ខេត្តកំពង់ចាម ៖ រថយន្តដឹកប្រេងឥន្ធនៈមួយគ្រឿងចំណុះ៨.០០០លីត្រ របស់ក្រុមហ៊ុនថារីពាណិជ្ជ ពាក់ស្លាកលេខកំពង់ចាម ៣A-២៨៩៦បានបុករះកង់ ម៉ូតូ និងរថយន្តអ្នកដំណើរសរុបចំនួន១៤គ្រឿង បង្កនូវមហន្តរាយគួរឱ្យញាក់សាច់នៅត្រង់ចំណុចរង្វង់មូលក្បាលស្ពានគីហ្សុ៊ណា ត្រើយខាងលិច ក្នុងសង្កាត់វាលវង់ ក្រុងកំពង់ចាម ។
ខេត្តកំពង់ចាម ៖ រថយន្តដឹកប្រេងឥន្ធនៈមួយគ្រឿងចំណុះ៨.០០០លីត្រ របស់ក្រុមហ៊ុនថារីពាណិជ្ជ ពាក់ស្លាកលេខកំពង់ចាម ៣A-២៨៩៦បានបុករះកង់ ម៉ូតូ និងរថយន្តអ្នកដំណើរសរុបចំនួន១៤គ្រឿង បង្កនូវមហន្តរាយគួរឱ្យញាក់សាច់នៅត្រង់ចំណុចរង្វង់មូលក្បាលស្ពានគីហ្សុ៊ណា ត្រើយខាងលិច ក្នុងសង្កាត់វាលវង់ ក្រុងកំពង់ចាម ។
ហេតុការណ៍នេះ បានកើតឡើងកាលពីវេលាម៉ោង១១និង៣០នាទីព្រឹកថ្ងៃទី២៣ កុម្ភៈ ដោយឆក់យកអាយុជីវិតមនុស្សប្រុស២នាក់ និងរបួសធ្ងន់-ស្រាល៥នាក់ ។ កត្តានេះបណ្តាលមកពីរថយន្តដឹកប្រេងដាច់ហ្វ្រាំងខណៈពេលបើកចុះពីលើស្ពានគីហ្សុ៊ណា និងបង្កឱ្យមានការភ្ញាក់ផ្អើលជាខ្លាំង រហូតធ្វើឱ្យកកស្ទះចរាចរណ៍ ហើយអ្នកបើកបររថយន្តដឹកប្រេងបានបើកទ្វាររថយន្តលោតចុះដាក់មេប្រូចបាត់ ។ បុរសជាអ្នកលក់ដូរម្នាក់ឈ្មោះម៉ែន ថាល់ អាយុ៣៧ឆ្នាំ និយាយថា ខណៈរូបគាត់កំពុងអង្គុយលក់ដូរនៅមុខផ្ទះ ត្រង់ចំណុចរង្វង់មូលក្បាលស្ពានគីហ្សុ៊ណា ស្រាប់តែឃើញរថយន្តដឹកប្រេងធុនធំ១គ្រឿង ពេលចុះពីលើស្ពានបើកលឿនស្លេវតែម្តង ដោយបានបុករះម៉ូតូជាច្រើនគ្រឿងកៀបជាប់ពីក្រោមរថយន្តរុញមកផ្ទប់នឹងតុដាក់ដបប្រេងសាំងលក់ជាង១០ដបរបស់គាត់ បណ្តាលឱ្យបែកនិងបង្កឱ្យឆាបឆេះសន្ធោសន្ធៅផ្សែងហុយខ្មួលខ្មាញ់ទៅលើអាកាស ។
