រាជធានីភ្នំពេញ ៖ ជំនួបប៉ះគ្នាជាថ្មីរវាងកីឡាករនន់ ជំនិត មកពីក្លិប CMAC និងកីឡាករឃឹម ពេជ្រចិន្តា មកពីក្លិបបុរីនាគរាជ កាលពីល្ងាចថ្ងៃអាទិត្យ ទី២៣ កុម្ភៈ នៅសង្វៀនទូរទស្សន៍បាយ័នបឹងស្នោ បានលេចចេញលទ្ធផលមិនខុសកាលពីលើកមុនដដែល បើទោះជា ឃឹម ពេជ្រចិន្តា បានប្រឹងប្រែងឡើងអស់ពីសមត្ថភាព ក្តី ។
រាជធានីភ្នំពេញ ៖ ជំនួបប៉ះគ្នាជាថ្មីរវាងកីឡាករនន់ ជំនិត មកពីក្លិប CMAC និងកីឡាករឃឹម ពេជ្រចិន្តា មកពីក្លិបបុរីនាគរាជ កាលពីល្ងាចថ្ងៃអាទិត្យ ទី២៣ កុម្ភៈ នៅសង្វៀនទូរទស្សន៍បាយ័នបឹងស្នោ បានលេចចេញលទ្ធផលមិនខុសកាលពីលើកមុនដដែល បើទោះជា ឃឹម ពេជ្រចិន្តា បានប្រឹងប្រែងឡើងអស់ពីសមត្ថភាព ក្តី ។ អុីចឹងហើយទើបមានការលើកឡើងដដែលជាដដែលថា នន់ ជំនិត ទោះជាធ្លាក់ក្រេឌីត ក៏អាចបំបាក់ជើងខ្លាំងដៃគូរបស់ខ្លួនបានដែរ បើទោះជាបុគ្គលនោះមានបំណងសងសឹកយ៉ាងណាក៏ដោយ ។
ការប្រកួតរវាងកីឡាករគូនេះ ដ្បិតថាល្អមើល បុ៉ន្តែចំណុចខ្សោយក្នុងការប្រកួតទាំងមូលរបស់គូនេះ គឺមើលទៅរាងស្ទក់មិនសូវរហ័សរហួននោះឡើយ បើទោះជាពួកគេម្នាក់ៗហាក់ប្រឹងប្រែងទាំងសងខាងឡើងអស់ពីសមត្ថភាពនោះក៏ដោយ ។ បង្គោលក្រហម នន់ ជំនិត ក្នុងជំហានដំបូងមិនមានឱកាសវាយសម្រុកទៅលើកីឡាករបង្គោលខៀវ ឃឹម ពេជ្រចិន្តា ដើម្បីរក្សាក្រេឌីតបុ៉ន្មានទេ ដោយសារតែចូលកៀកមិនទាន់បានស្អីផង ក៏ត្រូវបង្គោលខៀវ ឃឹម ពេជ្រចិន្តា វាយត្រូវម៉កៗស្ទើរតែគ្មានឱកាសវាយតបត ។ ឃឹម ពេជ្រចិន្តា បានប្រើយុទ្ធសាស្ត្រវាយម៉ាត់ឆ្វេង-ស្តាំបានល្អច្រើនគួរឱ្យកត់សម្គាល់នៅអំឡុងដើមទី ។ រហូតដល់ទឹកទី៣ ទើបគេឃើញ នន់ ជំនិត អាចបំបែកស្នៀតដ៏ខ្លាំងក្លារបស់គូប្រកួតបាន ។ ជាមួយនឹងយុទ្ធសាស្ត្រថ្មី នន់ ជំនិត គ្រាន់តែចូលភ្លាម ក៏រកឱកាសទាត់ប៉ែងជើងក្រោមធ្វើឱ្យកីឡាករឃឹម ពេជ្រចិន្តា ដួលបះជើងច្រងាប់ច្រងិលព្រោះតែដឹងថា ឃឹម ពេច្រចិន្តា ទន់ជើងក្រោម ។
