្នុងស្រុកទាំងអស់ឱ្យពង្រឹងសមត្ថភាពកីឡាករ-កីឡាការិនី និងយុវជនជំនាន់ក្រោយឱ្យមានការរីកចម្រើនបន្ថែមទៀតដើម្បីជាការត្រៀមខ្លួនឱ្យហើយក្នុងការចូលរួមប្រកួតកីឡា SEA Games លើកទី២៨ នៅសិង្ហបុរីនាឆ្នាំ២០១៥ ខាងមុខ ប្រសិនបើមានការអនុញ្ញាតពីក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជានោះ ។ អគ្គលេខាធិការសហព័ន្ធកីឡាទ្រីយ៉ាត្លុងរូបនេះបានបញ្ជាក់ទៀតថា គណៈកម្មការរៀបចំព្រឹត្តិការណ៍ប្រកួតកីឡា SEA Games លើកទី២៨ នៅប្រទេសសិង្ហបុរីបានអនុម័តដាក់បញ្ចូលឱ្យមានប្រភេទកីឡាទ្រីយ៉ាត្លុងចូលរួមនៅឆ្នាំ២០១៥ តែសហព័ន្ធកីឡាទ្រីយ៉ាត្លុងកម្ពុជាមិនដឹងថា មានសំណាងបានចូលរួមដែរឬក៏អត់នោះទេ បុ៉ន្តែយើងត្រូវតែហ្វឹកហាត់ត្រៀមខ្លួនជានិច្ចដដែល ជាពិសេសគឺការប្រមូលផ្តុំធនធានមនុស្សតែម្តង ។
អ្វីដែលកាន់តែធ្វើឱ្យសហព័ន្ធកីឡាទ្រីយ៉ាត្លុងកម្ពុជាមានមោទនភាពខ្លាំងនោះ គឺនៅពាក់កណ្តាលឆ្នាំ២០១៤ ខាងមុខនេះ ក្រសួងបានអនុញ្ញាតឱ្យសហព័ន្ធរៀបចំព្រឹត្តិការណ៍ប្រកួតលក្ខណៈថ្នាក់ជាតិរយៈពេល៣ថ្ងៃជាប់គ្នាដើម្បីជ្រើសរើសរកកីឡាករ-កីឡាការិនី ដែលមានសមត្ថភាពពិតប្រាកដ (ជម្រើសជាតិ) មកធ្វើការហ្វឹកហាត់រួមគ្នាត្រៀមធ្វើការប្រកួតលក្ខណៈអន្តរជាតិផ្សេងៗទៀត ។ លោកងិន សុបញ្ញា បានបន្តថា សម្រាប់ការប្រកួតថ្នាក់ជាតិឆ្នាំនេះ គឺជាលើកទី២ហើយ ហើយជាលើកដំបូងផងដែរ ដែលសហព័ន្ធនឹងរៀបចំជាលក្ខណៈទ្រង់ទ្រាយធំក្នុងរយៈពេល៣ថ្ងៃតាមការអនុញ្ញាតរបស់ក្រសួង ខណៈកាលពីឆ្នាំ២០១៣ រៀបចំត្រឹមតែ១ថ្ងៃបុ៉ណ្ណោះ ។ លោកសង្ឃឹមថា កីឡាទ្រីយ៉ាត្លុងនឹងទទួលបានការគាំទ្រកាន់តែច្រើនក្នុងរយៈពេលដ៏ខ្លីខាងមុខនេះ ។ សូមបញ្ជាក់ថា សហព័ន្ធកីឡាទ្រីយ៉ាត្លុងកម្ពុជា ត្រូវបានបង្កើតឡើងតាំងពីឆ្នាំ២០០៩ មកម៉្លេះ បុ៉ន្តែប្រជាជនកម្ពុជាចាប់ផ្តើមស្គាល់ជាទូទៅ ក៏ដូចជាមានសកម្មភាពកាន់តែផុសផុលនៅដើមឆ្នាំ២០១២ ។
ដោយសារការខិតខំប្រឹងប្រែងរបស់ប្រធានសហព័ន្ធដែលមានលោកឧកញ៉ា គង់ ឫទ្ធិជព្វ នោះរហូតមកដល់បច្ចុប្បន្ននេះឃើញថា កីឡាទ្រីយ៉ាត្លុងត្រូវបានប្រជាជនទូទាំងប្រទេសស្គាល់កាន់តែច្រើនតាំងពីមិនទាន់មានគេស្គាល់សោះ រហូតដល់មានច្រើនក្លិប ។ សព្វថ្ងៃនេះសហព័ន្ធមានក្លិបចូលរួមជិត១០ក្លិបហើយក្នុងនោះរួមមាន ក្លិបរិទ្ធីសែន, អង្គការមិត្តសម្លាញ់, ក្លិបធនធានមនុស្ស, ក្លិបតាខ្មៅ និងក្លិបភូមិឫស្សី ។ល។ សម្រាប់ប្រភេទកីឡាទ្រីយ៉ាត្លុងនេះមានបែកចែកចេញជា៣គឺ ១-ទ្រីយ៉ាត្លុងជាឈុតធំដែលអត្តពលិកម្នាក់លេង៣វិញ្ញាសា (ហែលទឹក+ជិះកង់+រត់ប្រណាំង) ២-ឌូអាត្លុង ដែលកីឡាករម្នាក់លេងតែ២វិញ្ញាសាទេ (ជិះកង់+រត់ប្រណាំង) បុ៉ន្តែលេង៣ដំណាក់កាលដែរ ដោយទី១ រត់ បន្ទាប់មកជិះកង់ រួចមករត់បន្តទៀត និង ៣-អាគ័រត្លុងដែលកីឡាករម្នាក់ត្រូវលេង២វិញ្ញាសាដូចគ្នា បុ៉ន្តែមានតែហែលទឹក និងរត់ប្រណាំងបុ៉ណ្ណោះ ៕
ចែករំលែកព័តមាននេះ