រាជធានីភ្នំពេញ ៖ សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានប្រកាសថានៅពេលចាប់បានអ្នករកស៊ីជួញដូរមនុស្ស បទល្មើសគ្រឿងញៀន និងបទល្មើសព្រៃឈើ ត្រូវបង្កកទ្រព្យសម្បត្តិទុកទាំងអស់ ដើម្បីត្រួតពិនិត្យជាងវាងការលាងខ្មៅ នៅលើទីផ្សារកម្ពុជា ។ ការបញ្ជាក់របស់សម្តេច ស ខេង ធ្វើឡើងក្នុងទិកាជាតិ អន្តរសាសនានៅកម្ពុជាលើកទី៣ ដើម្បីប្រយុទ្ធប្រឆាំងអំពើជួញដូរមនុស្ស នៅរសៀលថ្ងៃទី១៤ ខែសីហានេះ នៅសាលសន្និសិទកោះពេជ្រ ។
សម្តេចបញ្ជាក់ថា ៖«ត្រូវបង្កកទ្រព្យសម្បត្តិអ្នកដែលពាក់ព័ន្ធបទល្មើសជួញដូរ បទល្មើសរកស៊ីឈើខុសច្បាប់ និងបទល្មើសជួញដូរមនុស្ស បើសិនតែចាប់បានមកហើយ ចរាចរណ៍លុយខ្មៅ មិនបានបង្កទុក វាគ្មានប្រយោជន៍នោះទេ ។ ថ្មីៗនេះខាងក្រសួងយុត្តិធម៌បានដឹកនាំមន្ត្រីមកពីស្ថាប័នពាក់ព័ន្ធប្រជុំរួចហើយ ដោយបានកំណត់ជាក់លាក់ហើយ អំពីវិធីអនុវត្តមានន័យថាលុយដែលបានមកពីបញ្ហាពាក់ព័ន្ធគ្រឿងញៀន មិនត្រូវតែដាក់ពន្ធនាគារនោះទេ គឺត្រូវបង្កកទ្រព្យសម្បត្តិ (មិនរឹបអូសទេ) យើងត្រូវត្រួតពិនិត្យថា ប្រាក់នោះបានមកពីណា បើបានមកពីរកស៊ីត្រឹមត្រូវយើងទុកឲ្យគេវិញ ប៉ុន្តែបើបានមកពីរកស៊ីគ្រឿងញៀនត្រូវរឹបអូសយកទៅចាត់ចែងបានផ្លូវច្បាប់» ។
សម្តេចក៏បានលើកឡើងថា ការរកស៊ីជួញដូរមនុស្ស និងការរកស៊ីកាប់ព្រៃឈើខុសច្បាប់ក៏ដូចធ្វើដូចគ្នាដែរ គឺកាលណារកឃើញ ឬចាប់ជនល្មើសបានត្រូវបង្កកទ្រព្យសម្បត្តិ ។ ពេលដែលរកឃើញថា ទ្រព្យស្បត្តិដែលរកឃើញថា ទ្រព្យសម្បត្តិដែលបានមកនោះល្អ យើងត្រូវប្រគល់ឲ្យវិញ ដើម្បីយុត្តិធម៌ ។ ប៉ុន្តែបានមកពីកាប់ឈើខុសច្បាប់ ឬជួញដូរមនុស្ស គឺរឹបអូសយក ។ សម្តេចក៏បានបន្ថែមថា កម្លាំងដែលអនុវត្តច្បាប់ គឺនគបាលយុត្តិធម៌ និងស្ថាប័នតុលាការចាំបាច់សហការគ្នាឲ្យបានល្អ ហើយអនុវត្តតាមច្បាប់ចំពោះអ្នកដែលប្រព្រឹត្តិបទល្មើសទាំងឡាយ ។ ដូច្នេះការអប់រំ គឺជាការចាំបាច់ ដើម្បីឲ្យយល់ដឹងទាំងអស់គ្នា ប៉ុន្តែការអនុវត្តច្បាប់ក៏មិនអាចខ្វះបានដែរ ។
សម្តេចក៏បានសង្កត់ធ្ងន់ថា ការអនុវត្តខាងលើកត្រូវតែធ្វើរហូតដល់ទទួលបានជោគជ័យ ។ ប្រសិនបើគេថា កម្ពុជាជាប្រទេសជួញដូរមនុស្ស មានន័យថា ជាប្រទេសដែលលាងលុយខ្មៅព្រោះថា អ្នកដែលបានលុយដោយសារការលក់ដូរចាត់ទុកជាលុយខ្មៅ ហើយគេយកលុយមកចរាចរណ៍លើទីផ្សារនៅកម្ពុជា គឺកម្ពុជាជាកន្លែងលាងលុងខ្មៅ ។ សម្តេចបញ្ជាក់ថា ៖«វាទៅអីញ្ចឹង រកស៊ីគ្រឿងញៀនក្តី រកស៊ីឈើក្តី និងបទល្មើ សផ្សេងទៀត គឺវាទៅអីញ្ចឹង ។ លាងលុយខ្មៅ បើលុយនេះចរាចរណ៍លើទីផ្សារនោះ» ៕ កែសម្រួលដោយ ៖ សុឃាក់
ចែករំលែកព័តមាននេះ