ទំនងជាដឹងនូវចំណុចខ្សោយនេះទើបគ្រាន់តែ ឃឹម ពេជ្រចិន្តា ចូលជិតមិនទាន់បានបោះដៃជើងស្អីផង គេក៏យកជើងប៉ែងធ្វើឱ្យដួលដែលនាំឱ្យមានការកាត់ពិន្ទុជាញយដងក្នុងរយៈពេលប៉ះគ្នាទាំង៥ទឹក ។ មិនមែនជាលើកទី១ ទេ ដែល ឃឹម ពេជ្រចិន្តា បង្គោលខៀវត្រូវដួលភីងៗក្រោមកម្លាំងជើងប៉ែងរបស់ នន់ ជំនិត នៅក្នុងការប្រកួតនោះ ពោលគឺស្ទើរតែគ្រប់ទឹកតែម្តងដែលគេត្រូវជួបនឹងសភាពនេះដោយរកឱកាសកែប្រែបច្ចេកទេសប្រកួតមិនចង់ទាន់ ។ បើទោះជាលើកក្រោយៗ ឃឹម ពេជ្រចិន្តា បានប្តូរជំហរមកទប់ជើងក្រោម និងបានប្រើស្នៀតបែបនេះវាយបោកផ្តួលកីឡាករនន់ ជំនិត បំបែកភាពខ្លាំង ក៏ស្នៀតដែលគេបានប្រើមិនអាចកាច់ធ្មុងរបស់ នន់ ជំនិត បានដដែល ដោយបានត្រឹមតែដួលផ្ងារជើងខ្លួនឯងម្តងជាពីរដងក្នុងពេលសម្រុកហួសហេតុបុ៉ណ្ណោះ ។ ក្រុមអ្នកទស្សនាមើលឃើញថា កីឡាករឃឹម ពេជ្រចិន្តា ខ្លាំងផ្នែកកណ្តាប់ដៃ បុ៉ន្តែជើងក្រោមរបស់គេទន់ណាស់ ឯបង្គោលក្រហមវិញ គេរឹងជើងក្រោម ប៉ុន្តែស្នៀតខាងលើរបស់គេហាក់ដូចជាប្រហែស និងចន្លោះក្នុងការវាយលុក ដែលមើលទៅគឺចាញ់ប្រៀប ឃឹម ពេជ្រចិន្តា ។ អុីចឹងហើយទើបគេឃើញ នន់ ជំនិត មិនសូវហ៊ានចូលកៀក ឃឹម ពេជ្រចិន្តា ដោយភាគច្រើនគេប្រើវិធីទាត់កៀសជើង និងធាក់ចេញ ។ ឱកាសទាំងនេះដែលអាចធ្វើឱ្យកីឡាករបង្គោលខៀវ ឃឹម ពេជ្រចិន្តា នៅតែស្ទុះមិនរួចជាមួយគេក្នុងជំនួបលើកនេះ ដែលគេនិយាយបានថា គឺនន់ ជំនិត នៅតែមានសមត្ថភាពគ្រប់គ្រាន់ ដែល ឃឹម ពេជ្រចិន្តា មិនអាចមើលស្រាល ។
ឯកមកកាន់ការប្រកួតវិញ គឺដោយសារតែមានឱកាសកៀសជើងឱ្យ ឃឹម ពេជ្រចិន្តា ដួលច្រើនលើកនេះហើយទើបធ្វើឱ្យគេទន់ជំហរ និងបាក់កម្លាំងដែលនាំឱ្យ នន់ ជំនិត ប្តូរយុទ្ធសាស្ត្រវាយសម្រុកដោយគំហុកដើម្បីក្តោបក្តាប់យកប្រៀបនាពេលបន្តបន្ទាប់ ។ ជាក់ស្តែងនៅទឹកទី៤ និងទី៥ គេឃើញ នន់ ជំនិត កាន់តែបង្កើនសន្ទុះវាយចេញដោយគំហុក ដែលសឹងតែធ្វើឱ្យ ឃឹម ពេជ្រចិន្តា ស៊ូមិនចង់ដល់ទឹកចុងក្រោយ ។ ទីបំផុតកីឡាករបង្គោលក្រហម