ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា អាជ្ញាធរជាតិអប្សរាបានទុករយៈពេល៤៥ថ្ងៃ ចាប់ពីថ្ងៃជូនដំណឹងទី១៣ ខែសីហា ឆ្នាំ២០១៩នេះ ដើម្បីឱ្យអាជីវករ និងភ្ញៀវទេសចរណ៍បញ្ឈប់សកម្មភាពក្រាលកន្ទេល ដាក់អង្រឹង…
ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា អាជ្ញាធរជាតិអប្សរាបានទុករយៈពេល៤៥ថ្ងៃ ចាប់ពីថ្ងៃជូនដំណឹងទី១៣ ខែសីហា ឆ្នាំ២០១៩នេះ ដើម្បីឱ្យអាជីវករ និងភ្ញៀវទេសចរណ៍បញ្ឈប់សកម្មភាពក្រាលកន្ទេល ដាក់អង្រឹង និងសម្ភារៈផ្សេងៗនៅជុំវិញបរិវេណត្រពាំងសេះ មុខប្រាសាទព្រហ្មកិល និងលើវាលស្មៅជុំវិញកសិន្ទប្រាសាទអង្គរវត្ត ដើម្បីលើកកម្ពស់ និងតម្លៃលេចធ្លោជាសកលនៃរមណីយដ្ឋានអង្គរផងដែរ។
យោងតាមសេចក្តីជូនដំណឹងរបស់អាជ្ញាធរជាតិអប្សរា នៅថ្ងៃទី១៣ ខែសីហា ឆ្នាំ២០១៩នេះ បានបង្ហាញថា បច្ចុប្បន្នមានបងប្អូនអាជីវករ និងភ្ញៀវទេសចរណ៍មួយចំនួនបានទៅក្រាលកន្ទេល ដាក់អង្រឹង និងសម្ភារៈផ្សេងៗនៅបរិវេណជុំវិញត្រពាំងសេះ មុខប្រាសាទព្រហ្មកិល និងនៅលើវាលស្មៅជុំវិញកសិន្ទប្រាសាទអង្គរវត្ត ដើម្បីពិសារអាហារ និងលំហែ។ សកម្មភាពទាំងនេះ បានប៉ះពាល់ដល់គុណតម្លៃនៃបេតិកភណ្ឌវប្បធម៌ ក៏ដូចជាប៉ះពាល់ដល់បរិស្ថាន និងសណ្តាប់ធ្នាប់សាធារណៈនៃរមណីដ្ឋានអង្គរផងដែរ។
កន្លងមក ក្រុមការងារអាជ្ញាធរជាតិអប្សរា បានសហការជាមួយអង្គភាពនគរបាលការពារបិតិកភណ្ឌ និងអាជ្ញាធរមូលដ្ឋាន ដើម្បីធ្វើការណែនាំឱ្យពួកគាត់បញ្ឈប់សកម្មភាពទាំងនេះ ប៉ុន្តែ នៅតែមានបងប្អូនអាជីវករ និងភ្ញៀវទេសចរណ៍មួយចំនួនមិនព្រមបញ្ឈប់សកម្មភាពទាំងនោះទេ ដោយយកតែប្រយោជន៍បុគ្គលជាចម្បង។ ក្នុងន័យនេះ ដើម្បីលើកកម្ពស់ និងតម្លៃលេចធ្លោជាសកលនៃរមណីយដ្ឋានអង្គរ ក៏ដូចជាកិត្តិយសជាតិ អាជ្ញាធរជាតិអប្សរា សូមឱ្យបងប្អូនអាជីវករ និងភ្ញៀវទេសចរណ៍ទាំងអស់ ចូលរួមសហការបញ្ឈប់សកម្មភាព ក្រាលកន្ទេល ដាក់អង្រឹង និងសម្ភារៈផ្សេងៗនៅជុំវិញបរិវេណត្រពាំងសេះ មុខប្រាសាទព្រហ្មកិល និងលើវាលស្មៅជុំវិញកសិន្ទប្រាសាទអង្គរវត្ត ដើម្បីលើកកម្ពស់ និងតម្លៃលេចធ្លោជាសកលនៃរមណីយដ្ឋានអង្គរផងដែរ។
សូមបញ្ជាក់ផងដែរថា កាលពីពេលថ្មីៗនេះ លោក ហង់ ពៅ អគ្គនាយកអាជ្ញាធរជាតិអប្សរា រួមនឹងសហការីបានអញ្ជើញចុះពិនិត្យវឌ្ឍនភាពនៃការត្រៀមរៀបចំដាំស្មៅ និងដើមឈើឡើងវិញនៅទីតាំងអតីតចំណតរថយន្តបណ្តោះអាសន្ន ត្រូវបានបញ្ឈប់ប្រតិបត្តិការចាប់ពីថ្ងៃទី១ ខែសីហា ឆ្នាំ២០១៩នេះតទៅ ដោយតម្រូវឱ្យរថយន្តគ្រប់ប្រភេទទៅចូលចតនៅចំណតរថយន្តដែលកសាងរួចរាល់នៅផ្នែកខាងលិចប្រមាណ២០០ម៉ែត្រ។ ព្រមទាំងពិនិត្យមើលការងារមួយចំនួនពាក់ព័ន្ធផែនការរៀបចំសោភណ្ឌភាពទីតាំងមុខប្រាសាទអង្គរវត្តនាពេលអនាគតផងដែរ។
សូមអានសេចក្តីជូនដំណឹងរបស់អាជ្ញាធរជាតិអប្សរានៅខាងក្រោមដូចតទៅ ៖
ចែករំលែកព័តមាននេះ