ខេត្តប៉ៃលិន ៖ បុរសម្នាក់បានបាក់.កស្លាប់ភ្លាមៗ នៅនឹងកន្លែង ខណៈជិះម៉ូតូ ១គ្រឿង ឌុបមិត្តភក្តិម្នាក់ទៀតក្នុងល្បឿនលឿនគេចពីរង្វង់មូល ក៏រេចង្កូតទៅខាងស្តាំដៃជ្រុលទៅបុកនឹងរបងផ្ទះប្រជាពលរដ្ឋយ៉ាងពេញទំហឹង បណ្តាលឲ្យអ្នកបើកបរផ្លោងចេញពីម៉ូតូបោកក្បាលផ្ទប់នឹងដីបាក់.កស្លាប់តែម្តង។ ចំណែកមិត្តភក្តិដែលជិះពីក្រោយរងរបួសរយះដៃជើង បែកក្បាលសន្លប់នៅនឹងកន្លែង និងម៉ូតូរងការខូចខាតផ្នែកខាងមុខយ៉ាងដំណំត្រូវយកទៅជួសជុលនៅផ្ទះ។
ហេតុការណ៍គ្រោះថ្នាក់ចរាចរណ៍ខាងលើ បានកើតឡើងកាលពីវេលាម៉ោង ១២ និង ៣០នាទី យប់រំលងអធ្រាត្រឈានចូលថ្ងៃទី២៤ កុម្ភៈ ២០១៤ ស្ថិតនៅក្បែររង្វង់មូលសាលាក្រៅ តាមបណ្តោយផ្លូវជាតិលេខ៥៩ ក្នុងភូមិថ្នល់កែង ឃុំអូរអណ្តូង ស្រុកសាលាក្រៅ។ ជនរងគ្រោះបើកបរម៉ូតូឈ្មោះ ពេជ្រ សុខ ភេទប្រុស អាយុ ២៨ឆ្នាំ ជាកម្មករ មានស្រុកកំណើតរស់នៅភូមិពាមទា ឃុំពាមទា ស្រុកកំពង់ត្របែក ខេត្តព្រៃវែង បើកបរម៉ូតូម៉ាកឌ្រីមស៊េរីឆ្នាំ២០១២ ពណ៌ខ្មៅ គ្មានស្លាកលេខ រងការខូចខូតបែកអាវ និងបែកកញ្ចក់ភ្លើងមុខយ៉ាងដំណំ។
ចំណែកមិត្តភក្តិដែលជិះពីក្រោយឈ្មោះ រិច ភេទប្រុស អាយុ ២៨ឆ្នាំ ដូចគ្នា ជាកម្មករ មានស្រុកកំណើតរស់នៅខេត្តកំពង់ឆ្នាំ រងរបួសរយះដៃជើង និងបែកក្បាល ត្រូវគេយកទៅសង្គ្រោះនៅមន្ទីរពេទ្យបង្អែកខេត្ត បច្ចុប្បន្ន ស្នាក់នៅភូមិទួលខ្ពស់ ឃុំស្ទឹងត្រង់ ស្រុកសាលាក្រៅ។ នៅព្រឹកថ្ងៃដដែល សាកសពជនរងគ្រោះត្រូវបងប្អូនដឹកយកទៅធ្វើបុណ្យនៅភូមិដែលស្នាក់នៅ ហើយដង្ហែយកទៅបូជានៅវត្តរតនសោភ័ណ ហៅវត្តកោងកាង ដោយរើសឆ្អឹងយកទៅធ្វើបុណ្យគម្រប់ ១០០ថ្ងៃ នៅឯស្រុកកំណើត៕
ចែករំលែកព័តមាននេះ