នន់ ជំនិត បានក្លាយជាអ្នកឈ្នះពិន្ទុដូចការគ្រោងទុក ដែលជ័យជម្នះលើកនេះត្រូវគេមើលឃើញថា ឃឹម ពេជ្រចិន្តា ពិតជាបាក់មុខជាថ្មីទៀតហើយក្នុងជំនួបប៉ះគ្នាជាមួយនឹងដៃគូចាស់ ។ ក្រឡេកទៅកាន់អ្នកគាំទ្រវិញ បើទោះជាដឹងថា នន់ ជំនិត ល្អជាង ក៏មានច្រើនជាងពាក់កណ្តាលបានងាកទៅទុកចិត្តថា ឃឹម ពេជ្រចិន្តា នឹងឈ្នះសម្រាប់ការប៉ះគ្នាលើកនេះ ។ ការយល់ឃើញនេះ គឺបន្ទាប់ពី នន់ ជំនិត ចាប់ផ្តើមធ្លាក់ដៃតាំងពីមានរបួសជង្គង់ធ្ងន់ធ្ងរម្តងមក ហើយទទួលបរាជ័យម្តងហើយម្តងទៀតនៅក្រោមកណ្តាប់ដៃគូប្រកួតចាស់ថ្មីនាពេលចុងក្រោយ ។ គាប់ជួនជា ឃឹម ពេជ្រចិន្តា នៅខ្លាំង ដែលអ្នកណាក៏គិតស្មានថា ពិតជាមានយុទ្ធសាស្ត្រប្តូរស្នៀត និងការតាំងចិត្តដោយមិនពិបាកសម្រាប់ការសងសឹកនោះផង ទើបការព្យាករណ៍ថា នន់ ជំនិត នឹងអាម៉ាស់មុខសម្រាប់លើកនេះវិញបានក្លាយជារឿងផុសផុល ។ ទោះបីយ៉ាងណា ការគិតវាមិនដូចនឹងលទ្ធផលជាក់ស្តែងនោះទេ នៅពេលដែល៥ទឹកនៃការប្រកួតបានបង្ហាញយ៉ាងច្បាស់ថា ឃឹម ពេជ្រចិន្តា មិនមានលទ្ធភាពទប់កណ្តាប់ដៃ និងរន្ទះជើងរបស់ នន់ ជំនិត សម្រាប់លើកនេះដដែល ។ ការប្រកាសថា ឃឹម ពេជ្រចិន្តា ចាញ់ពិន្ទុ បានក្លាយជារឿងអាម៉ាស់ច្រំដែលមិនអាចឱ្យគេស្តារមុខមាត់បាន បន្ទាប់ពីចាញ់ នន់ ជំនិត បុ៉ន្មានលើកកន្លងមក ។
នៅលើសង្វៀនដដែល កីឡាករយ៉ាម រ៉េត មកពីក្លិបរស្មីកុមារកំព្រា ចាញ់ពិន្ទុកីឡាករស៊ីថា សារ៉ាន់ មកពីក្លិប CMAC ។ កីឡាករសែត សាលីន មកពីក្លិបបាត់ដំបងពាយ័ព្យ វាយកីឡាករវង្ស ចំរើន មកពីក្លិបយុវជនកម្ពុជាខណ្ឌមានជ័យ ឱ្យសន្លប់ក្នុងទឹកទី២ ។ កីឡាករកង មករា មកពីក្លិបកងទ័ពពិសេសឆត្រយោង៩១១ វាយឈ្នះកីឡាករម៉ន ចាន់ឌី មកពីក្លិបព្រែកឯងកីឡាដោយពិន្ទុ និងកីឡាករម៉ូ ណារ៉ាក់ មកពីក្លិបសំរោងកោងកីឡា ខេត្តបាត់ដំបង ត្រូវសន្លប់ក្រោមកណ្តាប់ដៃកីឡាករម៉ន ភារម្យ មកពីក្លិបព្រែកឯងកីឡាក្នុងទឹកទី៤ ៕
ចែករំលែកព័តមាននេះ