លោកម៉ែន ថាល់ បាននិយាយទៀតថា ក្នុងពេលនោះរូបគាត់បានរត់គេចចូលទៅក្នុងផ្ទះទាន់ បើពុំនោះទេ នឹងត្រូវរថយន្តបុកជាមិនខាន ។ ប៉ុន្តែដោយមានស្មារតីរឹង គាត់ក៏ស្ទុះទៅយកបំពង់ពន្លត់អគ្គិភ័យ១មកបាញ់ពន្លត់ភ្លើង ហើយអ្នកជិតខាងក៏មកជួយអន្តរាគមន៍យកបំពង់ពន្លត់អគ្គិភ័យចំនួន៤ទៀតមកជួយបាញ់ពន្លត់ដែរ ។ បន្តិចក្រោយមកភ្លើងក៏បានរលត់ទៅវិញ តែម៉ូតូចំនួន៤គ្រឿងត្រូវភ្លើងឆេះ ដែលម៉ូតូខ្លះខូចខាតដោយអន្លើ និងខ្លះឆេះក្លាយទៅជាដែកអេតចាយ ។ រីឯស្ត្រីឈ្មោះអីុ ណៃ អាយុ៤៥ឆ្នាំ ដែលជាអ្នកឃើញហេតុការណ៍ផ្ទាល់ភ្នែកដែរនិយាយថា ខណៈគាត់កំពុងអង្គុយលក់ដូរនៅនឹងចិញ្ចើមថ្នល់ជាតិលេខ៧ ស្រាប់តែឃើញរថយន្តស៊ីទែនដឹកប្រេងខាងលើបើកបុករះម៉ូតូ និងរថយន្តជាច្រើនគ្រឿងតម្រង់មកកន្លែងលក់របស់គាត់ ។ ភ្លាមៗនោះគាត់ស្រែកប្រាប់អ្នកលក់ដូរនៅក្បែរនោះរួមនឹងអ្នកផ្សេងទៀត ដែលមានគ្នាប្រហែលជាង១០នាក់ ឱ្យប្រញាប់រត់ចេញជាបន្ទាន់ ។ គ្រាន់តែរត់ចេញបានបន្តិចប៉ុណ្ណោះ រថយន្តដឹកប្រេងក៏មកដល់បុករថយន្តកូរ៉េប្រភេទទ្រុងដាក់នៅមុខផ្ទះរុញមកសង្កត់លើម៉ូតូរបស់គាត់ និងរបស់បងប្រុសគាត់១គ្រឿងទៀត ព្រមទាំងកង់១គ្រឿងរងការខូចខាតខ្ទេចខ្ទីកៀបជាប់ក្រោមរថយន្ត ។
ចំណែកលោកស៊ាម យូសេង ប្រធាននគរបាលចរាចរណ៍នៃអធិការដ្ឋាននគរបាលក្រុងកំពង់ចាមប្រាប់ឱ្យដឹងថា គ្រោះថ្នាក់នេះបង្កឡើងដោយរថយន្តដឹកប្រេងដាច់ហ្វ្រាំងពេលចុះចំណោតស្ពានគីហ្សុ៊ណា ។ ក្នុងហេតុការណ៍ខាងលើរថយន្តបានបុករះកង់២គ្រឿង ម៉ូតូ៩គ្រឿង និងរថយន្ត៣គ្រឿង ស្លាប់មនុស្សប្រុស២នាក់ (មនុស្សធំម្នាក់ និងក្មេងតូចម្នាក់ ) និងរបួសធ្ងន់-ស្រាល៥នាក់ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តជាបន្ទាន់ ។ ជាមួយនេះ រថយន្តពន្លត់អគ្គិភ័យរបស់ស្នងការដ្ឋាននគរបាលខេត្ត១គ្រឿងក៏បានចេញទៅជួយអន្តរាគមន៍បាញ់ទឹកពន្លត់នៅកន្លែងម៉ូតូឆេះ និងជួយការពារក្រែងមានមហន្តរាយឆេះរាលដាលណាមួយទៀត ។ ចំពោះវត្ថុតាង ត្រូវបាននាំយកទៅរក្សាទុកនៅអធិការដ្ឋាននគរបាលក្រុងកំពង់ចាម ដើម្បីដោះស្រាយតាមច្បាប់ ៕
ចែករំលែកព័តមាននេះ