រាជធានីភ្នំពេញ ៖ ការប្រកួតប្រដាល់នៅលើសង្វៀនទូរទស្សន៍បាយ័នស្ទឹងមានជ័យ កាលពីថ្ងៃសុក្រទី២១ កុម្ភៈ អ្នកប្រដាល់មកពីក្លិបខេត្តរតនគិរី ផង់ សុភាព បានបំបាក់អំនួតកីឡាករជើងខ្លាំងមកពីក្លិបសំរោងកោងកីឡាខេត្តបាត់ដំបង ចៅ ផលឌឿ មិនគួរឱ្យជឿ ។
រាជធានីភ្នំពេញ ៖ ការប្រកួតប្រដាល់នៅលើសង្វៀនទូរទស្សន៍បាយ័នស្ទឹងមានជ័យ កាលពីថ្ងៃសុក្រទី២១ កុម្ភៈ អ្នកប្រដាល់មកពីក្លិបខេត្តរតនគិរី ផង់ សុភាព បានបំបាក់អំនួតកីឡាករជើងខ្លាំងមកពីក្លិបសំរោងកោងកីឡាខេត្តបាត់ដំបង ចៅ ផលឌឿ មិនគួរឱ្យជឿ ។
រវាងកីឡាករទាំងពីរមិនធ្លាប់ជួបគ្នាទេពីមុនមក ហើយក៏មានសមត្ថភាព និងបទពិសោធន៍ប្រកួតខុសគ្នាឆ្ងាយណាស់ដែរ ដោយកីឡាករចៅ ផលឌឿ គឺជាកីឡាករស៊េរីមុខដែលត្រូវគេកត់សម្គាល់ថា មានក្បាច់គុនខ្លាំងជាង ទើបគេគិតថា ផង់ សុភាព ដែលថ្លើមធំហ៊ានប្រកួតជាមួយ ចៅ ផលឌឿ នោះមិនខុសអីនឹងយកពងមាន់ទៅជល់នឹងថ្មឡើយ ។ ទោះបីយ៉ាងណា ផង់ សុភាព មុននឹងមកជួប ចៅ ផលឌឿ លើកនេះ ក៏គេបានដំឡើងក្រេឌីតរបស់ខ្លួនជាបន្តបន្ទាប់តាមរយៈការយកឈ្នះកីឡាករជើងខ្លាំងមួយចំនួននាពេលកន្លងមកដូចជា នន់ ជំនិត មកពីមជ្ឈមណ្ឌលសកម្មភាពកម្ចាត់មីនកម្ពុជា, ឡេះ តើក មកពីក្លិបពុទ្ធសេរីវង្សកីឡា និងឈិន ក្វាន់ង៉ុយ មកពីក្លិបមកុដរាជសីហ៍ជាដើម ។
យ៉ាងណាក៏ដោយ ការប្រកួតរវាងគូនេះមានមនុស្សច្រើនជាង៨០% បានដាក់ចិត្តជឿថា ផង់ សុភាព នឹងមិនអាចទៅរួចឡើយដោយសារតែ ចៅ ផលឌឿ ត្រូវគេមើលឃើញនៅខ្លាំង មានស្នៀតរហ័ស និងនៅកម្លាំងពេញពិបាកមើលស្រាល ។ អីុចឹងហើយ ទើបការប្រកួតដែលប្រែក្លាយទៅជា ចៅ ផលឌឿ តស៊ូមិនរួចនោះ អ្នកណាក៏ភ្ញាក់ផ្អើលដែរ ។ ក្នុងរង្វង់៣ទឹកដំបូង កីឡាករទាំងពីរស្ថិតក្នុងកម្រិតប្រហាក់ប្រហែលគ្នានៅឡើយទេ ទោះបីបង្គោលខៀវ ចៅ ផលឌឿ ត្រូវគេមើលឃើញថា ធ្វើអីដៃគូមិនកើត ហើយបណ្តោយឱ្យបង្គោលក្រហម ផង់ សុភាព វាយចូលច្រើនក៏ដោយ ។ ប៉ុន្តែនៅទឹកបន្តបន្ទាប់ កីឡាកបង្គោលខៀវកាន់តែយ៉ាប់តែម្តង បន្ទាប់ពីបង្គោលក្រហម ផង់ សុភាព វាយចូលផ្ទួនៗទៅលើផ្ទៃមុខរបស់គេបណ្តាលឱ្យបែករហូតដល់៥ថ្នេរនៅលើបរិវេណចិញ្ចើម ។ ដ្បិតថា ចៅ ផលឌឿ អាចឆ្លងផុតដល់៥ទឹក ប៉ុន្តែសភាពដែលគេទទួលបាន គឺមើលទៅវេទនាខ្លាំងណាស់ ដោយក្រៅពីបែកឈាមហូរស្រោចទ្រូង គេក៏សឹងតែហត់ដង្ហក់ដែលឈរមិននឹងជើងនៅវគ្គចុងក្រោយ ។ កីឡាករគូនេះ ចៅ ផលឌឿ បង្គោលខៀវបានចាញ់ដោយពិន្ទុ ខណៈដែលលទ្ធភាពដែលគេទទួលបានត្រូវក្រុមអ្នកគាំទ្រយ៉ាងហោច ពាក់កណ្តាលខកចិត្ត ។ ប៉ុន្តែវាក៏ជាលទ្ធផលដែលធ្វើឱ្យកីឡាករផង់ សុភាព ឡើងសន្ទុះក្រេឌីតបានច្រើនកម្រិតផងដែរ បន្ទាប់ពីអាចផ្តួលកីឡាករជើងខ្លាំងរូបនេះបាន។
នៅលើសង្វៀនដដែលនោះ កីឡាករសែន ហ៊ាន មកពីក្លិបទីបញ្ជាការកងទ័ពជើងគោក ត្រូវសន្លប់ក្នុងទឹកទី១ ក្រោមដៃកីឡាករព្រឿង សុជាតិ មកពីក្លិបមជ្ឈមណ្ឌលខេមរភូមិន្ទ ។ កីឡាករឯម ម៉ូលី មកពីក្លិបឫទ្ធីពោធិសែនជ័យ ត្រូវសន្លប់ក្នុងទឹកទី៣ ក្រោមដៃកីឡាករវីវ៉ា សាមីត មកពីក្លិបមហិទ្ធិឫទ្ធិតាដំបងដែក ។ កីឡាករហ៊ឹម បូរិន មកពីក្លិបអរុណរះកីឡា ឈ្នះកីឡាករស្រ៊ុន ពិសី មកពីក្លិបមជ្ឈមណ្ឌលខេមរភូមិន្ទដោយពិន្ទុ និងកីឡាករឯម សារឿន មកពីក្លិបឫទ្ធិពោធិសែនជ័យ ដែលមកប្រកួតជំនួសកីឡាករចាន់ ស៊ីណាត មកពីក្លិបនិរោធមានជ័យ បានយកឈ្នះកីឡាករអ៊ុង ស៊ីណា មកពីក្លិបទីបញ្ជាការកងទ័ពជើងគោកដោយពិន្ទុ ៕
ចែករំលែកព័តមាននេះ