ប្រភពព័ត៌មានថៃផ្សាយថា លោកស្រី យីងឡាក់ សីុណាវា៉ត្រា នាយករដ្ឋមន្ត្រីចាំផ្ទះ និងជារដ្ឋមន្ត្រីក្រសួងការពារជាតិថៃ បានផ្តល់បទសម្ភាសន៍លើករណីដែលក្រុមបាតុករចោទថា អំពើហិង្សាដែលកើតឡើងកន្លងមកគឺជាទង្វើរបស់រដ្ឋាភិបាល ដោយលោកស្រីបញ្ជាក់ថា ខ្ញុំសូមចូលរួមសម្តែងការសោកស្តាយជាមួយញាតិមិត្តរបស់អ្នកស្លាប់ និងរបួសក្នុងហេតុការណ៍ដែលកើតឡើងនៅខេត្តត្រាត រួមទាំងការផ្ទុះនៅបរិវេណទីលានរាជប្រាស៊ុង ។
ខ្ញុំសូមធ្វើការព្រមានចំពោះទង្វើហិង្សាខាងលើ និងបញ្ជាឱ្យអាជ្ញាធរមានសមត្ថកិច្ចត្រូវតាមចាប់ជនល្មើសមកកាត់ទោសតាមផ្លូវច្បាប់ ។តាមសម្តីរបស់លោកស្រី យីងឡាក់ សីុណាវា៉ត្រា ថា «ហេតុការណ៍នេះជាទង្វើគួរឱ្យរន្ធត់ ដែលពុំគួរឱ្យកើតឡើងក្នុងប្រទេសបន្តទៀត ។ យើងមិនចង់ឃើញហេតុការណ៍បែបនេះទេ ហើយរដ្ឋាភិបាលកំពុងព្យាយាមការពារសន្តិសុខយា៉ងអត់ធ្មត់ និងស្នើដល់គ្រប់ភាគីទាំងអស់កុំប្រព្រឹត្តបណ្តាអំពើអមនុស្សធម៌» ។
ទាក់ទិននឹងស្ថានការណ៍ដែលក្រុមអ្នកតវា៉តាមប្រមាញ់ លោកស្រី យីងឡាក់ នៅគ្រប់ទិសទីដែលអូសបន្លាយពេលដ៏យូរ ត្រូវបានអ្នកសារព័ត៌មានសាកសួរថា តើលោកស្រីមានអារម្មណ៍បែបណា? នាយករដ្ឋមន្ត្រីថៃថ្លែងថា ខ្ញុំមានអារម្មណ៍ដក់ជាប់ក្នុងចិត្តជារៀងរហូត រួចមកដល់ថ្ងៃនេះខ្ញុំនៅតែប្តេជ្ញាការពារប្រជាធិប តេយ្យ ។ មនុស្សជាច្រើនចង់ឱ្យខ្ញុំលាលែង ប៉ុន្តែសួរថាតើការលាលែងអាចដោះស្រាយបញ្ហាបានដែរឬអត់ ? បើសិនការលាលែងដើម្បីបើកចំហផ្លូវ និងផ្តល់ឱកាសឱ្យមានវិសោធនកម្មរដ្ឋធម្មនុញ្ញ ដោយគ្មានលក្ខណៈប្រជាធិបតេយ្យ តើឱ្យខ្ញុំប្រតិបត្តិតាមដូចម្តេចកើតទៅ ? ខ្ញុំមានតួនាទីជាពលរដ្ឋម្នាក់ ហើយក្នុងនាមជាថ្នាក់ដឹកនាំរដ្ឋាភិបាលត្រូវថែរក្សាប្រជាធិបតេយ្យ ត្រូវបង្កើតរដ្ឋាភិបាលថ្មី និងយល់ព្រមសហការជាមួយគ្រប់ភាគី សូមឱ្យភាគីទាំងអស់ជួយគ្នាគិត និងដោះស្រាយបញ្ហារួមគ្នាដែលនោះជាយុទ្ធសាស្ត្រដ៏ល្អនៅក្នុងប្រទេសជាតិ ។
អ្នកសារព័ត៌មានបានចោទសួរបន្តទៀតថា កន្លងមករមែងមានពាក្យចចាមអារ៉ាមថា មានរដ្ឋប្រហារ ប្រសិនបើមានពិត តើលោកស្រីយល់ព្រមឱ្យចាប់ខ្លួនឬអត់ ? នាយករដ្ឋមន្ត្រីឆ្លើយទាំងស្រក់ទឹកភ្នែកថា «ខ្ញុំនឹងបំពេញតួនាទីរបស់ខ្ញុំរហូតដល់ទីបំផុត» ។ ស្របពេលជាមួយគ្នានេះដែរ សារព័ត៌មានថៃផ្សាយថា នាវេលារំលងអធ្រាត្រថ្ងៃទី២៥ កុម្ភៈ មានឮសំឡេងផ្ទុះជាច្រើនលើកនៅជុំវិញបរិវេណទីលានរបស់ក្រុមអ្នកតវ៉ាត្រង់ផ្លូវបំបែកស៊ីលុម និងតាមព័ត៌មានដំបូងថា កងសន្ដិសុខរបស់ក្រុមបាតុកររងរបួសចំនួន២នាក់ បញ្ជូនទៅសង្គ្រោះបន្ទាន់នៅឯមន្ទីរពេទ្យក្រុងបាងកក។ បាតុកម្មរបស់ក្រុមអ្នកតវ៉ានៅក្រុងបាងកកបច្ចុប្បន្នកំពុងបង្កចលាចល និងអសន្ដិសុខដែលបានអូសបន្លាយពេលជាង២ខែមកហើយ ៕
ចែករំលែកព័តមាននេះ