ប្រទេសថៃ ៖ ព្រឹត្តិការណ៍ប្រដាល់ Thai Fight ដែលធ្វើឡើងរៀងរាល់មួយខែម្តងទទួលបានការគាំទ្រយ៉ាងខ្លាំងពីសំណាក់ទស្សនិកជនទាំងក្នុងប្រទេស និងក្រៅប្រទេសដោយសារនៅលើសង្វៀនមួយនេះប្រជុំដោយកីឡាករជើងខ្លាំងមកពីប្រទេសនានា ដែលខ្លះស្ថិតក្នុងលំដាប់ពិភពលោកទៀតផង ។
ប្រទេសថៃ ៖ ព្រឹត្តិការណ៍ប្រដាល់ Thai Fight ដែលធ្វើឡើងរៀងរាល់មួយខែម្តងទទួលបានការគាំទ្រយ៉ាងខ្លាំងពីសំណាក់ទស្សនិកជនទាំងក្នុងប្រទេស និងក្រៅប្រទេសដោយសារនៅលើសង្វៀនមួយនេះប្រជុំដោយកីឡាករជើងខ្លាំងមកពីប្រទេសនានា ដែលខ្លះស្ថិតក្នុងលំដាប់ពិភពលោកទៀតផង ។
ជាមួយគ្នានេះ ក៏មានការកត់សម្គាល់ផងដែរថា ការប្រកួតភាគច្រើនជ័យជម្នះបានធ្លាក់ក្នុងកណ្តាប់ដៃកីឡាករថៃ ដោយសារអ្នករៀបចំការប្រកួតដាក់កីឡាកររបស់គេដែលមានសមត្ថភាពខ្ពស់ជាងកីឡាករបរទេស ។ ជាក់ស្តែង កីឡាករជើងខ្លាំងប្រចាំប្រទេសកម្ពុជា កែវ រំចង់ តស៊ូបានត្រឹមតែ២ទឹកប៉ុណ្ណោះ ពេលគេផ្គូផ្គងឱ្យជួបកីឡាករជើងខ្លាំងលំដាប់ពិភពលោករបស់ថៃ Yodsanklai កាលពីយប់ថ្ងៃសៅរ៍ ទី២២ កុម្ភៈ ក្នុងព្រឹត្តិការណ៍ប្រដាល់ខាងលើនេះ ។
នៅទឹកទី១ កែវ រំចង់ ត្រូវគេមើលឃើញវាយត្រូវគូប្រកួតខ្លះ ប៉ុន្តែនៅចុងទឹក គេត្រូវកីឡាករម្ចាស់ផ្ទះវាយកែងចំមុខដួលបណ្តាលឱ្យអាជ្ញាកណ្តាលរាប់៨ ។ ទឹកទី២ ដោយសារមើលឃើញ កែវ រំចង់ រាងធ្លាក់ដៃបន្តិច Yodsanklai បានបញ្ចេញស្នៀតកណ្តាប់ដៃវាយផ្ទួនៗទៅលើផ្ទៃមុខ កែវ រំចង់ បណ្តាលឱ្យដួលសន្លប់ធំតែម្តង។
ព្រឹត្តិការណ៍នេះគេឃើញមានការទស្សនាតាមដានពីសំណាក់ប្រជាពលរដ្ឋថៃដោយផ្ទាល់ និងតាមកញ្ចក់ទូរទស្សន៍រាប់ម៉ឺននាក់ ខណៈដែលនៅឯកម្ពុជាឯណេះវិញ ក៏មានការតាមដានព្រឹត្តិការណ៍នេះតាមរយៈកញ្ចក់ទូរទស្សន៍បុ៉ស្តិ៍លេខ៣ ថៃ ច្រើនគួរសមដែរ ។ ជាក់ស្តែង គ្រាន់តែ កែវ រំចង់ ឡើងបង្ហាញខ្លួននៅលើរេញតាមកញ្ចក់ទូរទស្សន៍ថៃនេះភ្លាម គេឃើញក្រុមអ្នកលេង Facebook ថតបង្ហាញគគ្រឹកគគ្រេងតែម្តង ដើម្បីបង្ហាញថា ពួកគេគាំទ្រចំពោះវត្តមានរបស់ កែវ រំចង់ នៅក្នុងប្រទេសថៃ ។ ការបរាជ័យរបស់ កែវ រំចង់ ត្រូវគេចោទថា ជាចេតនាបំបាក់មុខរបស់ថៃ ដែលបានផ្គូផ្គងឱ្យប៉ះជាមួយកីឡាករលំដាប់ពិភពលោករបស់ខ្លួន ។ ក្រោយការប្រកាសថា កែវ រំចង់ ត្រូវសន្លប់ក្នុងទឹកទី២ នៅលើបណ្តាញសង្គម Facebook ទាំងមូលត្រូវគេឃើញសរសេរពាក្យថា ឈប់យកកីឡាករកម្ពុជាទៅឱ្យគេបំបាក់ទៀតទៅ ។ បើទោះជា កែវ រំចង់ បានអះអាងថា ការបរាជ័យក្រោមដៃកីឡាករ Yodsanklai ក៏នឹងធ្វើឱ្យគេល្បីឈ្មោះ និងទទួលបានការចាប់អារម្មណ៍ បុ៉ន្តែក៏ត្រូវអ្នកគាំទ្រភាគច្រើនមិនសប្បាយចិត្តផងដែរ នៅពេលដែលជើងខ្លាំងលំដាប់កំពូលរបស់កម្ពុជា ត្រូវគេដាក់ឱ្យប្រកួតជាមួយកីឡាករជើងខ្លាំងលំដាប់ពិភពលោករបស់ថៃ ហើយជាលទ្ធផលកីឡាករកម្ពុជាបានត្រូវតែស្ពាយរបួស និងការបរាជ័យយ៉ាងអាម៉ាស់ត្រឡប់មកវិញប៉ុណ្ណោះ ។ កែវ រំចង់ បានក្លាយជាកីឡាករជើងខ្លាំងទី២ របស់កម្ពុជាដែលទទួលបរាជ័យនៅលើទឹកដីថៃ ក្នុងព្រឹត្តិការណ៍ប្រដាល់ Thai Fight បន្ទាប់ពីកីឡាករវង្ស ណយ ដែលបានចាញ់កីឡាករថៃ ក្នុងទឹកទី៣ កាលពីចុងឆ្នាំ២០១៣ កន្លងទៅនេះ។
សូមបញ្ជាក់ថា កីឡាករថៃ Yodsanklai បានក្លាយជាកីឡាករប្រដាល់ក្នុងឆ្នាំ១៩៩៣ និងបានក្លាយជាកីឡាករប្រដាល់លំដាប់ថ្នាក់អន្តរជាតិរបស់ប្រទេសថៃតែម្តងក្នុងបុ៉ន្មានឆ្នាំចុងក្រោយ ។ ក្នុងវ័យ២៩ឆ្នាំ កម្ពស់១,៧១ម៉ែត្រ គេ ធ្លាប់ប្រកួតបាន២៦២ដង ឈ្នះ១៨៧ដង និងធ្លាប់ផ្តួលដៃគូឱ្យសន្លប់ប្រមាណ៧២ដង ។ ក្រៅពីធ្លាប់គ្រងខ្សែក្រវាត់ពិភពលោក World Boxing Council ក្នុងប្រភេទទម្ងន់១៥៤ផោន និងជាជើងឯក៣ជំនាន់ក្នុងព្រឹត្តិការណ៍ប្រដាល់ថៃ ប្រចាំកីឡដ្ឋាន Lumpinee Stadium ក្នុងប្រភេទទម្ងន់១១២ ដល់១៤៧ផោន គេក៏ជាកីឡាករម្នាក់ដែលជនជាតិថៃផ្តល់រហស្សនាមថា អ្នកប្រដាល់ Computer ព្រោះតែភាពរហ័សរបស់គេ ។ ចុងក្រោយនេះ គេគឺជាម្ចាស់ខ្សែក្រវាត់ The Contender Asia ផងដែរ ជាមួយនឹងការទទួលបានប្រាក់រង្វាន់រហូតដល់១៥ម៉ឺនដុល្លារអាមេរិកពីការយកឈ្នះកីឡាករលំដាប់ពិភពលោកដូចគ្នា នៅក្នុងព្រឹត្តិការណ៍ប្រកួតដ៏ធំប្រចាំឆ្នាំនៅលើសង្វៀនអន្តរជាតិនាពេលថ្មីៗកន្លងទៅនេះ ៕
ចែករំលែកព័តមាននេះ