មហាសេដ្ឋីចែករំលែកគន្លឹះជួយឱ្យអ្នករកចំណូលបន្ថែម
លោក Josh Altman ដែលជាភ្នាក់ងារអចលនទ្រព្យដ៏ជោគជ័យមួយរូបក្នុងសហរដ្ឋអាមេរិក និងជាមហាសេដ្ឋី ព្រមទាំងជាអ្នកនិពន្ធសៀវភៅ The Altman Close បានប្រាប់ថា…
លោក Josh Altman ដែលជាភ្នាក់ងារអចលនទ្រព្យដ៏ជោគជ័យមួយរូបក្នុងសហរដ្ឋអាមេរិក និងជាមហាសេដ្ឋី ព្រមទាំងជាអ្នកនិពន្ធសៀវភៅ The Altman Close បានប្រាប់ថា ការជួបគ្នាដំបូង គឺពិតជាសំខាន់ណាស់ និងអាចប៉ះពាល់ដល់ការឆ្លើយតបរបស់អ្នកដទៃលើអ្នក ។
លោកបានបន្តថា កត្តាសំខាន់នៃការធ្វើឲ្យអតិថិជនអ្នកជឿជាក់អ្នក និងជោគជ័យក្នុងអាជីវកម្ម គឺការយល់ដឹងពីសារៈសំខាន់នៃការជួបគ្នាដំបូង ហើយលោកបានចែករំលែកវិធានខាងក្រោមដែលអាចជួយឲ្យការជួបគ្នាលើកដំបូងរបស់អ្នក និងអតិថិជន ឬវិនិយោគិនកើតមានឡើងដោយរលូន និងនាំភាពជោគជ័យដល់អ្នកនៅថ្ងៃក្រោយ ។
១. កុំមានអំនួតលើខ្លួនឯង ៖ អំនួតធ្វើឲ្យកិច្ចសន្ទនាត្រូវបានបញ្ចប់លឿន ព្រោះគ្មាននរណាចង់និយាយជាមួយមនុស្សម្នាក់ទៀត ដែលប្រៀបបានកំពុងតែប្រកួតប្រជែងជាមួយខ្លួនទេ ។ អ្នកត្រូវចាំថា អ្នកមិនមែនប្រកួតប្រជែងជាមួយអ្នកដែលអ្នកសន្ទនាជាមួយឡើយ គឺអ្នកចង់ស្វែងរកឱកាសដើម្បីសហការគ្នា ។ ដូច្នេះអ្នកត្រូវតែប្រុងប្រយ័ត្ន និងមិនអួតអាងប្រាប់ដៃគូសន្ទនារបស់អ្នក បើទោះជាភាគីម្ខាងទៀតកំពុងតែអួតអាងដាក់អ្នកក៏ដោយ ។
២. ការស្តាប់ ៖ អ្នកត្រូវតែយកចិត្តទុកដាក់ស្តាប់រាល់ពាក្យសម្តីដែលចេញពីមាត់របស់ដៃគូសន្ទនាមិនថា អ្នកមិនចាប់អារម្មណ៍ប៉ុណ្ណាឡើយ ព្រោះអាជីវកម្មរបស់អ្នកពឹងផ្អែកលើដៃគូសន្ទនាអ្នក ។ បើទោះជាភាគីម្ខាងទៀតនិយាយកាត់អ្នកក៏ពិតមែនក្តី អ្នកគួរតែស្តាប់រហូតដល់ពួកគេនិយាយចប់អស់ជាមុនសិន និងព្យាយាមស្គាល់ដៃគូសន្ទនាឲ្យបានច្រើនជាងមុន ដើម្បីគិតពីវិធីចរចាដែលស័ក្កិសមបំផុត ។
៣. ស្វែងរកភាពស្រដៀងគ្នា ៖ ការសិក្សាចិត្តសាស្ត្របានបង្ហាញឲ្យដឹងមកថា មនុស្សគ្រប់រូបចូលចិត្តមនុស្សដែលមានភាពស្រដៀងគ្នានឹងពួកគេ ។ ប្រសិនបើអ្នកនិយាយជាមួយមនុស្សដែលមានសំឡេងស្រទន់ស្លូត នោះអ្នកគួរតែពត់សំឡេងរបស់អ្នកឲ្យស្រទន់តាមដែរ ។ គោលដៅសំខាន់គឺធ្វើឲ្យដៃគូសន្ទនារបស់អ្នកមានអារម្មណ៍ធូរស្រាលពេលដែលនិយាយជាមួយអ្នក ។
៤. សម្លៀកបំពាក់ ៖ សម្លៀកបំពាក់អាចប៉ះពាល់ដល់ការសន្ទនារបស់អ្នកបានព្រោះវាជះឥទ្ធិពលលើសារដែលអ្នកចង់ប្រាប់ដល់ដៃគូសន្ទនា ។ អ្នកគួរតែជ្រើសយកសម្លៀកបំពាក់ដែលសមរម្យ ឬរៀបចំសម្លៀកបំពាក់ផ្លូវការទុកក្នុងការិយាល័យ ឬក្នុងរថយន្ត ដើម្បីត្រៀមខ្លួនសម្រាប់ការជួបនឹងអតិថិជន ឬដៃគូសំខាន់ដែលអ្នកចង់សហការជាមួយ ។
៥. បង្ហាញភាពស្វាហាប់ ៖ ភាពស្វាហាប់ទាក់ទាញអ្នកដទៃឲ្យស្តាប់ និងចង់សន្ទនាជាមួយនឹងអ្នក ។ មិនថា អ្នកអស់កម្លាំងនឿយហត់ ឬមិនស្រួលខ្លួនប៉ុណ្ណាទេ ប្រសិនបើអ្នកចង់ឲ្យការសន្ទនារបស់អ្នកមានផ្លែផ្កានោះ អ្នកត្រូវតែបង្ហាញភាពស្វាហាប់ដល់ដៃគូឲ្យបានឃើញព្រមទាំងញញឹមជានិច្ច ៕ កែសម្រួលដោយ ៖ សុឃាក់
ចែករំលែកព័តមាននេះ