រាជធានីភ្នំពេញ ៖ មកទល់ពេលនេះមានរយៈពេលកន្លះខែហើយ ដែលលោកគ្រូតាក្រមាមាស សាន គឹមស៊ាន បានចាកចេញពីប្រទេសកម្ពុជាទៅអាមេរិក ក្នុងបំណងស្វែងរកជំនួយអន្តរាគមន៍ដើម្បីឱ្យក្បាច់គុនល្បុក្កតោកម្ពុជាមានឱកាសឈរជើង និងពង្រីកខ្លួននៅទីនោះ ។
រាជធានីភ្នំពេញ ៖ មកទល់ពេលនេះមានរយៈពេលកន្លះខែហើយ ដែលលោកគ្រូតាក្រមាមាស សាន គឹមស៊ាន បានចាកចេញពីប្រទេសកម្ពុជាទៅអាមេរិក ក្នុងបំណងស្វែងរកជំនួយអន្តរាគមន៍ដើម្បីឱ្យក្បាច់គុនល្បុក្កតោកម្ពុជាមានឱកាសឈរជើង និងពង្រីកខ្លួននៅទីនោះ ។ ការប្រឹងប្រែងនេះធ្វើឱ្យមន្ត្រីសហព័ន្ធកីឡាមួយនេះរំពឹងទុកថា ល្បុក្កតោដែលជាក្បាច់គុនដ៏ខ្លាំងរបស់ខ្មែរនឹងមានឱកាសបង្ហាញវត្តមានជាលើកដំបូងនៅលើទឹកដីអាមេរិកមិនយូរមិនឆាប់ ។
អ្នកនាំពាក្យរបស់លោកគ្រូសាន គឹមស៊ាន បានប្រាប់កោះសន្តិភាពឱ្យដឹងថា លោកគ្រូបានចាកចេញទៅកាន់ទឹកដីអាមេរិករយៈពេលច្រើនថ្ងៃមកហើយ ដើម្បីស្វះស្វែងរកកិច្ចអន្តរាគមន៍ពីសំណាក់តំណាងធំៗរបស់សហគមន៍ខ្មែរដើម្បីឱ្យជួយជ្រោមជ្រែងចំពោះលោកគ្រូ និងកីឡាករ កីឡាការិនីល្បុក្កតោកម្ពុជាឱ្យមានលទ្ធភាពឈរជើងពង្រីកក្បាច់គុននេះលើទឹកដីអាមេរិក ។ អ្នកស្រី អ៊ុក ពង្សបុប្ផា ភរិយារបស់លោកគ្រូតាក្រមាមាស សាន គឹមស៊ាន ដែលជាអ្នកលើកទូរស័ព្ទជំនួសបានថ្លែងឱ្យដឹងថា ស្វាមីរបស់អ្នកស្រីបានចាកចេញទៅកាន់ទឹកដីអាមេរិកអស់រយៈពេលច្រើនថ្ងៃមកហើយ បន្ទាប់ពីលោកគ្រូទទួលការអញ្ជើញដើម្បីធ្វើកិច្ចទំនាក់ទំនងរវាងកីឡាករល្បុក្កតោដោយផ្ទាល់ជាមួយនឹងប្រជាពលរដ្ឋរស់នៅទីនោះ ដែលមួយចំនួនធំគឺជាជនជាតិខ្មែរ ។ ការចាកចេញទៅនោះមិនទាន់ដឹងថា គាត់នឹងវិលត្រឡប់មកវិញនៅថ្ងៃណានៅឡើយទេ ដោយសារតែលោកគ្រូមានបំណងស្វែងរកការអន្តរាគមន៍ឱ្យបំណងខាងលើបានសម្រេចក្នុងអំឡុងនៃការស្នាក់នៅនេះ ។
