មជ្ឈមណ្ឌលសង្គ្រោះបន្ទាន់ Erawan នៃរដ្ឋបាលក្រុងបាងកក រាយការណ៍កាលពីថ្ងៃទី២៤ កុម្ភៈ ថា សរុបមនុស្ស២០នាក់បានត្រូវស្លាប់ ហើយមនុស្ស៧១៨នាក់ ត្រូវរបួសដោយសារអំពើហិង្សានយោបាយនៅក្រុងបាងកករាជធានីថៃចាប់តាំងពីថ្ងៃទី៣០ វិច្ឆិកា មក។ក្នុងចំណោមអ្នកស្លាប់ចុងក្រោយមានក្មេងស្រីអាយុ៦ឆ្នាំម្នាក់ ដែលត្រូវរបួសធ្ងន់ក្នុងការផ្ទុះគ្រាប់បែកមួយគ្រាប់ កាលពីរសៀលថ្ងៃទី២៣ កុម្ភៈ នៅក្រុងបាងកក ហើយត្រូវស្លាប់នាព្រឹកថ្ងៃទី២៤ កុម្ភៈ ព្រមទាំងប៉ូលិសម្នាក់ដែលរងរបួសធ្ងន់ពេលមានការប៉ះទង្គិចគ្នាជាមួយពួកបាតុករប្រឆាំងរដ្ឋាភិបាល កាលពីថ្ងៃទី១៨ កុម្ភៈ ។
នាយករដ្ឋមន្ត្រីចាំផ្ទះថៃ លោកស្រី យីងឡាក់ ស៊ីណាវ៉ាត្រា កាលពីយប់ ថ្ងៃទី២៣ កុម្ភៈ បានថ្កោលទោសការប្រើអំពើហិង្សាដែលបណ្តាលឱ្យមនុស្សស្លាប់ជាច្រើននាក់ ពិសេសបំផុតគឺកុមារ ។ ចំណែកទាហានថៃម្នាក់ត្រូវបានគេបាញ់សម្លាប់កាលពីព្រឹកថ្ងៃទី២៤ កុម្ភៈ នៅក្រុងបាងកក តែពុំមានការបញ្ជាក់ថាតើឧប្បត្តិហេតុនេះ មានជាប់ទាក់ទិននឹងសភាពការណ៍នយោបាយបច្ចុប្បន្នដែរឬយ៉ាងណាឡើយ ៕
ចែករំលែកព័តមាននេះ