រាជធានីភ្នំពេញ ៖ បុរសម្នាក់ស្រវឹងស្រាជិះម៉ូតូឌុបកូនចេញពីហូបការវិលត្រឡប់ទៅផ្ទះវិញបានជ្រុលចង្កូតទៅបុកជាមួយម៉ូតូមួយគ្រឿងទៀតបណ្តាលឱ្យរងរបួសបែកក្បាល បែកប្រអប់ដៃខាងស្តាំសន្លប់ស្តូកស្តឹងនៅកន្លែងកើតហេតុ ចំណែកកូនប្រុសមិនរងរបួសទេអង្គុយយំនៅកណ្តាលថ្នល់ ។ ហេតុការណ៍នេះបានកើតឡើងកាលពីវេលាម៉ោង៩ និង៥០នាទីយប់ ថ្ងៃទី២៣ កុម្ភៈ ២០១៤ នៅលើកំណាត់ផ្លូវជាតិលេខ៣ មុខច្រកចូលបុរីសុខសាន្ត ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ។
ជនរងគ្រោះឈ្មោះទុច សុខហ៊ាន ភេទប្រុស អាយុ៣០ឆ្នាំ ជាជាងជួសជុលម៉ូតូ រស់នៅភូមិឡ ឃុំអង្គពពេល ស្រុកគងពិសី ខេត្តកំពង់ស្ពឺ មានស្រុកកំណើតភូមិពោធិ៍ ឃុំខ្វាវ ស្រុកសំរោង ខេត្តតាកែវ ។
តាមប្រភពបានឱ្យដឹងថា មុនពេលកើតហេតុគេឃើញជនរងគ្រោះជិះម៉ូតូមួយគ្រឿងធុនសេ១២៥ ពណ៌ខ្មៅ ស៊េរី២០០៤ ពាក់ស្លាកលេខភ្នំពេញ១AH៤២៨០ ដោយមានឌុបកូនប្រុសម្នាក់ឈ្មោះប៊ុនលី អាយុ៥ឆ្នាំ ធ្វើដំណើរចេញពីហូបការគេទាំងស្រវឹងត្រឡប់ទៅផ្ទះវិញ លុះដល់ចំណុចកើតហេតុខាងលើគ្រប់គ្រងខ្លួនឯងលែងបានបានជ្រុលចង្កូតទៅបុកម៉ូតូមួយគ្រឿងទៀតមិនចាំម៉ាកធ្វើដំណើរបញ្ច្រាសទិសគ្នាយ៉ាងពេញទំហឹងបណ្តាលឱ្យបុរសជាឪពុករបួសធ្ងន់សន្លប់ ចំណែកកូនប្រុសមិនរងរបួសទេគិតតែពីយំ។
ក្រោយកើតហេតុជនរងគ្រោះត្រូវរថយន្តសង្គ្រោះរបស់អង្គភាព៧១១ដឹកទៅមន្ទីរពេទ្យព្រះកុសុមៈ រីឯម៉ូតូត្រូវសមត្ថកិច្ចយកទៅរក្សាទុកនៅប៉ុស្តិ៍នគរបាលចោមចៅ ហើយប្រគល់ជូនជនរងគ្រោះវិញនៅពេលក្រោយ៕
ចែករំលែកព័តមាននេះ