នេះគឺជាសញ្ញាវិជ្ជមានថ្មីមួយបន្ទាប់ពីក្បាច់គុនល្បុក្កតោបានបង្កើតឡើងជាសហព័ន្ធ និងមានការទទួលស្គាល់យ៉ាងទូលំទូលាយនៅលើសាកលលោក បុ៉ន្តែនៅមិនទាន់មានសំណាងបានបង្ហាញខ្លួននៅលើទឹកដីអាមេរិក ។ តាមការឱ្យដឹង ក្បាច់គុនបុរាណខ្មែរចាប់ផ្តើមមានកំណើតបង្កើតជាក្លិបហ្វឹកហាត់ពីសំណាក់កូនខ្មែរ និងបរទេសដែលរស់នៅលើប្រទេសដែលមានខ្មែររស់នៅកាន់តែច្រើននាពេលចុងក្រោយ ។ បុ៉ន្តែសម្រាប់សហរដ្ឋអាមេរិកនៅមិនទាន់មានកីឡាពីបុរាណណាមួយកើតឡើងនៅឡើយទេ ដោយសារតែគ្មានការជ្រោមជ្រែងពីខ្មែររស់នៅទីនោះ និងពុំមានអ្នកជំនាញដើម្បីបង្កើតជាក្លិបបែបនោះនៅឡើយ ។ ជាក់ស្តែង សម្រាប់ក្បាច់គុនល្បុក្កតោ គឺរឹតតែឆ្ងាយទៅទៀត ខណៈដែលក្បាច់គុនរបស់ប្រទេសផ្សេងដូចជា ប្រដាល់ថៃជាដើមកំពុងចាប់ផ្តើមវាយលុកទីផ្សារសហរដ្ឋអាមេរិក ។ អ្នកស្រី អ៊ុក ពង្សបុប្ផា បញ្ជាក់ថា ស្វាមីអ្នកស្រីសម្លឹងឃើញសន្ទុះដើរទៅមុខរបស់ល្បុក្កតោកម្ពុជានៅលើទឹកដីអាមេរិកយូរមកហើយ ដោយសារតែនៅទីនោះមានអ្នកចេះដឹងច្រើន និងមានកូនចៅខ្មែរដែលមានការចង់ដឹងចង់យល់ពីកេរដំណែលរបស់ខ្មែរកាន់តែច្រើន ។
ទោះយ៉ាងណា លោកគ្រូមិនមានបំណងចាកចេញពីកម្ពុជា ហើយទៅបង្កើតក្លិបគុនល្បុក្កតោនៅប្រទេសហ្នឹងនោះទេ គឺគ្រាន់តែស្វែងរកកិច្ចអន្តរាគមន៍ដើម្បីឱ្យកីឡាករ កីឡាការិនីល្បុក្កតោកម្ពុជាមានឱកាសបានឡើងទៅបង្ហាញក្បាច់គុនដូចកាលនៅបារាំងកន្លងមក និងស្វែងរកអ្នកដែលចេះក្បាច់គុនមួយនេះខ្លះៗ ឱ្យពួកគេបង្កើតជាក្លិបដើម្បីឱ្យកូនខ្មែររស់នៅសហរដ្ឋអាមេរិកបានយល់ដឹងពីក្បាច់គុនរបស់ខ្មែរតែបុ៉ណ្ណោះ ។ ដូចគ្នានឹងការបញ្ជាក់នេះ លោកគ្រូតាក្រមាមាសធ្លាប់បានបញ្ជាក់ថា នៅក្នុងប្រទេសបារាំង ក្បាច់គុនបុរាណខ្មែរមានការបង្កើតជាក្លិប និងជាសមាគមបានច្រើនកន្លែងរួចមកហើយ បន្ទាប់ពីលោកគ្រូបានអញ្ជើញឱ្យអ្នកចាប់អារម្មណ៍ក្បាច់គុនទាំងនោះមកហ្វឹកហាត់នៅស្រុកខ្មែរ និងបានបញ្ជូនគ្រូគុនផ្នែកក្បាច់គុនមួយនេះឱ្យទៅបង្ហាត់សិស្សគុនដល់ទឹកដីបារាំងដោយផ្ទាល់ ។ អុីចឹងហើយ ទើបលោកគ្រូមានបំណងចង់ឱ្យក្លិបក្បាច់គុនដដែលនេះមានរូបរាងឡើងនៅលើទឹកដីសហរដ្ឋអាមេរិក និងមានកូនខ្មែរកាន់តែច្រើនដែលរស់នៅទីនោះផ្តោតការជ្រោមជ្រែងចំពោះល្បុក្កតោកម្ពុជា