រាជធានីភ្នំពេញ ៖ កម្មការិនីរោងចក្រកាត់ដេរផាកស៊ុនម្នាក់បានស្លាប់យ៉ាងអាណោចអាធ័មដោយសារម៉ូតូមួយគ្រឿងបើកបុកពេញទំហឹង ខណៈពេលកំពុងដើរឆ្លងថ្នល់ ។ហេតុការណ៍នេះបានកើតឡើងកាលពីវេលាម៉ោង៦ និង៣០នាទីព្រឹក ថ្ងៃទី២៤ កុម្ភៈ២០១៤ នៅតាមបណ្តោយផ្លូវជាតិលេខ២ ស្ថិតក្នុងភូមិព្រៃកតាឡុង សង្កាត់ចាក់អង្រែក្រោម ខណ្ឌមានជ័យ។
កម្មការិនីកាត់ដេររងគ្រោះឈ្មោះឃឹម សុខា អាយុ៤៥ឆ្នាំ ស្នាក់នៅផ្ទះជួលជិតកន្លែងកើតហេតុ និងមានស្រុកកំណើតនៅស្រុកកណ្តាលស្ទឹង ខេត្តកណ្តាល ចំណែកអ្នកបើកម៉ូតូឈ្មោះគន់ វ៉ន ភេទប្រុស អាយុ២៣ឆ្នាំ ជាកម្មកររោងចក្រ មានស្រុកកំណើតខេត្តព្រៃវែង ។
តាមប្រភពពីកន្លែងកើតហេតុបានឱ្យដឹងថា មុនពេលកើតហេតុគេឃើញនារីរងគ្រោះដើរឆ្លងថ្នល់ជាតិលេខ២ លុះឆ្លងជិតផុតទៅហើយស្រាប់តែម៉ូតូមួយគ្រឿងធុនសេ១២៥ពណ៌ខ្មៅ ពាក់ស្លាកលេខភ្នំពេញ១N៩៦៦៨ បើកដោយបុរសម្នាក់ធ្វើដំណើរពីត្បូងទៅជើងមកដល់បុកយ៉ាងពេញទំហឹងបណ្តាលឱ្យនារីរងគ្រោះដួលបត់.កស្លាប់ភ្លាមៗនៅនឹងកន្លែង។
ជុំវិញហេតុការណ៍គ្រោះថ្នាក់ចរាចរណ៍នេះសមត្ថកិច្ចសន្និដ្ឋានថា បណ្តាលមកពីអ្នកបើកម៉ូតូបើកវ៉ារថយន្តក្នុងល្បឿនលឿន ហើយវាក់ជាមួយនារីរងគ្រោះកំពុងដើរឆ្លងថ្នល់ចាប់ហ្វ្រាំងមិនទាន់ក៏បុកពេញទំហឹងតែម្តង៕
ចែករំលែកព័តមាននេះ