រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំឈានទៅដណ្តើមខ្សែក្រវាត់ជើងឯកស្រាបៀរភ្នំពេញនៅលើសង្វៀន CTN ថ្ងៃព្រហស្បតិ៍ ទី២៧ កុម្ភៈ ខាងមុខនេះ ឈានចូលដល់សប្តាហ៍ទី៣ ហើយ ។
រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំឈានទៅដណ្តើមខ្សែក្រវាត់ជើងឯកស្រាបៀរភ្នំពេញនៅលើសង្វៀន CTN ថ្ងៃព្រហស្បតិ៍ ទី២៧ កុម្ភៈ ខាងមុខនេះ ឈានចូលដល់សប្តាហ៍ទី៣ ហើយ ។ កីឡាករដែលជាបេក្ខភាពត្រូវឡើងប្រកួតនៅពេលនោះមាន អាន មុន្នី មកពីសមាគមយុវជនកម្ពុជាខណ្ឌមានជ័យ ជួបជាមួយ ទឹម សុជាតិ មកពីក្លិបកងរាជអាវុធហត្ថរាជធានីភ្នំពេញ ចំណែក គឿម សុវណ្ណឌឿត មកពីក្លិបមោងឫស្សីមរតកគុនខ្មែរ ជួបជាមួយ កែវ សុផានិត មកពីក្លិបសំរោងកោងកីឡាខេត្តបាត់ដំបង ។
រវាង អាន មុន្នី និង ទឹម សុជាតិ សុទ្ធតែជាអ្នកចាញ់ការប្រកួតនៅលើកទី១ ដូចគ្នា ដូច្នេះលើកនេះពួកគេត្រូវការឈ្នះដើម្បីសន្សំពិន្ទុឡើងទៅប្រកួតនៅវគ្គបន្ត ។ តាមការកត់សម្គាល់ អាន មុន្នី ទន់ជ្រាយផ្នែកកម្លាំងបន្តិចមែន បុ៉ន្តែការប្រើស្នៀតកែង និងជង្គង់ គឺស្ទាត់ជំនាញគ្រាន់បើ រីឯចិត្តរបស់គេក៏សឿងណាស់ដែរ ។ ចំណែកឯ ទឹម សុជាតិ ស្នៀតកែងនិងជង្គង់អាចប្រើការបាន គ្រាន់តែមិនសូវស្ទាត់ជំនាញបុ៉ណ្ណោះ ។ ចំណែកឯស្នៀតកណ្តាប់ដៃ និងស្នៀតជើងរបស់គេពេលវាយចេញម្តងៗមានទម្ងន់ធ្ងន់ ទាស់តែចលនាវាយចេញរបស់គេរាងយឺតយ៉ាវបន្តិចបុ៉ណ្ណោះ ហើយកម្លាំងតតាំងបានល្អបំផុតនៅត្រឹមទឹកទី៣ ។ ទោះជាយ៉ាងណា សម្រាប់ការជួបគ្នាលើកនេះមិនទាន់ដឹងថា ខាងណាមានសំណាងរកបាន៣ពិន្ទុមុនឡើយ ។
គឿម សុវណ្ណឌឿត និងកែវ សុផានិត ដែលសុទ្ធតែជាអ្នកឈ្នះ១ប្រកួតម្នាក់រួចមកហើយនោះ ពេលនេះពួកគេមានមហិច្ឆតាចង់ឈ្នះរៀងខ្លួនដើម្បីទទួលបាន៣ពិន្ទុបន្ថែមទៀត គ្រាន់តែគេមិនទាន់ដឹងមុនថា អ្នកណាមានសំណាងជាងអ្នកណានោះឡើយ ។ គឿម សុវណ្ណឌឿត បើនិយាយពីល្បិចប្រយុទ្ធនៅលើសង្វៀនរបស់គេ គឺល្អគួរសមទាំងស្នៀតកែង និងជង្គង់អាចយកជាការបាន ឯចិត្តក៏សឿងណាស់ដែរ បុ៉ន្តែចលនានៃការវាយចេញរបស់គេ គឺយឺតយ៉ាវខ្លាំងណាស់ ។ ឯ កែវ សុផានិត ក្រៅពីមានកម្លាំងខ្លាំង ស្នៀតប្រយុទ្ធនៅលើសង្វៀនរបស់គេគឺមិនចាញ់ គឿម សុវណ្ណឌឿត បុ៉ន្មានឡើយ ជាពិសេសផ្លែជង្គង់របស់គេអាចប្រើការបានយ៉ាងស្ទាត់ជំនាញបំផុត គ្រាន់តែចិត្តរបស់គេរាងតូចបន្តិចបុ៉ណ្ណោះ ។
ទោះបីយ៉ាងណា ការជួបគ្នារវាងពួកគេទាំង២លើកនេះ គ្មាននរណាហ៊ានទាយទុកមុនពីលទ្ធផលចាញ់-ឈ្នះបានឡើយ តែគូនេះគេហ៊ាននិយាយមុនថា នឹងមានការតតាំងគ្នាយ៉ាងស្វិតស្វាញមិនខាន ដោយសារម្នាក់ៗសុទ្ធតែប្តេជ្ញាថា នឹងយកឈ្នះគូប្រកួតឱ្យទាល់តែបាន ទោះបីមានការវិភាគផ្អៀងទៅលើភាគីណាមួយក៏ដោយ ៕
ចែករំលែកព័តមាននេះ