ដែលមកទល់ពេលនេះកាន់តែមានការទទួលស្គាល់ ។ អ្នកនាំពាក្យរបស់លោកពោលថា មកទល់ពេលនេះដំណើរស្វែងរកការអន្តរាគមន៍របស់លោកគ្រូ បានទទួលការចាប់អារម្មណ៍យ៉ាងច្រើន ដោយក្នុងពេលដ៏ខ្លីពិតជាមានកូនខ្មែរដែលរស់នៅទីនោះចុះមកហ្វឹកហាត់ឱ្យបានចេះស្ទាត់ ដើម្បីយកទៅបើកជាសាលាគុនទុកបង្ហាត់កូនខ្មែរដែលរស់នៅលើទឹកដីអាមេរិកដូចនៅក្នុងប្រទេសបារាំងជាក់ជាមិនខានឡើយ ។
បន្ថែមពីលើការរំពឹងទុកនេះ កីឡាករ កីឡាការិនីល្បុក្កតោខ្មែរពិតជាអាចឡើងទៅជាក្រុមក្នុងរូបភាពទៅបង្ហាញក្បាច់គុនដ៏ចំណាស់របស់ខ្មែរ ដើម្បីឱ្យបងប្អូនដែលរស់នៅលើទឹកដីអាមេរិកបានឃើញដោយផ្ទាល់ភ្នែក មិនយូរមិនឆាប់ដូចគ្នា ។ អ្នកស្រីមានប្រសាសន៍ថា បើល្បុក្កតោកម្ពុជាមានឱកាសបានទៅបង្ហាញខ្លួននៅទីនោះមែន ពិតជាទទួលបានការចាប់អារម្មណ៍ខ្លាំងមិនខាន ហើយឱកាសចង់បង្កើតជាក្លិបហ្វឹកហាត់នៅលើទឹកដីសហរដ្ឋអាមេរិក ក៏មិនមែនជារឿងលំបាកនោះដែរ ។ លោកគ្រូតាក្រមាមាស សាន គឹមស៊ាន នៅមិនទាន់កំណត់ថ្ងៃវិលត្រឡប់ពីអាមេរិកនៅឡើយទេ បុ៉ន្តែបើតាមភរិយារបស់លោកអះអាង គឺលោកគ្រូនឹងវិលត្រឡប់មកវិញឆាប់ៗ ព្រមជាមួយនឹងក្តីរំពឹងមួយថ្មីដែលអាចឱ្យល្បុក្កតោកម្ពុជាមានឱកាសបង្ហាញខ្លួននៅទីនោះ ដូចនៅប្រទេសបារាំង កូរ៉េ វៀតណាម ម៉ាឡេស៊ី និងបណ្តាប្រទេសមួយចំនួនទៀត ។ លទ្ធផលដែលរំពឹងនោះ ក៏ពិតជាធ្វើឱ្យល្បុក្កតោកម្ពុជាអាចបន្តដំណើរទៅកាន់ប្រទេសកាណាដា និងបណ្តាប្រទេសក្បែរខាងផ្សេងទៀត ដែលសម្បូរពលរដ្ឋខ្មែររស់នៅទីនោះផងដែរ ។
អ្នកស្រី អ៊ុក ពង្សបុប្ផា ប្រាប់ថា ជារឿងស្តាយណាស់ដែលស្វាមីរបស់អ្នកស្រីបានទទួលការអញ្ជើញឱ្យទៅទីនោះតែម្នាក់ឯង បើទៅជាមួយសិស្សគុន គឺពិតជាបានបង្ហាញក្បាច់គុនក្នុងពេលស្នាក់នៅរយៈពេលយូរនេះតែម្តង ដើម្បីឱ្យកាន់តែមានលទ្ធផលវិជ្ជមានក្នុងការទាក់ទាញប្រជាជនអាមេរិកឱ្យផ្តោតការជួយជ្រោមជ្រែងដល់គុនខ្មែរមួយនេះឱ្យមានវត្តមាននៅសហរដ្ឋអាមេរិកក្នុងពេលដ៏ខ្លី ៕
ចែករំលែកព័តមាននេះ