រាជធានីភ្នំពេញ ៖ កាលពីថ្ងៃទី២៣ កុម្ភៈ កន្លងមកនេះ អង្គការភាពញញឹមនៃកុមារ (PSE) ដែលស្ថិតនៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បានរៀបចំការប្រកួតកីឡាបាល់បោះដែលមានឈ្មោះថា «អ្នកជាវីរជន» ក្រោមប្រធានបទ ប្រទេសមួយ គ្រួសារមួយ ដោយទទួលបានការឧបត្ថម្ភពីធនាគារជបុ៉ន ម៉ារ៉ូហាន់ ក្នុងគោលបំណងស្វែងរកថវិកាជួយឧបត្ថម្ភដល់កុមារក្រីក្រចំនួន៥០០នាក់ឱ្យបានចូលរៀនរយៈពេល១ឆ្នាំ ក៏ដូចជាការគាំទ្រដល់ការអប់រំសម្រាប់មនុស្សទូទៅនៅកម្ពុជា ។
ការប្រកួតដែលប្រើពេលមួយថ្ងៃពេញនេះមានការចូលរួមពីក្រុមកីឡាបាល់បោះល្បីៗមកពីសាលាអន្តរជាតិផ្សេងៗដូចជា ក្រុម CIA, Binfean, Youth Power, PSE, Almost Heroes, Montessori និងក្រុម DELI ។ ជាលទ្ធផលចំណាត់ថ្នាក់លេខ១ បានទៅក្រុម Youth Power, ចំណាត់ថ្នាក់លេខ២ បានទៅក្រុម Binfeam និងចំណាត់ថ្នាក់លេខ៣ បានទៅក្រុម CIA ។ លោករាជ ស៊ីរ៉ាណូ អ្នកសម្របសម្រួលព្រឹត្តិការណ៍ និងជាអ្នកគ្រប់គ្រងគម្រោង «អ្នកជាវីរជន» បានមានប្រសាសន៍ថា យើងរៀបចំកម្មវិធីកីឡាដែលមានឈ្មោះថា អ្នកជាវីរជននេះឡើងគឺក្នុងគោលបំណងផ្តួចផ្តើមចលនានៃការជំរុញទឹកចិត្តមនុស្សឱ្យយល់ដឹងចូលរួមយ៉ាងសកម្ម និងព្រមគ្នាក្នុងការគាំទ្រការប្រមូលថវិកាដើម្បីជួយដល់កុមារក្រីក្រនៅកម្ពុជា ។ មួយវិញទៀតនោះ គឺដើម្បីឱ្យពួកគេចូលរួមសកម្មភាពលេងកីឡា ព្រោះកីឡានាំមកនូវមិត្តភាព សាមគ្គីភាព ហើយយើងចង់លើកស្ទួយវិស័យកីឡាជាតិយើងឱ្យកាន់តែមានការរីកចម្រើនឡើងតាមរយៈការចូលរួមរបស់ពួកគាត់ ។
លោកបន្តថា ចាប់ពីពេលចាប់ផ្តើមយុទ្ធនាការដំបូងនៅខែតុលា ឆ្នាំ២០១៣ យើងបានទទួលថវិកាជាង៦៣.០០០ដុល្លារ ដូច្នេះយើងអាចមានលទ្ធភាពជួយដល់កុមារចំនួន១០៣នាក់ ។ បុ៉ន្តែយើងនៅមានមហិច្ឆតាធំទៀត ព្រោះយើងនៅមានកុមារប្រហែល៤០០នាក់ផ្សេងទៀតដែលចង់ចូលសាលារៀន ។ លោករាជ ស៊ីរ៉ាណូ ក៏បានសំណូមពរដល់សប្បុរសជនទាំងអស់មេត្តាផ្តល់នូវការបរិច្ចាគជាថវិការបស់ខ្លួនដូចជា ការទិញម្ហូបដែលយើងបានរៀបចំដាក់តាំងបង្ហាញក្នុងពិព័រណ៍ម្ហូប ក៏ដូចជាតាមរយៈកីឡា និងសិល្បៈដែលជាការសម្តែងរបស់ក្មេងៗក្នុងអង្គភាពផងដែរ ។ មួយវិញទៀត យើងមានហិបសប្បុរសជាច្រើនទៀតតាមសណ្ឋាគារ ផ្សារទំនើប ក្រុមហ៊ុនមួយចំនួន ដូច្នេះបងប្អូនអាចចូលរួមបរិច្ចាគជួយដល់កុមារក្រីក្រដើម្បីឱ្យពួកគាត់ទទួលបាននូវចំណេះដឹង និងជំនាញពិតប្រាកដទៅថ្ងៃអនាគត ។
សូមបញ្ជាក់ផងដែរថា អង្គការភាពញញឹមនៃកុមារ (PSE) ត្រូវបានបង្កើតឡើងនៅចុងឆ្នាំ១៩៩៥ ក្នុងប្រទេសកម្ពុជា ដោយបានធ្វើការផ្តល់អាហារ ទីជម្រក ការថែទាំសុខភាព ការអប់រំទូទៅ និងការបណ្តុះបណ្តាលវិជ្ជាជីវៈដល់កុមារទុរគត កុមារដែលរងការធ្វើបាប កុមារដែលរងការរំលោភបំពាន និងមិនមានការអប់រំ នៅរាជធានីភ្នំពេញ ក្រុងព្រះសីហនុ និងខេត្តសៀមរាប ។ បច្ចុប្បន្ននេះ PSE កំពុងផ្តល់ជំនួយដល់កុមារជាង៦.៥០០នាក់ ក្នុងនោះមានកុមារប្រមាណ៣.០០០នាក់នៅតាមសាលារដ្ឋ, ១.៥០០នាក់នៅក្នុងកម្មវិធីអប់រំការពារ និង១.៥០០នាក់នៅក្នុងកម្មវិធីបណ្តុះបណ្តាលវិជ្ជាជីវៈ ។ កុមារប្រហែល៥០០នាក់បានទទួលផលពីកម្មវិធីអប់រំជាក់លាក់ដូចជា ថ្នាក់សម្រាប់កុមារដែលមានពិការភាព មណ្ឌលពន្លឺថ្ងៃ សុខុមាលភាពទារក ។ល។ សម្រាប់សប្បុរសជនដែលចង់ចូលរួមផ្តល់ជាវិភាគទានដល់អង្គការខាងលើ អាចទំនាក់ទំនងតាមរយៈលេខទូរស័ព្ទ ០១២ ៤៦៣ ៣១៥ ឬ Email: rano.reachsy@site-pse.org ៕
ចែករំលែកព័តមាននេះ